ژمارەی 36هەمینی گۆڤاری ئاڵتەرناتیو لەساڵی چواردەیەم، خولی سێیەم ئۆرگانی فەرمی پەژاک چاپ و بڵاوكرایەوە. لەم ژمارەیەی گۆڤاری ئاڵتەرناتیودا خوێندنەوەیەكی واقعبینانە بۆ مەراسیمەكانی جەژنی نەورۆزی سەری ساڵی كوردی كراوە؛ بەهۆی ئەو گەرم و گوڕیەی گەلەكەمان لە نەورۆزی ئەمساڵ و جەژنی نەورۆز لەو ئاستە بەرفراوانە و لە هەمووی گرنگتر بەڕێوەبردنی مەراسیمەكانی پیرۆزبایی بەشێوەیەكی دیموكراتیانە و ئازادانە و لەبەرچاوگرتنی رۆحی پێكەوەیی گەلان بە بەردەوامی شۆڕشی ژن ژیان ئازادی بەناوكراوە و لە هەمانكاتدا گەلەكەمان لە رۆژهەڵاتی كوردستان بە رۆحیەتی خاوەنداریەتی لە پەیامە مێژوویەكەی رێبەر ئاپۆ بەو جۆش و خرۆشەی نیشانیان دا وەڵامێكی ئەرێنیان بە پەیامەكەی رێبەر ئاپۆ دایەوە.
ئاڵتەرناتیو گرنگی بەشداری گەلەكەمان لە رۆژهەڵاتی كوردستان و ئێرانی بەرز نرخاند و ستایشی هەڵوێستی نەتەوەیی و دیموكراتی گەلی كورد و گەلانی ئێرانی كردووە.
لە بەشێكی تری گۆڤاری ئاڵتەرناتیودا ئاماژە بە كێشە نێوخۆیەكانی ئێران بە تایبەتی پرسی كرێكاران و بێ كاری و هەڵاوسانی ئابووری كراوە و ئاماژە بەوە كراوە كە چارەسەركرانی ئەو كێشانە بە گۆڕانكاری نێوخۆیی لە سیستەمی سیاسی-ئیداری-هزری رژێم و كۆمەڵگە پێكدێت.
لەم ژمارەیەی ئاڵتەرناتیودا ئاماژە بە رەوشی سیاسی و دانوستانەكانی نێوان ئەمریكا و ئێران كراوە و هۆشیاری ئەوە دەدرێت لە ئەگەری رێكەوتنی ئەو دوو دەوڵەتە زەخت و گوشارە نێوخۆیەكان لەسەر كۆمەڵگە زیاتر ببێت و تەنانەت مەترسیەكان لەسەر بزوتنەوە كوردیەكانیش بەرفراوانتربێت، بۆیە لە چوارچێوەی رێنماییەكانی رێبەر ئاپۆ بەستنی كۆنگرەی نەتەوەیی لەم قۆناغە هەستیارەدا كە رۆژهەڵاتی ناوین و جیهان بەر بە دیزاینكردنێكی نوێ دەچێت بە ئەركێكی هەنووكەیی و نەتەوەیی بینراوە.
گۆڤاری ئاڵتەرناتیو ئەم ژمارەیەی خۆی پێشكەشی رۆحی بەرز و پیرۆزی هەڤاڵی شەهید باران زیلان دەكات.
خوێنەرانی هێژا و خۆشەویست دەتوانن بۆ وەرگرتنی فایلی نوێی ژمارەی 36گۆڤاری ئاڵتەرناتیو سەردانی ماڵپەڕی پارتی ژیانی ئازادی كوردستان “پەژاك” PJAK.NET بكەن.