هەڤاڵ نەبەز

شەهید نەبەز لە تەمەنی منداڵیدا و هاوکات لەگەڵ خوێندنی لە ناوچەی هەورامان، ڕووبەڕووی قەدەغەکردنی زمانی دایک و ئازاری جیاکاری بووەوە؛ ئەم ئەزموونە لە جیاتی ئەوەی گۆشەگیری بکات، پاڵی پێوە نا بۆ ناسینەوە و تێگەیشتنی قووڵتر لە ناسنامەی خۆی. ئەو لە پاڵ خوێندندا، لە دابینکردنی بژێویی ژیاندا هەمیشە پشتیوان و یارمەتیدەری خێزانەکەی بوو.

بە بینینی ئازار و مەینەتییەکانی گەلی کورد و لە دوای دەستپێکردنی هێرشە دڕندانەکانی گرووپی تیرۆریستیی داعش بۆ سەر ناوچەکانی ڕۆژاوا و شەنگال، هەستی بەرپرسیارێتیی قووڵ و ڕۆحیەتی فیداکارانەی وای لێکرد کە لە ساڵی ٢٠١٤دا، ڕوو لە کوێستانەکانی کوردستان بکات و بۆ هێنانەدی پاشەڕۆژێکی ڕووناک و ئازاد بۆ گەلی کورد، پەیوەست بێت بە ڕیزەکانی تێکۆشانەوە.

هەورامان وەک خاکێکی سەرکەش مۆری خۆی لە مێژوو داوە؛ تەنانەت ئاشوورییەکان لە کاتی هێرشەکانیاندا تا بناری لووتکە بەرزەکانی هەورامان هەرچییەکیان ببینیبا وێرانیان دەکرد، بەڵام کێلەبەردی ته‌نگی‌وه‌ر کە یادگاری ئەو سەردەمەیە، گوزارشت لە دەستپێڕانەگەیشتنی دوژمن بەم خاکە دەکات. ئەمە وڵاتێکە کە هەمیشە لەسەر زمان و کولتووری خۆی پێداگریی کردووە و کردوویەتی بە هێمایەک بۆ ناسنامەخوازی. لە سەردەمی هاوچەرخیشدا، لە پاڵ بەشداربوون لە خەبات و پێشکەشکردنی چەندین شەهید لە پێناو ئازادیی کوردستاندا، ناوچەی ژاوەرۆ کە زێدی لەدایکبوونی شەهید نەبەزە، هەمیشە داڵدەیەک بۆ تێکۆشەران و قەڵایەکی نەبەز بووە دژ بە دوژمن. بزووتنەوەی ئاپۆیی پێش هەر شتێک لەم ناوچەیەدا لە ڕووی فیکرییەوە کاریگەریی دانا، بە جۆرێک هەر لە سەرەتاوە تێکۆشەران پەیوەست بوون بە ڕیزەکانی بزووتنەوەکەوە و شەهیدیان پێشکەش کرد. شەهید نەبەزیش کەوتە ژێر کاریگەریی ئەم بزووتنەوەیە و چوو بۆ ناو ڕیزەکانی گەریلا.

ئەو لە ماوەی ئامادەبوون و چالاکیی خۆیدا لە ناوچە شاخاوییەکاندا (لە قەندیلەوە تا گارە)، لە پاڵ نیشاندانی ئازایەتی لە مەیداندا، وەک هەڤاڵێکی خاکی، دڵسۆز و فیداکار دەناسرایەوە کە هەمیشە قورسترین ئەرکەکانی دەگرتە ئەستۆ. ئەو بە سەبر و دڵسۆزییەوە، زانیاری و ئەزموونەکانی خۆی دەگواستەوە بۆ ئەو هاوسەنگەرانەی کە تازە دەهاتنە ناو ڕیزەکانی خەباتەوە، بەم شێوەیەش دەبووە مایەی هاندانی ورە و ئیرادەیەکی پتەو لە ناو کۆمەڵدا.

سەرەنجام، ئەم هاوسەنگەر و هەڤاڵە فیداکار و گیانبازە، لە ڕێکەوتی ٤ی نیسانی ساڵی ٢٠١٩دا لە ئەنجامی هێرشەکانی دەوڵەتی تورکیادا، گەیشتە کاروانی شەهیدان. شەهید «نەبەز» تەواوی بوونی خۆی فیدای ئامانجی ئازادی کرد و ئێستاش ناو، یاد و یادەوەریی ئەو بۆ هەمیشە لە ناو دڵی گەریلا و چیا و لە ناخی گەلی نیشتمانپەروەری کوردستاندا بە زیندوویی و نەمری دەمێنێتەوە.