هەڤاڵ ئەڤین فیراز (سەکینە ڕەشیدی)

هەڤاڵ ئەڤین فیراز (سەکینە ڕەشیدی) لە شاری ماکۆ، لە ڕۆژهەڵاتی کوردستان، لەدایک بوو؛ شارێک کە مێژوویەکی قووڵی لە کلتوور و مێژووی کوردستاندا هەیە و خەڵکەکەی هەمیشە بە نیشتمانپەروەری، پابەندی بە ناسنامەی کوردی و پاراستنی بەها مێژوویی و کۆمەڵایەتییەکانیان ناسراون. ماکۆ، بە خەڵکێکی دڵبەستە بە خاکی دایکی دەناسرێن. ئەڤین لە عەشیرەتی جەلالی، بە ڕەگ‌وریشەیەکی قووڵ لە مێژووی کوردستان، هەڵکەوت و لە خێزانێکی نیشتمانپەروەر و پابەند بە بەهاکانی خۆیدا پەروەردە بوو. لە هەمان ساڵانی سەرەتای ژیانییەوە، پەیوەندی بە کلتووری خۆڕاگری، بەها کۆمەڵایەتییەکان و ناسنامەی کۆمەڵگەی کوردەوە گرت. بەشداریی هەندێک لە خزمەکانی لە ڕیزی خەباتدا، لێگەڕینەکانی ئەوی قووڵتر کردەوە.

ئەڤین پێنج ساڵ لە قوتابخانەکانی نکۆڵی لە ناسنامەی کوردیی ڕژێمی کۆماری ئیسلامیدا خوێندی، بەڵام هەرگیز سیاسەتەکانی ئەو ڕژێمەی قبووڵ نەکرد کە ناسنامە و کلتووری گەلەکەی دەکردە ئامانج. هەروەها ئەو ڕۆڵانەی بەهۆی سیستەمی پیاوسالارەوە بۆ ژن دیاری کرابوون، بە قووڵی دەخستە ژێر پرسیار و تێدەگەیشت کە ئەم سیستەمە چۆن ژن لە ویست و ناسنامەی سەربەخۆی خۆی دوور دەخاتەوە و کەسایەتییتەک بێ ئیرادە دروست دەکات. ئەڤین نەیدەویست ژیانی لە چوارچێوە تابوە دیاریکراوەکانی سیستەمدا بەسەر ببات. فشاری ڕژێم لەسەر گەلەکەی قبووڵ نەدەکرد و بەدوای ڕێگایەکدا دەگەڕا بۆ ڕزگاری. دەستبەسەرکردنی بەهۆی یارمەتیدانی هاوڕێکانمانەوە، بوو بە دەرفەتێک بۆ ئەوەی زیاتر لە نزیکەوە ڕووخساری سەرکوتگەریی دوژمن بناسێت و لە ویستی خۆی بۆ هەڵبژاردنی ڕێگای تێکۆشاندا پتەوتر بێت.

چواری نیسان، ڕۆژی لەدایکبوونی ڕێبەرمان، بۆ ئەڤین بوو بە ڕۆژێکی چارەنووسساز. ئەو لە چواری نیسانی ٢٠٠٨دا بڕیاری خۆی جێبەجێ کرد و ڕووی لە شاخەکانی کوردستان کرد تا پەیوەندی بە ڕیزی گەریلاوە بکات. بە ئاگاییەوە لە چارەنووسێک تێپەڕی کە سیستەم بۆی دیاری کردبوو و فەلسەفەی ژیانی ئازادی ڕێبەر ئاپۆی هەڵبژارد. ئەم هەڵبژاردنە تەنها بەجێهێشتنی ژیانی ڕابردوو نەبوو؛ دەستپێکی ڕێگایەک بوو بۆ دروستکردنی مرۆڤێکی ئازاد و تێکۆشان لە پێناو ڕزگاریی گەلەکەیدا. هەموو شتێکی بەجێهێشت تا ژیانێکی نوێ لەسەر بنەمای ئازادی، ویست و باوەڕەکانی دەست پێ بکات.

هەڤاڵ ئەڤین یەکەمین ڕاهێنانەکانی گەریلای لە ناوچەی خواکورکدا تەواو کرد. شکۆی شاخەکان و ژیانی بە کۆمەڵی گەریلا، ئاسۆیەکی نوێی لەبەردەمیدا کردەوە. بە جدی لە ڕاهێنانەکاندا بەشدار دەبوو، هەوڵی دەدا بۆ ناسینی قووڵتری بزوتنەوە و فەلسەفەی ئاپۆیی و تێدەکۆشا ئەوەی فێری بووە لە ژیانی کردەوەییدا جێبەجێ بکات. لەگەڵ گۆڕانی کەسایەتیی خۆیدا، هەمیشە گرنگی بە گەشە و پێشکەوتنی هاوڕێکانی دەدا. پەیوەندیی هاوڕێیەتی، هاوبەشی و ژیانی کۆمیناڵ کاریگەرییەکی قووڵیان لەسەر دانا و لە ماوەیەکی کەمدا شاخ بوو بە ماڵی نوێی بۆی.

فەلسەفەی ئازادیی ژن لە گەڕانە فکرییەکانی ئەڤیندا شوێنێکی تایبەتی هەبوو. بە پێداچوونەوە بەو ڕۆڵانەی سیستەمی پیاوسالار بۆ ژنی دیاری کردبوون، کاریگەرییەکانی ئەم بیرکردنەوەیەی لەسەر ژنان و کۆمەڵگە شی دەکردەوە و هەوڵی دەدا خۆی لە کاریگەرییەکانی ڕزگار بکات. بۆ ئەو، ئازادیی ژن تەنها بیرۆکەیەک نەبوو، بەڵکو ڕاستییەک بوو کە دەبوو لە کەسایەتی، ویست و پەیوەندییە مرۆییەکاندا دەربکەوێت. بۆیە هەوڵی دەدا داواکارییەکانی ناسنامەی یەژا ستار بە دروستی جێبەجێ بکات و لە ڕێکخستن و پێشبردنی سوپای ژناندا ڕۆڵێکی چالاک بگێڕێت.

دوای تەواوکردنی سەرکەوتووانەی ڕاهێنانەکان، ئەڤین پەیوەندی بە چاڵاکییەکانی ناوچەی خواکورکەوە کرد. کەسایەتیی پێشەنگ و بەرپرسیاری ئەو زوو لەنێو هاوڕێکانیدا ناسرا. هەر بەرپرسیارییەکی بە وردی و هەستیارییەوە وەردەگرت و بوێری و فیداکاری لە ڕەفتاری خۆیدا دەردەخست. ڕاستگۆیی، دڵسۆزی و ڕۆحی هاوبەشی لە تایبەتمەندییە دیارەکانی کەسایەتیی ئەو بوون. ئەڤین لە ژیانی گەریلاییدا مانای ڕاستەقینەی هاوڕێیەتی لە ڕەفتاری خۆیدا دەردەخست و بە پەیوەندییە دڵسۆزانەکانی، سەرچاوەی هاندان و ورەبەخشین بوو بۆ دەوروبەری. ئەو نموونەیەک بوو لە گەریلا ژنەکانی یەژا ستار کە باوەڕ و کرداری کردبووە یەک و ڕەنگدانەوەی ئامانجی کە ئازادی بوو، لە ژیانیدا دەبینرا.

هەڤاڵمان ئەڤین فیراز، لە ناوچەی شەهیدان و لە سنووری خواکورک، پەیوەندی بە کاروانی شەهیدانەوە کرد. دوای ساڵانێک هەوڵدان و فیداکاری لە ڕێگای ئازادیی گەلەکەیدا، ژیانی خۆی لە ڕێگایەکدا کۆتایی پێ هێنا کە بە ئاگاییەوە هەڵیبژاردبوو. شەهیدبوونی خەمێکی قووڵی لە دڵی هاوڕێکانیدا دانا، بەڵام لە هەمان کاتدا هۆشیاریی ئەوانی سەبارەت بە پێویستیی بەردەوامبوون لە تێکۆشان قووڵتر و ویستیان بۆ پێشبردنی ئامانجی ئازادی پتەوتر کرد.

هەڤاڵ ئەڤین لە نێوماندا نەما، بەڵام هەڵبژاردن و ئامانجەکەی بەردەوام زیندوون. ئەو کچی ماکۆ بوو؛ لە خاکێکەوە سەری هەڵدا کە خەڵکە نیشتمانپەروەرەکەی خۆشەویستیی ناسنامە و خاکی خۆیان لە نەوەیەکەوە بۆ نەوەیەکی تر زیندوو ڕاگرتووە. ئەڤین ئەم پەیوەندییەی کردە ویستێک بۆ تێکۆشان و دروستکردنی ژیانێکی ئازاد. بیرەوەریی ئەو، بیرەوەریی ژنێکە کە نەیویست کەسانی تر چارەنووسی دیاری بکەن و بە ویستی خۆی ڕێگای ئازادیی هەڵبژارد. یادەوەرییەکەی لە شاخەکانی کوردستان و لە دڵی ژنە گەریلاکاندا، کە بۆ ئازادی تێکۆشان دەکەن، هەمیشە زیندوو دەمێنێتەوە.

بە ڕێز و هاوسۆزییەکی قووڵەوە، شەهیدبوونی هەڤاڵمان ئەڤین فیراز (سەکینە ڕەشیدی) بە بنەماڵەی ڕەشیدی، خەڵکی نیشتمانپەروەری ماکۆ و هەموو خەڵکی کوردستان سەرەخۆشی لێ دەکەین. یاد و بیرەوەریی بەڕز بێت و ڕێگای ئازادیخوازانەی هەروا بەردەوام بێت.