بێستۊن موختاری
گەل ئازادیخواز ئێران ماوەی چوار ساڵە کە وەل تەمام هاز خوەیان، لە وەرایوەر زوڵم حاکم هەڵسیانەو سەرهەڵدان کەن.
ئەی گەلە هەزینەی ئازادی، وەل خوێن خوەیان و وەل خوێن مناڵەیلێیان مامەڵە کردنە. شووڕش ژن، ژیان، ئازادی کە چوار ساڵ وەرجە ئیسە وەلای گەل ئازادیخواز ئێران دژ وە نزام ئرتجاعی کومار ئسڵامی دەس وە پێ کرد تەواو سنورەیل تەبەقاتی، ملی، ئەتنیکی، سیاسی و حزبی تێپەڕ کرد و گشتیان شکانە یەکەو. چونکە وە سەر ئەساس ئاشکاراترین چاڵش قەرن یانێ ئازادی ژنەیل ساز کریایۊ. ئازادی ژن، ئازادی جڤاکە؛ وە ئەی ئستراتژی‌یە دروشم هاوبەش گەل وە تەواو جوغرافیای ئێران کرده: “ژن، ژیان، ئازادی”
کۆمەڵگایگ کە وە ناوێ ژن مافەیل هاوبەش نەیاشتۊد، هەر وە دمۆکراسی ناڕەسێ. تێکۆشانێگ کە ژنەیل وە ناوێ پێشەنگ نەون، وە دڵنیاییەوە وە ئازادی تەواو ناود؛ لە سەر ئەی ئەساسە ژن، ژیان، ئازادی؛ بۊیە ئاڵا، بۊیە پارادایم و بۊیە دروشم هاوبەش ئازادی گشتی کۆمەڵگای ئێران.
شووڕش مودڕن و ئامانج‌دار گەلەیل ئازادیخواز ئێران، نە تەنیا بنەوای ڕژیم ئستبدادی و زاڵم کومار ئسڵامی لەرزان، بەڵکوو شوکێگ بی ئەڕا تەواو گەلەیل ئەی جەهان هەستی‌یە!
تەواو پارتەیل تەبەقاتی‌محوەر و ناسیۆناڵیست‌محوەریش لە ناو تووفان خاک و خۆڵ هێزگردۊ وە تێکۆشان ژنەیل، گومەو بۊن. گەلەیل ئێران و شووڕشە تازەگەیان وە محوەریەت ئازادی ژنەیل نیشان دا کە تئوریەیل قەرنەیل وەرین ئەڕا ئازادیەیل تەبەقاتی و ئازادی نەتەوەیی، دی کۆنەو ئکسپایر بۊنە. ئەو دەمە کە ئازادی ژنەیل وە سەروتارەو نەود، ژیاین و ئازادی کۆمەڵایەتیش ساز ناکریەد.
دی ئەڕا گشت ئاشکەرا بۊیە کە ماهییەت ڕژیم ئێران، ماهییەتێگ ئستبدادی، وەحشیانە و گەندەڵە. کۆمەڵگا و تەواو نیک‌‌ئەندیشەیل جەهان وە ماهییەت ئەی نزامە ئاگادار بینە. ئەگەر ئیسەڕووژ تماشایگ چ لە ناو ڕووژهەڵات ناوڕاس و چە وە تەواو جەهان بکەیم، گشت مرۆڤەیل، گەلەیل جیاواز و تەنانەت نەتەوەیل تر جەهان، نە تەنیا گەلەیل ئێران، بەڵکوو تەواو گەلەیل جەهان، تەنانەت گەلەیل ئازاد و دموکراتیک‌خواز ترەک خەریک بەرز کردن دەنگ دروشم دژ وە ڕژیم کۆنەپەرەست و دیکتاتور کومار ئسڵامی و نیشان داین هەڵوێستەیل خوەیانن. ئیسە گشت دێرن ماهییەت ڕژیم حاکم وە ئێران مەحکووم و شەرمەزار کەن. یە یانێ سیستمێگ کە دژ وە ژن بوود، دژ وە ژیاین و دژ وە ئازادی‌یە. لە سەر ئەی ئەساسە ئمڕۆژە، گەلەیل وەی ڕاسی و حەقیقەتە ڕەسینە و نماد و سەمبوڵ سەرکەفتن خوەیان دیاری کردنەو ئۊشن: ژن، ژیان، ئازادی….
ئەڕای چە؟ چونکە زانن سیستم حاکم دژ وە ژنە! پەس وەی هوکارە ئۊشن، ژن.
وە سەر ئەی ئەسڵ ئەساسیە بایە وە مافەیل، هۆویەت و بۊن ژنەیل پاراستن بکریەید و وەل ڕاسی واتایی‌یەگەی موبارزە بکەن. هوکار ژن و ژیان یەسە کە سیستم و مەڵایەل هۊچ واتا و هیوایگ ئەڕا ژیاین گەل نەیشتنە. گەلێگ کە نان، کار و ژیانێگ شرافەت‌مەندانە داشتنە، لە حەقیقەت فەلسەفی، ئیسە نان نەیرن، ماڵ نەیرن و ژیان ئەڕایان نەمەندێیە. ئەوانە خوازیار ئازادی و ژیان یەکسانن، وەڵام حکوومەتێگ کە ئەساس و بنەواگانێ دژ وە ئازادی‌یە، هۊچ‌جوورە دموکراسی قەبوول ناکەید و لە سەر ئەساس کوێلەیی و ئەسیری گەل حکوومەت خوەی وەڕێ‌وە بەید. وە سەر ئەی زوڵمەیلەسە کە گەل ئەڕا خوەیان سەمبوڵێگ پەیا کردنەو وە گیان و دڵ هۊشن: ژن، ژیان ئازادی و یە ڕەمزێگە ئەڕا بەرخوەدان و ئەڕا سەرکەفتن.
بێ‌گومان ئەی مژارە فرەفرە وە نرخەو بایە ئەڕای ئەرزش فرەیگ قائڵ بۊمن، وە یە جوورێگە کە لە نوقتەی وەرایوەرێ، ڕژیم و نەوکەرەگانێ، ئەوانەی کە ئستعمارگەرن لە ڕۆژەڤ ئیسەو وەتایوەت لە دۊای شەڕ دوانزە ڕووژە، هەر حەرکەت دمۆکراتیکێگ کە بکریەی دژ وە ئستڵاح ئەمنییەت ملی و تەجزیە‌تەڵەبی و سێخۆڕی زانێ. نەوکەرەیل وەفادار ڕژیمیش هەم دوارە ئەکتیڤ و زێنە بۊنەسەو و بەرپرسایەتیەیل گرێنگ گردنەسە دەسەو. هەر ئەی هوکاریشە بۊەیەسە بایس بۊن گەندەڵی و نەیۊن شەفافیەت فەراگیر، کە بنەوایەیل وجوودی ڕژیم تا بن سوقانەیلێ فاسد کردێیه. دی وە دۊای شەڕ وەل ئسرائیل، نزام وڵایی و سپاهی وە هەر کەسێگ متمانە ناکەید، ئەیەیش بایس گۊڕی‌یاین لە نەهادەیل ئەمنییەتی و دەوڵەتی بۊیە. تەنانەت وە فرە جایش چەکۆمڕەیل زووانی بەرپرسەیل ڕژیم دۊنیمن کە وە ڕاسی شەڕێگە زەرگەری و نەبایەد گەل باوڕ وە پێ‌یان بکەید.
فرەیگ وە گۊڕاننەگان وەی ماوە لە ناو بەدەنەی ساختار وەڕێوەبەری ئیجاد کریاس. سیاسەتەیل ناوخۆ و دەرەوە گشتێ لە ڕاستای جێ‌وە‌جێ کردن سناریۆەگان سەرکۆت و خەفەقان ورەو نووا چێ. دەوڵەت شاراوە یا موازی نزامیش ئامادەس کە درێژە وە سیاسەتەیل یکدەس‌سازی بێیەید و یە واتای فرەوە کردن سەرکۆت و ورسێ‌گەری و کوێلەتر کردن گەلەیلە.
لە سەر ئەی ئەساسە جومشت کۆمەڵایەتی و نافەرمانی مەدەنی و جەوهەری لە ئێران کە مافێگ دمۆکراتیکە نەبایە بکەفدە ناو شەپوڵ شەڕ و بوحران لە لایەن سیستم و هازەیل شەڕخواز خارجی، چونکە فرەتر سەرکوت کریەن و مومکنیشە وەرەو شکیاین بچن. ڕێوبان ئەی مژاریشە یەسە کە ڕێخستنەیل مەدەنی فرەترەو بوود و دەس وە ناو دەس یەک، بچن ئەڕا شکانن فاشیسم و ئاخر گورز بووەشێنن!
لە ناو بەش ڕۊداوەیل خارجیش هەر ئەو جوورە کە زانیمن، سیاسەتیل خارجی و هەروەها پەیوەندیەیل ناودەوڵەتی نزام کومار ئسڵامی لە دوای شکیاین تەواو باڵەیل نیابەتی و شکیاین و بێ‌دەسەڵاتی خوەیان وە ناو شەڕ دوانزە ڕۆژە ڕەسیمنە ئەی نەتیجە کە پەیوەندیەیل مەقتەعی فرەتر وەل ڕووسیە و چین تەنیا ئەڕای فرەتر کردن تەمەن خوەیانەو هۊچ کەڵگ و نرخێگ ئەڕا گەل و درێژەی ژیاین گەل نەیرێ.
ڕژیم حاکم وە ئێران وە ناوخۆییش وەل بڕێگ جەریان‌سازی نێوان گرووهەیل توندڕەو و میانەڕەو، هەوڵێ یەسە کە فکرەیل عەوام خەریک بکەید و فکرەیلیان وە نووڕستن قۊل سیاسەت و درێژەی شووڕش ژن، ژیان، ئازادی وە لاڕێ بخەی. یە نە فەکتێگ، بەڵکوو جوورێگ موهەندسی کردن شەڕ و سەرکۆت دژ وە کۆمەڵگا و دژ وە نەتەوەگانە.
لە دۊای شەڕ دوانزە ڕووژە، ئوو زەربەیلێگ ئنسانی و سەخت و نەرم‌ئەفزاری کە ڕژیم خوارد، تەنانەت وە ناو پەیوەندیەگان خارجیشێ جۊر وەتۆوێژ وەل ئامریکا و ئرووپا هۊچ شەفافیەتێگ وە قباڵ کۆمەڵگا نەیرێ. ڕاسی‌یەگان وە مەردوم شارێدەو و ئەڕا بۊن و مەندن خوەیان گەوراترین فشەگان کەن. پەیوەندییەگان وەل ڕووسیە وەکوو جاران نییەو ئەساس بەرژەوەندییەیل کوڵ و کوڵ‌بڕ و سیاسەتێگ قۆناغیە. چونکە نەزم نوێنێگ کە وە ڕۆژهەڵات ناوڕاس شکڵ گردێیە، فرەترین هەڕەشەگانێ دژ وە ئێران و نزامە حاکمەگەیە. شانتاژەیلێگ کە ڕژیم لە دوای شەڕ وەل ئسرائیل کەید، یانەسە کە گەلەیل جوغرافیای ئێران هانە پشت نزام و خیاوان و جومشت ئنقڵابی ژن، ژیان، ئازادی سەرکۆت کریاس؛ ئامانج ئەیانە گشتێ ئەڕا شەڕ ڕەوانی و دۊر خستن مەردوم وە درێژەی شووڕشە. شەڕێگ ڕەوانی دژ وە کۆمەڵگای مەدەنی. وەڵام زێنە بۊن کۆمەڵگا، ڕووژ ئمڕووژ وە زێنە بۊن جومشت کۆمەڵایەتی وە نڕخ بەستگی دێرێ. بایە گشت تاک وە تاک گەلەیل و ڕێخستنەگان، قەیر جومشت خوەیان کە ئمڕووژ ها ناو قوناغ گۊڕیاین زهن و فکر و کەلتوور، بزانن. ئەی جومشت کۆمەڵایەتیە وە ڕاسی هەر ئەو ئنقڵاب تەدریجی و دمۆکراتیک گەلەیل ئێران و ڕووژهەڵات کوردستانەسە و درێژەی سەرهەڵدانەگان خیاوانە. ئەی شانتاژەیلە کە سەرکۆت کامڵ وە دەس گرتن گشت چشتێگ وە لایەن ڕژیم گەندەڵە، درو و دەلەسەیگ کامڵە. چونکە زانیمن تەواو چالاکیەیل مەدەنی کونترول ناکریەن و لەناو ئەی سەردەمە، ڕژیم ها ناو بێ‌دەسەڵات‌ترین و هەژارترین دەم خوەی. ئەڕا وێنەیش تووانیم ئاماژە وە باس حجاب ئجباری بکەیم کە دی هەستەی شاری ئازادیخواز کردنەسەی نافەرمانێگ مەدەنی و نە شاراوە بەڵکوو ئاشکارا نیشانی دەن.
ڕاسەگەی یەسە کە کۆمەڵگای مەدەنی ناڕازی و گوڕان‌خواز ئێران هانە ناو قوناغێگ کە بایە هەڵوژێرن و هەنگاوەیلێگ گرێنگتر هەڵ‌بگرن.
حاڵ و هەوای ڕووژ ئمڕووژ یە وە پێمان نیشان دەی کە گەوراترین ئپۆزۆسیۆن، ڕێخستنەیل کۆمەڵایەتین و بایەد مەیلێیان وەرەو ڕێخستن فرەتر و وەهازتر بوود، ئەی ئپۆزۆسیۆن خۆبونیاد جومشت کۆمەڵایەتی، موتور وە ڕێ خستن تەواو ئپۆزۆسیۆنەیل دەیشت وڵاتیش هەس. وە سەر ئەی ئەساسە کۆمەڵگای ئازادیخواز ئێران خاس زانێ کە تەنیا ڕێ ئەڕا سەرکەفتن، زێنە بۊن ڕێخستنەیل مەدەنی و وەهاز کردنێیان وەل یەکیەتی سەراسەری‌یەو یە تەنیا ڕێگای سەرکەفتنیانە.
تەواو کاروبارەیل کە ڕژیم ئەڕا وە لاڕێ بردن جومشت، چ وە ناو وڵات و چ وە دەرەوەی وڵات وە کار بەی، دژێگ نییە کە بتوانێ وە بانان وەرگری وە سەرهەڵدان گەلەیل ئازادیخواز بکەی، بەڵکوو مەجاڵێگە ئەڕا درێژە داین وە ئنقڵاب وە چوارچوویێگ گەوراتر. چونکە ڕاستە کە وەی دەمە سەرهەڵدانەگان خیاوانی کەمەو بۊیە، وەڵام وە ئەبعاد ترەک، وە قوناغێگ ترەک وە جوور ئعترازەیل مەدەنی دمۆکراتیک وە دەس ژنەیل، مامووسایەیل، بازنشەستەیل و بەندکراوەیل سیاسی درێژە دێرێ. تەحەوڵێگ زهنیەتی و کەلتووری لە گشت جوغرافیای ئێران ڕێ ئنقڵابێگ وەل بیر و باوەڕ و ئەندیشە لە چوارچوو پارادایمێگ وە ناو ژن، ژیان، ئازادی دەس وە پێ کردێیه و باوەڕێگ بەرگەشت‌ناپەزیرە.
شووڕش ژن، ژیان، ئازادی وەی ماوە سەڵماندە پێمان کە گەلەیل هەردەم کە بتووان و ئرادە بکەن، تووانن تەواو مەشرووعیەتەیل وە سیستم بگرنەو، تەنانەت هاز و زوور نزامی‌گەری.
وەل گشت ئەی شی‌کردنەوەیل و نەزەرەیلە بایە بزانیمن کە پرۆسەی ئاشتی و سوڵحێگ کە خۆڵقێنەر پارادایم ژن، ژیان، ئازادی [ڕێبەرئاپـــــۆ] ئرائە داس ئەڕا ڕەسین وە ژیانێگ ئازاد تەواو سنورەیل ئێرانیش وەر گردێیەو گشت گەلەیل هاوڕێ وەل گەل ئازادیخواز کورد لە ڕۆژهەڵات کوردستان، تێکۆشانێیان ئەڕا پروسەی ئازادی وە ئێرانیش وەروەڵاو بکەن.