ئامەد شاهۆ
مەشخەڵی ئاشتی و کۆمەڵگەی دیموکراتی هەڵکرا
پەیامە مێژووییەکەی ٢٧ی شوباتی ٢٠٢٥ی رێبەر ئاپۆ کە بە سەردێڕی بانگەوازی ئاشتی و کۆمەڵگەی دیموکراتی لەدوورگەی ئیمڕاڵییەوە بڵاو کرایەوە، سەردەمێکی مێژوویی، زێڕین و چارەنووسسازی لە کوردستان، ناوچەکە و جیهان بەدوای خۆی هێنا. پەیامەکە بۆ خۆی وەرچەرخانێکی مەزن و هەنگاوێکی بوێرانەی ئەم سەردەمەیە کە رێبەر ئاپۆ راستەوخۆ بەرپرسیارێتییەکەشی لە ئەستۆ گرتووە و لەو پێناوەدا هەوڵدانی بێ وچانی خۆی لەپێناو گۆڕینی زەمینەی توندوتیژی بۆ زەمینەی خەباتی یاسایی و سیاسەتی دیموکراتیک بەجێ هێناوە. واتە بەو بانگەوازییە مێژووییەی تێکۆشانی لەهێڵی خەباتی چەکدارییەوە بۆ گۆڕەپانی سیاسی و حقوقی گواستەوە.
رێبەر ئاپۆ لەو پەیامە مێژووییەدا داوای لە پەکەکە کردبوو کە کۆنگرەی نائاسایی خۆی ئەنجام بدات و بڕیاری خۆهەڵوەشاندنەوە و کۆتایی هێنان بە خەباتی چەکداری بدات؛ چونکە رێبەر ئاپۆ بۆ ئەوەی پرۆسەی ئاشتی لە گۆڕەپانی پراکتیکدا بە بێ کێشە و گرفت بەڕێوە ببات و دەرگا لەبەردەم ئاشتی، سیاسەتی دیموکراتیک و پێکەوە ژیانی گەلان ئاوەڵا بکات، بڕیاری هەڵوەشاندنەوەی رێکخستنی پەکەکە و کۆتایهێنان بە رێبازی تێکۆشانی چەکداری وەرگرتووە و کۆتایی بە هەموو خەباتەکانی هێناوە کە لە سەر ناوی پەکەکە بەڕێوەی بردووە. ئەوەش زەمینەیەکی پتەو و لەبار بۆ چەسپاندنی ئاشتی هەمیشەیی و چارەسەری دیموکراتیکی پرسی کورد و گەلان لەناوچەکە دەڕەخسێنێت. تایبەت بە هەڵوەشاندنەوەی پەکەکە و بڕیاری کۆتایی هێنانی خەباتی چەکداری، مەشخەڵی ئاشتی و کۆمەڵگەی دیموکراتی لەکوردستان و ناوچەکە بە دەستپێشخەری رێبەر ئاپۆ و پەکەکە هەڵکرا.
دوای چەند دیدار و دیالۆگی راستەوخۆی شاندی ئیمڕاڵی لە گەڵ رێبەر ئاپۆ و بەرپرسانی دەوڵەت و ئاڵوگۆڕی پەیام لەگەڵ قەندیل و ئیمڕاڵی لەماوەی دوو مانگدا، پەکەکە لەسەر بنەمای بانگەوازییە مێژووییەکەی رێبەر ئاپۆ کۆنگرەی ١٢هەمینی خۆی لە رێکەوتی ٥ بۆ ٧ی ئایار، بە بەشداری ٢٣٢ ئەندام لە دوو شوێنی جیا لە ژێر هێرشی چڕ و بەردەوامی ئاسمانی و زەمینیەكانی سوپای تورکیا و هەلومەرجی گەمارۆ سەختەکانی پەدەکە پێکهێنا و تەواو بوونی ئەرکی مێژوویی خۆی لە نیو سەدە تێکۆشان لەسەر ناوی پەکەکە راگەیاند.
تاجدارکردنی پرۆسەی ئاشتی پابەندی هەنگاوی کرداری حکومەتی تورکیایە
پەکەکە بۆ ئەوەی پارادیگمای کۆمەڵگەی دیموکراتیک، ژینگەپارێزی و ئازادی ژن لەم سەردەمەدا مسۆگەر بکات، پێویستی بە نوێبوونەوە و دەستپێکردنی سەردەمێکی نوێ و رێبازی نوێی تێکۆشان هەبووە. چون ئەو پارادیگمایە بە رێ و رێباز و فۆڕمی پارادیگمای کۆن مسۆگەر نابێت. بەڵکوو شێوە و رێبازی نوێی تێکۆشان و سەردەمیانە دەتوانێت سەرکەوتنی پارادیگمای نوێی رێبەر ئاپۆ مسۆگەر بکات. واتە پەکەکە لەو بڕوایەدایە کە چارەسەر کردنی پرسی کورد تەنها لە سەر بنەمای کۆماری دیموکراتیک، وڵاتی هاوبەش و هاووڵاتی یەکسان و دیموکراتیک دەتوانێت بگاتە سەرکەوتن. بۆیە پەکەکە بە بڕیارەکانی کۆنگرەی ١٢هەمینی خۆی هەنگاوی مێژوویی نا و لەژێر هەلومەرجی دژواردا بۆ چارەسەری ئاشتیانە خۆی هەڵوەشاند و دەرگای لەبەردەم پرۆسەی ئاشتی ئاوەڵا کرد. ئەو هەنگاوەش تۆپەکەی خستە گۆڕەپانی دەوڵەتی تورکیاوە کە ئێستاکە نۆرەی حکومەتی تورکیایە کە هەنگاوی کرداری لەپێناو چارەسەری ئاشتیانەی پرسی کورد هەڵبنێت. هاوکات پێویستە حکومەتی تورکیاش هاوشێوەی پەکەکە لەپێناو بەدیهێنانی چارەسەری ئاشتییانە و چەسپاندنی دیموکراسی خۆی بگۆڕێت و هەنگاوی بوێرانەتر هەڵبگرێت.
پەکەکە دوابەدوای کۆنگرەی دوازدەهەمینی خۆی لەو بڕوایەدایە کە؛ “لەپرۆسەی ئاشتی و کۆمەڵگەی دیموکراتی و تێکۆشانی سۆسیالیزمدا کە سۆسیالیزمی کۆمەڵگەی دیموکراتی نوێنەرایەتی قۆناغێکی نوێ دەکات، بە پێشخستنی بزووتنەوەی دیموکراسی جیهانی، جیهانێکی یەکسان و دادپەروەر بونیاد دەنرێت”. ئەم بۆچوونە بۆ خۆی سەلماندنی پانتایی فراوانی تێکۆشانی سەردەمیانەی بزاڤی ئازادیخوازی گەلی کورد پیشان دەدات کە بە جێگەی بچووک کردنەوەی تێکۆشان و خەباتی ئازادیخوازی گەلی کورد کە پەکەکە پێشەنگایەتی دەکرد، پرۆژە و بەرنامەیەکی بەرینتر و فراوانتر لەئارادایە، ئەوەش بە پەرە پێدان و بڵاوکردنەوەی سۆسیالیزمی کۆمەڵایەتی دەستەبەر دەکات. چون رێبەر ئاپۆ لەئیمڕاڵییەوە بۆ رای گشتی ئەو پەیامەی ناردە دەرەوە کە ئەو وەک سۆسیالیستێک ژیان دەکات و ئەوەش سەلمێنەری ئەوەیە کە رەهەندی تێکۆشانی پێشەڕۆژی پەکەکە لەو ئاراستەیەدا برەوی پێدەدرێت.
ستارتی خەبات و تێکۆشانی سەردەمیانەی پەکەکە لە ئەنجامنامەی کۆنگرەی ١٢دا بە روونی بڵاو کراوەتەوە کە رایانگەیاندووە: “سۆسیالیزمی نەتەوەیی دەوڵەتدار شکست دەهێنێت، سۆسیالیزمی کۆمەڵگەی دیموکراتیک سەرکەوتن بە دەست دەهێنێت”. هاوکات وەک درووشمێک وتەیەکی رێبەر ئاپۆ بەرز کراوەتەوە کە: “سووربوون لەسەر سۆسیالیزم، سووربوونە لەسەر مرۆڤبوون”ە. ئەمانە بۆ خۆی رووناک کەرەوەی رەوتی نوێی بەردەوام بوونی خەبات و تێکۆشانی سەردەمیانەی پەکەکەیە کە گەرەنتی ئاسۆیەکی روون و سەرکەوتنێکی شکۆدار دەگەیەنێت.
کۆنگرەی پەکەکە کۆنگرەی دەستپێکردنی ئاشتی و بونیادنانی کۆمەڵگەی دیموکراتیکە
بۆ رەواندنەوەی سەرجەم ئەو کۆسپ، لەمپەر و تەگەرانەی کە لەبەردەم تێکۆشانی پەکەکە هاتبوونە ئاراوە، بۆ تێپەڕاندنی ئەو کۆسپ و تەگەرانە و مسۆگەر کردنی ئەنجامی تێکۆشانی ٥٢ ساڵەی سەردەمێکی نوێ تێکۆشان لەژێر فەلسەفەی ئاشتی و کۆمەڵگەی دیموکراتیک راگەیەندرا. واتە دوازدەهەمین کۆنگرەی پەکەکە بووە کۆنگرەی دەستپێکردنی ئاشتی و بونیادنانی کۆمەڵگەی دیموکراتیک. چون لەکۆنگرەی 12هەمینی پەکەکەدا گرنگترین و بوێرترین بڕیاری سەردەم دراوە کە سەرنجی تەواوی جیهانی بۆ خۆی راکێشاوە ئەویش؛ بڕیاری هەڵوەشاندنەوەی پەکەکە و کۆتاییهێنان بە ڕێبازی تێکۆشانی چەکدارییە.
ئەوەی جێگەی تێڕامانە لەو کۆنگرەدا بڕیارێک لەژێر ناوی کۆتایی هێنان بە خەبات و تێکۆشان و پاشگەزبوونەوە لە گەیشتن بە ئازادی و دیموکراسی نەدراوە؛ بەڵکوو پەکەکە بەپێی کاراکتەر و تایبەتمەندییەکانی شەڕی هیبریدی سەردەم خۆی نوێ کردووەتەوە و سەردەمێکی نوێی تێکۆشانی دەستپێکردووە کە چارەسەری پرسی هەبوون، ئازادی و ناسنامەی گەلی کورد گەرەنتی دەکات. هاوکات بڕیارێک لەژێر ناوی ئەوەی کە کۆمەڵگە مافی خۆپاراستنی خۆی لەدەستبدات و کۆمەڵگەیەکی بێ پاراستن بهێڵێت، نەداوە. بەڵکوو گەوهەری بڕیاری ئەو کۆنگرەیە کۆتایی هێنان بە رێبازی تێکۆشانی چەکدارییە، نە پرۆسەی چەکدانان و بێ چەک کردنە کە دڵەڕاوکێ و پەشۆکی زۆر لەلای دۆست و خەمخۆرانی پرسی کوردی بەدوای خۆی هێناوە. هەرچەند بۆ رای گشتیش زۆر روونە کە تێکۆشانی چەکداری نەبژاردەی سەرەکی گەلی کورد و گەلانی ئازادیخواز بووە. بەڵکوو سیاسەتی قڕکردن و نکۆڵی کارانەی هێزە باڵادەستەکانی سەر کوردستان، گەلی کوردی ناچار بە چەک هەڵگرتن و برەودان بە رێبازی تێکۆشانی چەکداری کردووە.
بۆیە گەلی کورد و گەلانی ئازادیخوازی ناوچەکە هاوشانی تێکۆشانی پەکەکە ماوەی ٥٢ ساڵە؛ دژی سیاسەتەکانی تواندنەوە، قڕکردن، نکۆڵی و لەناو بردن وەستاونەتەوە و سەرەڕای قوربانی دانی گەورەشیان لەو پێناوەدا پەیوەستی رێپێوانی پەکەکە و رێبەر ئاپۆ بوون. واتە ئەم گەلەش هاوشانی تێکۆشانی سەردەمیانەی تەڤگەرە ئازادیخوازەکەی خاوەندارێتی لە نرخ و بەهاکانی خۆی دەکات و بە شێوەیەکی هوشیارانەتر و رێکخراوتر پشتگیری لەپرۆسەی ئاشتی و کۆمەڵگەی دیموکراتیک دەکەن و ئەرکەکانی ئەم قۆناغەش بە بێ دوو دڵی و دووڕایی لە هەر بەشێکی کوردستان و جێگەیەک تێدا دەژی بەجێ دەهێنن.
پەکەکە ئەرکی مێژوویی خۆی بە ئەنجام گەیاند
پەکەکە لە تێکۆشانی نیو سەدەی خۆیدا کۆتایی بە سیاسەتی نکۆڵیکارانە، قڕکردن و پاکتاوکارانەی گەلی کورد هێنا. واتە بە تێکۆشانی ٥٢ ساڵەی، پرسی کوردی گەیاندە دەروازەی چارەسەری دیموکراتی و بەوەش ئەرکی مێژوویی و شۆڕشگێڕی خۆی بە ئەنجام دەگەیەنێت. ئەو بەرپرسیاریەتییەش جێگەی رێز و تێڕامان و ستایشە کە لەم سەردەمەی تێکۆشاندا بووەتە مایەی شانازی و بەهێزبوونی هەر تاکێکی کورد و ئازادیخوازێک.
تێکۆشانی ٥٢ ساڵەی پەکەکە ئیدی کۆتایی بە سیاسەتی نکۆڵی کارانەی کورد هێناوە و ئەو هێزە باڵادەستانە ئیدی دان بە هەبوون، ئازادی و ناسنامەی گەلی کورد و گەلانی ئازادیخوازدا دەنێن. ئەوەش پێویستی هەنووکەیی گرتنەبەری رێ و رێبازێکی سەردەمیانەی تێکۆشانی هێناوەتە ئاراوە کە پەکەکە بە دوور لەبەرژەوەندی تەسکی حیزبایەتی و لۆژیکی خێڵگەرایی و هەرێم گەرایی رچەشکێنی بۆ رێباز، فەلسەفە و رێچکەیەکی نوێی تێکۆشان کردوەتەوە کە لە مێژووی تێکۆشانی گەلی کورد و گەلانی هەرێمەکەدا دانسقە و بێ وێنەیە.
کۆنگرەی ١٢هەمینی پەکەکە لە سەر ٥ بابەتی بنەڕەتی وەک؛ بابەتی رێبەر ئاپۆ، شەهیدان، برینداران، هەڵوەشاندنەوەی رێکخستنی پەکەکە و کۆتایهێنان بە رێبازی تێکۆشانی چەکداری و بونیادنانی کۆمەڵگەی دیموکراتیک بڕیاری مێژوویی وەرگرتووە. واتە ئەم کۆنگرە پابەندی بە نرخ و بەها کۆمەڵایەتییەکان و میراتی تێکۆشانی دووپات کردووەتەوە و بەڵێنی پاراستن و درێژەپێدانی رێچکە و خەباتی رێبەر ئاپۆ، شەهیدان و بریندارانی تێدا دراوە. بەو بڕیارانە پەکەکە جارێکی دیکە لە شۆڕشی ژیانەوەی کۆمەڵگەی دیموکراتیکدا خۆی کردووەتە سیمبۆلی لێگەڕینی ژیانی شکۆدار و گەشانەوەی هیوای ئازادی گەلانی هەرێمەکە.
بەو بڕیارانەی دەستکەوت و هەنگاوێکی دیکەی مێژوویی و سەرکەوتنێکی بێ وێنەی دیکەی لەمێژووی هاوچەرخی گەلی کورد بە رێبازێکی سەردەمیانە تۆمار کردووە. چون ئەم کۆنگرە نە بە واتای کۆتایی هاتنی خەبات و تێکۆشانی مافداری رەوا و ئازادیخوازانەی گەلی کوردە، بەڵکوو سەرەتای دەستپێکردنی قۆناغێکی نوێی خەبات و تێکۆشان بە رێبازی ئاشتی و دیموکراسییە. قۆناخی بونیادنانی کۆمەڵگەی دیموکراتیکە. یەکەم شەهیدی ئەم قۆناخە مێژووییەش (سری سورەیا ئۆندەر)ە کە بە ئەوین و هەستێکی مەزنەوە لەپێناو سەرکەوتنی ئەم قۆناخە خەبات و تێکۆشانی بێ پسانەوەی بەڕێوە بردووە.
ئەوەی لە کۆنگرەی ١٢هەمینی پەکەکە زۆر بە واتا و بەنرخ پیشان دراوە، راگەیاندنی شەهیدبوونی دوو کادیری پێشەنگی پەکەکە بە ناوی (عەلی حەیدەر قەیتان و رەزا ئاڵتوون)ە کە لە رێکەوتی جیاجیا لەپێناو سەرکەوتنی شۆڕشی ژیانەوەی کورد شەهید بوون کە ئەوەش رووناکی بە رێ و رێبازی سەردەمی نوێی تێکۆشانی گەلی کورد و گەلانی ئازادیخواز بەخشیوەو لەو پێناوەدا رێگەیان پڕ رێبوار دەبێت.
تێکۆشانی ئاشتی و کۆمەڵگەی دیموکراتیک بە رۆحیەی گیانبازی شەهیدان بەڕێوە دەچێت
کۆنگرەی دوازدەهەمینی پەکەکە پێشکەش بەو دوو شەهیدی پێشەنگەی تەڤگەری ئازادیخوازی کورد کراوە کە لە سەرەتای بزووتنەوەی ئازادییەوە بۆناو ریزەکانی تێکۆشان بەشدار بوون و بە تێکۆشانی بێوچان و نەبەزانەیان پێشەنگایەتییان لە شۆڕشی ژیانەوەی گەلی کورد و گەلانی ئازادیخواز کردووە کە یادیان لەیادگەی مرۆڤایەتی و گەلانی ئازادیخواز هەمیشە بەرز و پیرۆز رادەگیردرێت. ئەو حەقیقەتەش سەلمێنەری ئەو پێناسەیە کە پەکەکە پارتی شەهیدان و رێبەرتییە کە گەلی کورد بە هەمیشەیی پابەندی بوون و دەبن و ئەو رێچکەش هەرگیز کۆتایی پێ نایەت. بۆیە هەر شەهیدێک لە فەلسەفە و تێکۆشانی پەکەکەدا هاندەری بەهێزبوون و درێژەپێدانی خەبات و تێکۆشان بووە. دیاری کردنی ئەم کۆنگرەیە بەو هەڤاڵانە و یادکردنەوەی سەرجەم شەهیدانی رێگەی ئازادی، سەلمێنەری ئەوەیە کە سەردەمی نوێی تێکۆشانی ئاشتی و کۆمەڵگەی دیموکراتیک بە رۆحیەی گیانبازی و قارەمانی و شۆڕشگێڕی فوادەکان، رەزاکان و سری سورەیا ئۆندەرەکان بەڕێوە دەچێت. واتا رۆحیە، هێز، باوەڕی و رێچکەی تێکۆشانی پەکەکە بە فۆڕم و شێوەیەکی سەردەمیانە بەردەوام دەبێت.
هەڵبەت گرنگترین رووداوی سەدەی ٢١ ئەوەیە کە رێبەر ئاپۆ لە پێناو چارەسەری ئاشتیانە و دیموکراتیکی پرسی کورد ئەو هەنگاوە مێژووییەی ناوە. بەو هەنگاوە مێژووییەی رێبەر ئاپۆ و پەکەکە ئیدی بۆ چارەسەرکردنی پرسی کورد و بونیادنانی تورکیایەکی دیموکراتیک هیچ پاساوێک بۆ حکومەتی تورکیا نەماوە کە هەنگاوی کرداری بۆ بەرەو پێشچوونی پرۆسەکە هەڵنەگرێت. دیارە هەر کەس لەپێناو تاجدارکردنی پرۆسەی ئاشتی چاوەڕوانی هەڵگرتنی هەنگاوە کردارییەکان لەحکومەتی تورکیایە. بۆ تاجدارکردنی ئەو پرۆسەش پێویستە کۆتایی بە سیستەمی ئەشکەنجەی ئیمڕاڵی و سیاسەتی گۆشەگیری و قڕکردنی کورد بهێنرێت. ئیدی پێویستە بەبێ مەرج مافی هیوا بۆ رێبەر ئاپۆ بە شێوەی یاسایی مسۆگەر بکرێت و دەرفەتی سیاسەتی دیموکراتی بۆ ئاوەڵا بکرێت و رێبەر ئاپۆ ئازاد بکرێت. دواتر تورکیا ئاگربەست رابگەیەنێت و کۆتایی بە هێرش و داگیرکەرییەکانی لەهەرێمی باشووری کوردستان و رۆژئاوا بهێنێت. تایبەت هێزە چەکدارەکانی لەسنوورەکانی باشووری کوردستان بکشێنێتەوە و بنکە و بارەگاکانی هەڵبوەشێنێتەوە. دوابەدوای ئەوەش گیراوانی سیاسی هەنگاو بە هەنگاو ئازاد بکات و یاسای بنەڕەتی تورکیا لەسەر بنەمای دیموکراسی هەموار بکاتەوە.
ئەم ئاڵوگۆڕە مێژووییەش کەمپینی ئازادی جەستەیی رێبەر ئاپۆ و چارەسەری پرسی کوردی تێپەڕی قۆناخێکی نوێتر کرد و ئیدی هەر کەسێک لەسەردەمی پرۆسەی ئاشتی و کۆمەڵگەی دیموکراتیک لەچوارچێوەی کەمپینی جیهانی “منیش دەمەوێت دیدار لەگەڵ رێبەر ئاپۆ ئەنجام بدەم” خاوەندارێتی لەرێبەر ئاپۆ و پرۆسەی ئاشتی دەکات.
ئاشتی و کۆمەڵگەی دیموکراتی فەلسەفەی بونیادنانی کۆماری دیموکراتیکی ئێرانە
بانگەوازی ئاشتی و کۆمەڵگەی دیموکراتی و بڕیارەکانی کۆنگرەی ١٢ی پەکەکە ئەو دەرفەتە دەڕەخسێنێت تا گەلانی ناوچەکە و تایبەت گەلانی ئێران پێکەوە خەباتی جددی لەپێناو ئاشتی و بونیادنانی کۆمەڵگەی دیموکراتیک دەست پێ بکەن و لەپێناو بەدیهێنانی ئاشتی و ئارامی و چەسپاندنی دیموکراسی و ئازادی لە ئێران لەهەموو روویەکەوە خەبات و تێکۆشان بەڕێوە ببەن. هەنگاوەکانی هێز و لایەنە سیاسییەکان، رێکخراوە مەدەنییەکان، چالاکانی سیاسی و مەدەنی و شۆڕشی ژن ژیان ئازادی لەسەر ئەو رەوتەی خەبات زامنی بەرقەراری ئاشتی و ئارامی لە ئێران دەبێت. بۆ پەرە پێدانی ئەو رەوتەش پێویستی بە گەشەدانی زمانی ئاشتی لەم سەردەمەی خەبات هەیە. چون جێگرەوەی زمانێکی جیا لەو زمانە کە رۆحی سەرکەوتنی خەباتی سەردەمە، زیان بە چارەسەری ئاشتیانەی پرسی کورد دەگەیەنێت.
رێبەر ئاپۆ لە بانگەوازییە مێژووییەکەی خۆیدا ئاماژەی بەوە دابوو کە: “چارەسەری و ئاشتی تەنها بە تورکیاوە سنووردار ناکرێت”، واتە بۆ ئەوەی گەلی کورد لەهەر چوار لای کوردستان بە تایبەت لەئێران، عێراق و سووریا بگەن بە پێگەیەکی دیموکراتیک پێشخستنی ئەو پرۆسەیە پێویستە. بۆیە ئەم هەنگاوە مێژووییەی رێبەر ئاپۆ بە تایبەت بۆ چارەسەری ئاشتیانەی پرسی کورد و دیموکراسی لە ئێران زۆر گرنگ و بە واتا دەبێت. چون پرۆسەی ئاشتی و کۆمەڵگەی دیموکراتیک دەتوانێت ئێران لە فاشیزم و دیکتاتۆرییەت و تەنانەت دەستێوەردانی دەرەکی رزگار بکات و دەرگای بنچینەیی لەبەردەم ئاشتی و دیموکراسی و پێکەوە ژیانی گەلانی ئێران ئاوەڵا بکات. واتە پرۆسەی ئاشتی و کۆمەڵگەی دیموکراتی شانسێکی مێژووییە بۆ کرانەوەی ئاشتی و دیموکراسی لە ئێران و وەرچەرخانێکی سەردەمیانەیە لەپێناو گەشەدانی دیموکراسی و پێکەوە ژیانی گەلان. بۆیە لەدەست نەدانی ئەو شانسە پابەندی هەڵگرتنی هەنگاوی کرداری رژێمی ئێرانە لەپێناو چارەسەری ئاشتیانەی پرسی کورد و دیموکراتیزەکردنی ئێران. بۆیە هەنگاوی ئاشتی و کۆمەڵگەی دیموکراتیک لە ئێران و رۆژهەڵاتی کوردستان، بە واتای فەلسەفەی بونیادنانی کۆماری دیموکراتیکی ئێران دێت.
بۆیە پاڵپشتی و پشتگیری ئێران بۆ پرۆسەی ئاشتی و کۆمەڵگەی دیموکراتی هەنگاوێکی گرنگە. بەس جیا لەپاڵشتی، بەهەند وەرگرتنی ئەو ئەزموون و تاقی کردنەوەی بۆ رژێم پێویستییەکی هەنووکەییە. واتا بە بەربڵاوبوونی ئەو پرۆسەیە ئیدی رژێم ناتوانێت چاوپۆشی لەپرسی کورد و دیموکراتیزاسیۆنی ئێران بکات و تەنیا رۆڵی ئامۆژگاری وڵاتانی دراوسێی خۆی بۆ چارەسەرکردنی پرسەکانیان بە ئەستۆ بگرێت. بەڵکوو ئێرانیش هاوشێوەی تورکیا گیرۆدەی پرسێکە کە تەنیا بە بژاردەی چارەسەری ئاشتییانە و هەمیشەیی دەتوانێت لێی رزگار بێت. ئەگەر ئێران لەو پێناوەدا ئامادەی هەنگاو هەڵگرتن نەبێت و لەسیاسەتی هەڵاواردن، تواندنەوە، قڕکردن و تیابردن بەردەوام بێت، رێگە بۆ بەرپابوونی بژاردەی مەترسیدار خۆش دەکات.
پەژاک کە هەڵگری فەلسەفەی “ژن ژیان ئازادی”ییە تێکۆشانی ٢١ ساڵەی لەپێناو دەستەبەرکردنی ئاشتی هەمیشەیی و بونیادنانی کۆمەڵگەی دیموکراتی تەرخان کردووە. وەک پارتێکی سەردەمیانە بۆ بەرقەراری ئاشتی و بونیادنانی کۆمەڵگەی دیموکراتی چ ئەرک و بەرپرسیاری بکەوێتە سەرشانی، بە رێ و رێباز و میتۆدی شۆڕشگێڕانە بە جێی دێنێت. هەڵبەت لەم سەردەمەی تێکۆشاندا بەو پەڕی گیانبازی و قارەمانییەوە لەپێناو چارەسەری ئاشتییانەی پرسی کورد و دیموکراتیزەکردنی ئێران برەو بە تێکۆشانی رەوا و دیموکراتیکی خۆی دەدات و تا دەستەبەرکردنی ژیانی ئازاد، دادپەروەر و کۆمەڵگەی دیموکراتیک درێژە بە خەبات و تێکۆشانی رەوا و ئاشتیخوازانەی خۆی دەدات.
