ئارام کەریم
هێرشەكانی ئیسرائیل دەرئەنجامی سیاسەتەكانی رژێمی ئێرانە!
رژێمی ئێران لەبری ئەوەی لەگەڵ نوێنەرانی راستەقینەی كۆمەڵگە دانوستان بكات، پەنا بۆ هێزە هەرێمی و نێودەوڵەتیەكان دەبات، كەچی كاتێك كەسێكیش دەستبەسەر دەكەن تاوانی پەیوەندی گرتن بە هێزە نەیارەكانەوە دەداتە پاڵ و بەو پێوەر و پێوانانەی لەسەرووی ئیرادەی گەلەوە دایڕشتووە، كەسەكە سزا دەدەن و لەزۆربەی دۆسیەكاندا، ئەوكەسەی بەو تاوانانە دادگایی بكرێن، یا لەسێدارەیان دەدەن یا تا هەتاهەتایە لەكونجی بەندیخانەی دەكەن و دەیڕزێنن. ئەمە لەسەر ئاستی پرسە گشتیەكان لەبابەتی پرسە تایبەت و نەتەوەییەكان هەمیشە هەوڵدەدات چینێكی مشەخۆر و ئەڵقەلەگوێ دامەزرێنێت و ئەوان بەنوێنەری گەل و كۆمەڵگە نەتەوەیی و چاندیەكان نیشان بدات. بەتایبەتی لەپرسی كورددا لەم ماوەیەدا بەهۆی ئەو سیاسەتە شكست خواردویەی لەماوەی شەڕی نێوخۆی سوریا گرتیەبەر و هاوشانی لەگەڵ دەوڵەتی تورك و روسیا بوو بەهۆكار بۆ ئەوەی بەدەستەباڵ لەهاوكێشەكە بیكەنە دەرەوە. لەپرسی حەماس و حیزبوڵڵا و حوسیەكانیشدا و تەنانەت هێزە نێوخۆییەكانی عێراق سیاسەتێكی دروست و ستراتیژی بەڕێوە نەبرد، بۆیە لەسیاسەتی دەرەوەی خۆیدا شكستێكی بەرچاو تووشی بوو. بەتایبەتی لەنزیكبوونەوەی بۆ پرسی كورد و عەلەوی و دروزی و … لەسوریا رژێمی ئێران نەیتوانی سیاسەتێكی راست و بەگوێرەی رئالیتەی جوگرافی، سیاسی، كەلتوری، ئەتنیكی پیادە بكات، بۆیە بەئاسانی دەوڵەتی تورك و هێزە هەرێمی و نێودەوڵەتیەكان لەهاوسەنگیەكانی سوریا خستیانە دەرەوە. هەمان نزیكبوونەوەشی لەبەرامبەر بەحەماس و حوسیەكان و ئەمڕۆشی لەگەڵدا بێت لەبەرامبەر بە گروپە نیابەتیەكانی عێراق پەیڕەوی دەكات، دوور نییە ئەوانیش لەداهاتوویەكی نزیكدا بەهۆی بەرژەوەندیە نێوخۆیەكانی دەوڵەت و دەسەڵاتی ناوەندی وڵاتەكەیانەوە پشت لەئێران و رژێمەكەی بكەن. لەگرتنەبەری سیاسەتێكی هاوشێوە ئێران زێدە لەخۆی پشتی بەدەوڵەتی تورك و هێزە نێودەوڵەتیەكان بەست، ئەوەش هۆكاری سەرەكی دۆڕاندنی ئێران و خستنە دەرەوەی لەهاوسەنگیەكانی ناوچەكەو زیاتر سەپاندنی گەمارۆكان بوو لەسەر دەوڵەت و كۆمەڵگەی ئێران، لەلایەكی تر شۆڕشی ژن، ژیان، ئازادی دەرفەتێكی زێرین بوو بۆ ئەوەی رژێم و دەوڵەت و دەسەڵاتی ئێران بۆ خۆیان بەدەرەتانێك هەڵیانسەنگاندبا، بەڵام لەبەر ئەوەی خوێندنەوەی تەسك بینانەیان بۆ هاوكێشە جیهانی و هەرێمیەكان و وزەی نێوخۆی گەل و كۆمەڵگەی ئێران؛ نەتوانرا ئەو هەلە بۆ رزگاری خۆیان و بونیادنانی سیستەمێكی دیموكراسی سودی لێ ببینن. بەتایبەتی بەهۆی ئەو هەڵوێستانەی رژێم لەبەرامبەر بە ژنان و گەنجان و سیاسەتی زەخت و گوشاری لەرادەبەدەری دام و دەزگا سەركوتكەر و چەوسێنەرەكانی رۆژبەرۆژ درزی نێوان گەل و كۆمەڵگە و دەوڵەت زیاتر بوو. ئەوەش هۆكارێكی تری سیاسەتی چەوتی نێوخۆیی رژێم بوو لەبەرامبەر بەڕاستینەی كۆمەڵایەتی گەلان و كۆمەڵگەی ئێران. گرتن و لەسێدارەدان، برینداركردن، زیندان و سەپاندنی سزای قورسی ماددی لەبەرامبەر بە راپەڕینی گەنجان و ژنان وای كردوە كە تووڕەیی گەنجان و ژنان و چین و توێژەكانی كۆمەڵگە زیاتر پەنگ بخواتەوە و لەدەرفەت دەگەڕێن بۆ ئەوەی جارێكی تر بریسكەی ئاگری شۆڕش بگەشێننەوە و بەگوڕ و تینێكی گەورەتر بەڕووی رژێم و دام و دەزگا سەركوتكارەكانیدا بتەقێنەوە. هەرچەندە شۆڕشی ژن، ژیان، ئازادی لەقۆناخی یەكەمیدا بێدەنگی چەندین دەیەی شكاندوە و چاند و كەلتورێكی بەرخۆدان و یەكگرتن و هاودەنگی و پێكەوەیی پێكەوە ناوە و رەوایەتی رژێم و دامەزراوەكانی بەتەواوەتی خستە ژێر پرسیارەوە. بەڵام بەهۆی دەستێوەردانی دەرەكی، بێ بەرنامەیی نێوخۆیی هێزولایەنە سیاسیەكان و دامەزراوەكانی كۆمەڵگەی مەدەنی و پارچەپارچەبوونی هەڵوێست و بەرنامە و ستراتیژی تێكۆشان و رووبەڕووبوونەوەی گەل بەئاگر و ئاسن، شۆڕش لەقۆناخی یەكەمیدا بەتەواوی نەیتوانی ئامانجەكانی خۆی بپێكێت. بەڵام ئەوەش بەو واتایە نایەت كەشۆڕش بەتەواوەتی خنكێندراوە، چونكە تەنیا بەرخۆدانی زیندانیان و بەتایبەتی زیندانیانی ژن لەزیندانەكانی رژێمدا گەورەترین بەرخۆدان و خۆڕاگری و نوێنەرایەتی هەموو گەل و كۆمەڵگە و چینەكانی شۆڕش دەكەن و بەدەستی خاڵی لەزینداندا بە ئیرادەی پۆڵایین و خۆنەویستانەیان رژێمیان بەچۆكدا هێناوە و ئەوەش سەلێمنەری زیندوویەتی و بەهێزی ماتەوزەی شۆڕشە لەهەناو و ناخی تاك بەتاكی كۆمەڵگەدا و لەدەرفەتێك دەگەڕێ بۆ سەرهەڵدانەوە و هەستانەوە. ئەمەش واتا شەپۆلی دووەمی شۆڕشی ژن، ژیان، ئازادی و بەردەوام بوون لەسەر رەگ و رێچكەی بەرخۆدانی شەهیدانی شۆڕش.
دەسەڵاتداران خاوەن یەك زهنیەتن
هیچ گۆڕان و گۆڕانكاریەك بەبێ ئێش و ئازار پێكنایەت. نەخاسم ئەو گۆڕانكاریەش گۆڕانكاریەكی سیاسی، ستراتیژیك، هزری بێت، ئەوا ئێش و ژانی لەدایكبوونەوەیەكی نوێ دووقات زیاترە لەوەی كە گۆڕانكاریەكە لەئاستی تاكەكەس، یاخود تەنیا هەڵوێستێكی رووكەشانە و جووڵەی رۆژانەیی بێت. ئێستاش كە سیستەمی جیهانی لەقەیرانێكی قوڵی سیاسی، ئابوری، ئیداری، پاراستنی و هزریدایە، ئێش و ژانێكی زۆر دەكێشێ. ئەوانەشی پێشەنگایەتی ئەو سیستەمە هەژمونخوازیە دەكەن، ناچارن قبوڵی ئەو دەرد و رەنج و ئێش و ئازارە بگرن بۆ ئەوەی بتوانن نوێبوونەوەیەك بهێنە ئاراوە، بەڵام مەرج نییە ئەو نوێبوونەوە و گۆڕانكاریەش هەر هەموو پۆزەتیڤ و ئیجابی بێت و لەخزمەتی پێشكەوتن و بەرەوپێشبردنی كۆمەڵگە و رێچكە و پێوان و بەرزكردنەوەی پرەنسیپە كۆمەڵایەتی، مرۆڤیەكان بێت. بەتایبەتی كاتێك دەسەڵات بیەوێت گۆڕانكاریەك لەهەڵوێست و نزیكبوونەوەكانیدا بكات، سەر لەهەزار و یەك فێڵ و تەڵەكەبازی و هەڵخەڵەتاندن دەدات، بۆیە دەبێت بزانین هەر گۆڕانێك، پۆزەتیڤ نابێت. هەندێ جار نوێبوونەوە و گۆڕان پێچەوانە دەبنەوە و زیاتر دەكەونە خزمەتی هێزی دەسەڵات و هەژمونگەرایی و سیستەمی نكوڵیكار و قڕكەر و كۆیلەكردنی مرۆڤ و كۆمەڵگەوە. بۆیە دەبێت هەر نوێبوونەوەیەك پشت بەپاشخانی مێژوویی، كۆمەڵایەتی، چاندی كۆمەڵگەكان و گەلان ببەستێت.
زیهنیەتێكی دەسەڵاتداری لەلای هەموو دەسەڵاتداران بوونی هەیە كە باكیان بەهیچ نییە. بەدەر لەخۆیان و پاراستنی دەسەڵاتەكەیان رەچاوی هیچ پێوان و پرەنسیپێكی ئەخلاقی، ویژدانی، سیاسی، كۆمەڵایەتی، مرۆڤی ناكەن و هەر یەكەیان دەیانەوێت ئەوی بەرامبەر بەهەموو دەسەڵاتەكانیەوە بەهەموو شكۆ و كەرامەت و ئابڕو و شەرەف و ناموسییەوە تەسلیمی داوایەكانی بێت. دەسەڵاتدار چونكە خاوەن باگراوەندێكی لۆژیكی تەجاوزكار، دەستدرێژیكار، قۆرخكار، زوڵم و ستەم و چەوساندنەوە و كۆیلەكردن و تاڵان و تاڵانكاری و ئینكار و لەناوبردنە بەخۆی رەوا دەبینێت لەبەرامبەر هێزەكانی دیكە بەشێوەیەكی ملهوڕانە و چاوسورانە بوەستێتەوە. دوابەدوای ئەو هەموو ئەزموونە مێژووییە لە سەدام حسێن و بەشار و قەزافی و سیسی و هەنیە و نەسروڵڵا بگرە كەچی جارێكی تر دەیەوێت كوێركوێرانە بەرەنگاری دەسەڵاتی ناوەندی بێتەوە و پەرە بەتەمەن و دەسەڵات و پێگە نەریتیەكەی خۆی بدات. لەگەڵ ئەو هەموو چەقبەستوویی و قەوارەپارێزیەی رژێمی ئێران، زیهنیەتی دیكتاتۆرانەی لەگەڵ خۆیدا بونیادناوە و رووی لەبونیادگەرایی وشك كردوە. چاوەڕوانی هەرە زۆر لەڕژێمی ئێران چە لەنێوخۆ و چە لەدەرەوەش ئەوە بوو كە رژێم لەم هەموو ئەزموونە وانە وەربگرێت و بەسیاسەت و هەڵوێستە سەقەت و كۆنەپارێزیەكانیدا بچێتەوە و وڵات بەرەو شەڕێكی نەخوازراو پەلكێش نەكات. چون دەسەڵاتی ناوەندی پێداگرە لەسەر ئەوەی كە دەبێت رژێم بگۆڕدرێت. دەبوو رژێم پێش ئەوەی لەدەرەوە هێزی گۆڕان و گۆڕانكاری بەسەردا بسەپێنن، خۆی هەوڵی گۆڕینی بدابا؛ ئەم هێرشانەی ئێستاكەش لەسەر رژێم بەرێوە دەچێت بەئامانجی گۆڕینی، ئەوا جا گۆڕینی هەڵوێست وكردەوەكانی بێت، یا خود گۆڕینی رژێم و سیستەمە سیاسی و ئیداریەكەی.
چەواشەكاریەكانی رژێم لەم كاتە هەستیارەدا!!
چەواشەكاریەكانی رژێم هاوكات لەگەڵ هێرشەكانی ئیسرائیل بۆ سەر دامەزراوە سەربازی و ئەمنی، ئیستخباراتی و سەكۆكانی هەڵدانی مووشەك و كەسە پلەباڵاكانی رژێم، یەكسەر ناوەندەكانی شەڕی تایبەت دەستیان بەهۆنینەوەی درۆ و دەلەسە و بەلاڕێدابردنی راستیەكان و شاردنەوەی كەموكوڕی و لاوازییە ئەمنی ـ ئیستخباراتی، پاراستنیەكانی رژێم كرد كە بەساڵانە بەگەلی ئێرانی دەفرۆشنەوە و لەو چوارچێوەیەدا جارێكی تر دەستی داوەتە راوەدونان و رەشبگیری و گرتنی خەڵكی بێتاوان و تاوانباركردنیان بەوەی كە دەستەكەلا و سیخوڕی ئیسرائیلن و تەنیا لەماوەی هەفتەیەکدا زیاتر لە 500 كەسیان دەستگیر كردوە و ژمارەیەك لەزیندانیانی نێو زیندانەكان كە لەبەرامبەر بە زەخت و گوشارە سیاسییەكانی رژێم سەریان نەوی نەكردوە لەزیندانیەكانی تر جیاكردۆتەوە و بۆ شوێنی نادیار گواستوویانەتەوە و ئەوەش گوایە بەمەبەستی چاوترساندنی زیندانیانی تر ئەنجام داوە.
تۆڕەكانی ئینتەرنێتیان لەسەر هاوڵاتیان پچڕاندوە لەژێر ناوی پاراستن و رێگری لەهێرشی فڕۆكەسیخوڕی و شەڕكەرەكانی ئیسرائیل، بەڵام لەڕاستیدا بۆ ئەوەیە كە گەل نەتوانن بەئاسانی لەگەڵ یەكتردا لەپەیوەندیدا بن و بەو شێوەیە ئاستەنگیان لەبەرامبەر بەپەیوەندییە كۆمەڵایەتیەكانی گەل دروست كردوە و لەترسی ئەوەی گەل ئاستی زەرەر و زیان ئەو هێرشانەی ئیسرائیل بۆ ناوەندەكانی راگەیاندن و تۆڕە نێودەوڵەتیەكان نەگوازنەوە، كەچی رژێم بەهۆی ئەو زیهنیەتە كۆنە و بەرتەسكەی ناتوانێت، دەرك و هەست و نەستی كۆمەڵگەی نێودەوڵەتی و مافەكانی مرۆڤ بكات. ئەگەر بەڕاستی ئەو هێرشانەی ئیسرائیل بۆ سەر كۆمەڵگە و خەڵكی سڤیل بێت، ئەوا وا باشترە كە تۆڕەكانی ئینتەرنێتی نەپچڕاندبا و رێگەی بەبەكارهێنەرانی تۆڕەكانی ئینتەرنێت بدابا كەزەرەر و زیانەكانی گەل و كۆمەڵگە بۆ رای گشتی جیهانی و كۆمەڵگەی مرۆڤی بگوازنەوە. بەڵام دیارە هۆكارە سەرەكیەكە شتێكی ترە و هیچ پەویوەندیەكی بەهێرشەكانەوە و بابەتی پاراستنی نییە.
جارێكی تر رژێمی ئێران بەهۆی ترسی لەسەرهەڵدانەوەی گەل و بەتایبەتی لە ناوچە كوردستانیەكان هێزێكی زۆری ئاسایشی ـ ئیستخباراتی بڵاوە پێكردوە و كەشێكی میلیتاریستی و عەسكەرتاریەتی ئافراندوە، ئەو هێزانەی رژێم لەترسی هێرشەكان و شاردنەوەیان لەچاوی فڕۆكەشەڕكەر و سیخوریەكانی ئیسرائیل پەنایان بردۆتە بەر ناوەندە كۆمەڵایەتیەكان لەوانە” مزگەوت، خوێندنگەكان، پەرتووكخانە، سینەما و ماڵی خەڵك و لەوێدا خۆیان بەجێ كردوە و بەئاشكراش هەڕەشە لە گەل دەكەن. هەر لەو ناوچانە لەژێر ناوی ئۆپراسیۆنی پاراستنی سنورەكان و رێگری كردن و دزەكردن لەبازرگانانی چەك و تەقەمەنی و هەستی جیاخوازی ، بانگەشەی ئەوە دەكەن دەستیان بەسەر چەندین پارچە چەك و تەقەمەنی و گرتنی چەندین كەس داگرتووە.
هەر بەنیسبەت كوردانەوە لەم ماوەیەدا رژێم بۆ هەڵخەڵەتاندنی رای گشتی و شەقامی كوردی و كوردستانیان، پەنای بردە بەر پارێزگاری هەولێر”ئومێد خۆشناو” و سەرۆكی هەرێمی باشوری كوردستان”نێچیرڤان بارزانی” و بانگهێشتكردنی سەرۆك پارێزگاكان بۆ رۆژهەڵاتی كوردستان و ئێرانیان كرد، كەچی خودی ئەو رژێمە لەبەرامبەر بەكوردانی باكوری عێراق، زنجیرە فیلمی رەخنەی دروست كرد و هەولێری وەك ناوەندێكی سیخوری و ئیستخباراتی ئیسرائیلی بەناو كرد و تەنانەت بەوەش نەوەستا و ئەو شارەی دایە بەر مووشەك و چەندین باڵەخانەی خاپوور كرد و گیانی چەندین كەسیان لەو مووشەكبارانانە گرت. كەچی لەم ماوەیەدا جارێكی تر پەنایان بردەوە بەر دەرگای ئەو هێزانە”پەدەكە” و هەوڵیاندا وا پیشانی رای گشتی و كوردان بدەن كە ئەوان دان بەبوونی كوردان لەهەرێمەکەدا دەنێن. بەڵام لەو چوارچێوەیەشدا ئامادەنەبوون گوێ لەداواكاری و ویست و ئامانجەكانی هیچ كام لەحیزب و لایەنە سیاسیەكانی رۆژهەڵات و ئێران یاخود كەسایەتی و دامەزراوە مەدەنیەكانی ئەو بەشەی كوردستان بگرن، ئەمەش سیاسەتێكی دووفاقانە و چەواشەكارانەیە و تەنیا خزمەت بەئەجێندانی دەرەكی و بەتایبەتی هێزە نێودەوڵەتی و هەرێمیەكانی كرد.
هەر لەوچوارچێوەیەدا هەڕەشە لە گەل دەكەن، بەهیچ شێوەیەك دیمەن و دەنگ و نووسین لەسەر هێرشەكان و ئاستی زەرەر و زیانەكان و شوێن و جێگە و پێگەی بۆمبارانكراو و بریندار و كوژراوەكان نەگرن، تەنانەت نابێت دیمەنی تەڵقەتەنورەی هێزەكانی پاراستنی هەوایی بگرن و ئەوانە بەتاوان هەژماردەكرێن و سزای قورسی ئەو كەسانە دەدرێن كە دیمەن و دەنگ و نووسینی لەو بوارەدا بڵاو بكەنەوە و بەهاوكار و سیخوری ئیسرائیل بەناویان دەكەن.
ئەم چەواشەكاریانە هاوچەشنی چەواشەكاریەكانی كاتی سەرهەڵدانی شۆڕشی ژن، ژیان، ئازادییە كە بەئامانجی سەركوت و بێدەنگكردنی شۆڕش گرتیانە بەر. لەسەرهەڵدانی شۆڕشی ژن، ژیان، ئازادیدا بەهەزاران گەنج و ژن و چالاكوان، هونەرمەند، خوێندكار، پیشەوەر و وڵاتپارێز و نیشتیمانپەوەر بێسەروشوێن و كەمئەندام و زیندانی كران، رووبەڕووی دەستدرێژی و تەجاوز و ئەشكەنجەی هۆڤانە و سزای گران كران و تا ئەم ساتەش چارەنووسی زۆرێك لەو كەسانەش بەنادیاری ماوەتەوە. رژێم بەهۆی كاراكتەری دەسەڵاتداری، چاوچنۆكی و ناوەندگەرایی و قبوڵنەكردنی ئیرادەی راستەقینەی كۆمەڵگەو تاك و پێكهاتە فرەڕەنگیەكەی لەو كاتەشدا ئامادە نەبوو دان بەبچووكترین و سادەترین و ئاسایی ترین مافەكانیان لەمافی ئازادانەی بیروڕا دەربڕین بناسێت و دانی پێدا بنێت. ئەم نزیكبوونەوانەی رژێم وای كردوە كە گەل و كۆمەڵگە زیاتر لەهەركاتی تر لەدەسەڵات و كۆی گشتی سیستەمی بەڕێوەبردنی ئەو رژێمە دووركەونەوە و تاك و كۆمەڵگە رق ئەستوورتر بێ لەدژی سیستەمی دەسەڵاتداریەتی لەئێران و قووڵكردنەوەی ناكۆكییەكان و گەورەبوونی درزی نێوان دەوڵەت و كۆمەڵگە بهێنێتە ئاراوە و ئەو درزە گەورەیەش هەرچی چوو؛ دەرفەتی دەستێوەردانی دەرەكی لەكاروباری نێوخۆی ئێراندا زیاتر و بەرفراوانتر كرد. ئێستاكەش كە دەستێوەردانی دەرەكی لەئێران هاتووەتە كایەوە، رژێم هەوڵدەدات تووڕەیی و لاوازی و بێ چارەیی خۆی بەسەرگەل و كۆمەڵگەدا بەتاڵ بكاتەوە. رژێمی ئێران دەبێت لەوە زیاتر دەرفەتەكان لەدەست نەدات و دەبێت قەناعەت بەوە بهێنێت كە دانوستان لەگەڵ ئەمریكا و ئیسرائیل و ئەوروپا ناتوانێت قوتاری بكات و كات كوشتنیش لەبەرژەوەندی رژێمدا نییە و نابێت.
رێكخستن بوونی گەل و دامەزراوەبوونی بەڕێوەبەرایەتی هاوبەش
لە هەڵگیرساندنی ئەم شەڕ وناكۆكیانەی نێوان رژێمی ئێران، واتا دیكتاتۆریەت و تۆتالیتاریەت و ئەو شەڕە داسەپاوەی بەسەریاندا سەپاوە، گەل نابێت لایەنگری هیچ لایەكیان بكات و خۆی بكاتە سووتەمەنی ناكۆكیەكانی هەردوو سیستەمی دەسەڵات كە ئامانجیان تەنیا و تەنیا دەسەڵات و هەژمونخوازی زیاتر و بەرفراوانترە. بۆ گەل دەبێت لەم قۆناخە هەستیارە بەدەم یەكترەوە بن، ئێش و ئازارەكانی یەكتر ساڕێژ بكەن، هاوكاری و هاودەنگی و پشتیوانی یەكتر بكەن. ریزەكانیان پتەو و خۆبەڕێكخستن بوونی گەوهەریانە و دیموكراتیانەی خۆیان بونیاد بنێن و هاوشان لەگەڵ هێزەکانی ئۆپۆزسیۆنی نێوخۆ و دەرەوەی ئێران هەوڵی بونیادنانی بەڕێوەبەرایەتی هاوبەش و دیموكراتیك بدرێت. گەلی كورد لەڕۆژهەڵاتی كوردستان و هێز و لایەنە سیاسیی و كەسایەتی رۆشنبیر و ژنان و گەنجان لەژێر چەترێكی هاوبەشدا یەكێتی دیموكراتیكی خۆیان بونیاد بنێن و هێزێكی یەكگرتووی پاراستنی بۆ پاراستنی گەل و نیشتیمان و نرخە نەتەوەیی و دیموكراتیەكان دامەزرێنن، ئەمەش وەك ناچاریەك و پێویستیەكی قۆناخەكە ببینن و بەرەوپیری بانگەوازییە مێژوویەكەی پەژاكەوە بچن و تاقە رێگەی دەربازبوون لەم تەنگەژە مێژووییە ئاشتی و بونیادنانی كۆمەڵگەیەكی دیموكراتیكە كە رێبەر ئاپۆ وەك پرۆژەیەك بۆ گەلان و كۆمەڵگەی خستووەتەڕوو. بۆیەش ئەرك و بەرپرسیاریەتی گەل، رۆشنبیران، ئاكادیمیسیەن، ژنان و گەنجان، كەسایەتی دیموكراتیكخواز و نیشتیمانپەوەر و چالاكانی مافی مرۆڤ و رووناكبیران لەم قۆناخە، پشتگیری زیاتر لەداواكاری ئازادی جەستەیی رێبەر ئاپۆ و چارەسەری پرسی كورد و بەشداركردن لەهەڵمەتی”منیش دەمەوێت لەگەڵ رێبەر ئاپۆدا دیالۆگ پێش بخەم”بكەن. تەنیا لەحاڵەتێكی ئاوەهادا دەتوانرێت پێش بەدەستێوەردانی دەرەكی و دیكتاتۆریەتی نێوخۆیی بگیردرێت و دیموكراسی كۆمەڵایەتی و سۆسیالیستی پێشبخرێت.