كۆماری ئیسلامی ئێران وەكوو رژیمێكی تۆتالیتەر و دژی ئازادیەكانی مەدەنی، لە سەرەتای هاتنە سەركاریەوە هەتا ئەمڕو هەمیشە پێداگری كردووە لە سەر سەركوت كردنی ئازادیخوازان و بنەبڕ كردنی رامانی ئازادانە ژیان كردن. هەمیشە هوڵدانی بۆ ئەوە كردووە كە بچووكترین خۆ راپساندن لە كوت و زنجیرەكانی بە نامرۆڤانەترین شێوە وڵام بداتەوە. چالاكی و خەباتی ئازادیخوازانەی گەلانی ئێران وەكوو هەوڵدان لە دژی ئاسایشی نەتەوەیی و جووداخوازی نیشان دەدات و بە توندترین شێوە لە بەرامبەریدا كاردانەوە نیشان دەدات. لە كاتی سەركەوتنی شۆرشی ئیسلامی ئێران بە لانیكەم 4500 كەسی كورد لە شارە جیاجیاكانی رۆژهەڵاتی كوردستان بە فەرمانی خومەینی و لە بن بەرپرسیارێتی خەڵخاڵی دا(سەرۆكی دادگای شۆڕشی ئیسلامی ئەوكاتە) بە بێ هیچ دادگاهی و مەحكەمەیەكی فەرمی لەسێدارە دران. ئێستاش لە دوای سی و چوار ساڵ، زیندانەكانی ئێران پڕە لە كەسایەتی رۆژنامەوان، سیاسەتمەدار، هونەرمند، خوێندەوانانی زانكۆ، چالاكانی مدەنی و كەسانی ئازادیخواز كە تەنیا تاوانیان ئازادانە ژیان كردن و تێكۆشان بۆ هێمنی كۆمەڵگایە. ئێران كە ئەندامی 5 پەیماننامە لە 9 پەیماننامەی نێونەتەوەییە لە بواری مافی مرۆڤە، كە لە لایەنی حقوقییەوە مەجبوور بە لەبەرچاو گرتنی خاڵەكانییە. بەڵام سەرەڕای ئەوەش لە بواری پێشێلكارییەكانی مافی مرۆڤ لە جیهاندا یەكێك لە وەڵاتە پلەدارەكانەی سەرەوەی ریزبندییە. بە بەرچاو گرتنی ئەو رەفتارەی كۆماری ئیسلامی ئێران دەرحەق بە زیندانیانی سیاسی بەتایبەت و گشتی زیندانیانی دیكە، دەردەكەوێت كە كۆماری ئیسلامی ئێران هیچ پایبەندیەكی ئەخلاقی و حقوقی بە جاڕنامەی مافی مرۆڤ و تەنانەت هێندی لە خاڵەكانی یاسای بنەڕەتی خۆیشی دا نییە. وەكوو نموونە: خاڵی 23ی یاسای ئێران دەڵێت: “لێپرسینی باوەری و عەقیدە لە ئێران قەدەخەیە و نابێ بە هۆی باوەڕی جیاواز كەسێك تۆمەتبار یان تاوانبار بكرێ”. بەڵام بە پێچەوانە هەبوونی زیندانیگەلێك وەكوو زەینەب جەلالیان كە تەنیا بە هۆی بیرو ڕایەكی جیاوازو بەهرەمەندی لە كەسایەتی ژنێكی ئازادی كورد كە پێچەوانەوەی عەقلییەتی دواكەوتوو و دژەدێمۆكراتیكی سیستەمی كۆماری ئیسلامی ئێرانە، لە لایەن ئەو رژیمەوە حوكمی سێدارەی بەسەردا سەپێندراوە. ئازادی رادەڕبڕین و باوەڕی لە ئێراندا یانی دووبارە كردنەوەی باوەرییەكانی رژیم و هەڵگوتن و مەدحی زیاتریان. هەروەها دێمۆكراسی و مافی مرۆڤ بۆ كۆماری ئیسلامی ئێران بریتین لە جوڵانەوە لە چوارچێوەی جەبرێكی كە شەریعەت دیاری دەكا. رەخنە گرتن لە سیستەمی ئێران هاوكاتە لە گەڵ گرتن، ئەشكەنجە، زیندان و سێدارە و حوكمی وەك، شەڕ لە هەمبەری خوا و خستنە مەترسی ئاسایشی وڵات و هەوڵدان بۆ لە رووخاندنی رژیم.
هەروەها خاڵی 32 كە دەڵێ ” هیچ كەس نابێ بێ‌بەڵگە و بێ‌حوكم یاسایی بگیردرێت؛ لە ئەگەری گرتنیشی تاوانی ئەو كەسە چییە دەبێت بە شێوازی فەرمی بە تاوانباری رابگەیەنن و لە 24 کاتژمێردا پەروەندەكەی بەڕێی دادگا بكەن و زووترین كاتدا بە كاروباری دۆسییەكەی رابگەن.” هەروەها ئەسڵی 35 دەڵێ ” لە هەموو دادگاكان هەركەس مافی ئەوەی هەیە كە پارێزوانێك بۆ خۆی دیار بكات و تەنانەت لە ئەگەری دەسكورتی كەسی گیراو دەبێت دەولەت بۆ خۆی ئەو ئەركە بگرێتە ئەستۆ.” خاڵی 38 ئاماژە دەكا بە ئەوەی كە” هەر چەشنە ئەشكەنجە بۆ گرتنی ئیعتراف و ئاگاهی قەدەخەیە؛ مەجبوور كردنی زیندانی بۆ شایەتی دان، سوێند خواردن و ئیعتراف روا نیە و ئەگەر بەو جۆرە بەڵگەیەكیش وەدەست بخرێ بێ‌بایەخە.” ئەسڵی 39 دەڵێت كە بێ حۆرمەتی یا هەر چەشنە تەهدید بە دەستدرێژی لە سەر زیندانی قەدەخەیە و ئەگەریش هەبێت، تاوانی هە یە.” بەڵام بە خۆێندنەوەی نامەكانی شەهیدانی زیندان، مامۆستا فەرزاد كەمانگەر، شیرین عەلەم هوولی و هەروەها ئەوانەی كە ئێستاكە لە زیندان دان وەك حەبیب اللە گوڵپەری پوور بۆمان دەردەكەوێت كە هەموو ئەم خاڵانە جگە لە نووسراوەیەكی فۆڕماڵیتەی سەر پەل شتێكی دیكە نییە. ئەو زیندانیانە هەر لە رۆژی دەستپێكەوە بێ هەبوونی بەڵگە لە لایەن هێزەكانی كۆماری ئیسلامی ئێران دەسبەسەر كران، بۆ ماوەی چەندین مانگ لە ژێر ئەشكەنجەدا بوون. هەموو پێوەندێكیان بە دوونیای دەرەوە پچڕاوە. بێ هەبوونی پارێزەر و مافی خۆپاراستن لەخۆبەرگری كردن لە دادگایەكی چەند خولەكیدا بە سێدارە مەحكووم كران و بەبێ ئاگاداری بنەماڵە حوكمی هێندی لەوان جێبەجێ كراوە و تا ئەمڕوكەش تەرمی ئەو كەسانە رادەستی بنەماڵەكانیان نەكراوەتەوە. هەروەها ئەمڕو زۆر لەو زیندانیانەی كە لە حەبسی ئێران دان بۆ گرتنی ئیعتراف تەهدید بە دەستدرێژی كراون و زۆر كەسیش بەتایبەت ژنان دەستدرێژی و بێ رێزییان پێ‌كراوە. لە گەڵ ئەوەش بە سەدان زیندانی بۆ گرتنی ئیعتراف لە ژێر ئەشكەنجە، یا گیانیان لە دەست داوە، یا تووشی نەخۆشی جیاوازی جەستەیی و دەروونی بوونەتەوە. كە ئەم شتانە بۆ خۆی شاهەدێكی بەرچاوە بۆ ئەوەی كە رادەی دژە مرۆڤ بوونی حوكمەتی ئێران نیشان بدا.
لەم چوارچێوەیەدا كۆماری ئیسلامی ئێران هەمیشە هەوڵی داوە كە بە هەموو شێوازیك هەر چەشنە ئازادی ڕادەربڕین و ئاسانكاریەكانی خەباتی مەدەنی بنبڕبكا تا ئەو جییەی كە مەودا دەدا كومەڵگا بێ‌رێبازی خۆپاراستن بهێڵێتەوە. لەم چوارچێوەدا زیندان ئامرازێكە بۆ بێ ئێرادە كردن، ڕاهێنان، ئامادە كردن و درووست كردنی مرۆڤێك بە پێ بەرژەوەندی سیاسەتی دەسەڵاتخوازان. ئەمەش لە پێناو بێ‌ئێرادە كردن و چاوترسێن كردنی كۆمەڵگا دایە. هەڵبەت پەرەپێدان بە سیاسەتێكی كە لە تەك ئەخلاق و پێوانەكانی ئازادیدا ئاوێتەیە بووە، هەروەها پێشخستنی كلتووری رێزدانان بۆ مافی مرۆڤ و ژیانی كۆمەڵگا و ئازادی رادەربڕین و رێز لێنان لە دێمۆكراسی بۆ سەقامگیر كردنی ئەمنیەت و ئاشتێكی مایەندە لە ئێران و رۆژهەڵاتی ناوەڕاستدا خاوەن گرینگییەكی بەرچاوە. هاوكات بۆ ئامادە كردنی زەمینەێكی دێمۆكراسی لە ئێران و رۆژهەڵاتی كوردستان بە سەدان لاوی كورد ئەمڕو لە زیندانەكانی ئێران و شارەكانی رۆژهەڵاتی كوردستان وەكوو ئۆرمیە، سنە، مەهاباد، ماكۆ، كرماشان،… هێڵی خۆڕاگریان هەڵبژاردووە و درێژە بە تێكۆشانی ئازادیخوازیان دەدەن. بە گەشە كردنی خەباتی پارتی ژیانی ئازادی كوردستان(PJAK) زەخت و گوشاری لە سەر زیندانیانی سیاسی پەرەی سەندوە. هەوڵدان بۆ شكاندنی ئیرادەی جەوانانی كورد كە لە كەسایەتی زیندانیانی سیاسی دا، ئامانجی سەرەكی كۆماری ئیسلامی ئێرانە، تا ئێستا بە خۆڕاگری بێ‌وێنەی رۆڵەكانی گەلەكەمان بێ‌ئاكام ماوەتەوە.
ــــ ئێستاكە چەندین ئەندام و وەڵاتپارێزی كورد كە لە سەر دۆزی PJAK بە تۆمەتی موحاربە(شەڕی دژی خودا) و تێكدانی ئاسایشی وڵات و هەوڵدان بۆ لەناو بردنی حوكمەتی ئیسلامی ئێران بە ئیعدام مەحكووم كراون و هەركات ئەگەری جێبەجێ كردنی حۆكمی ئەوان لە ئارادایە.
1. حبیب الله گوڵپەری پوور
حبیب الله گولپەریپوور لە دایك بووی 1363 شاری سنە. لە بەرواری 5 رەزبەری ساڵی 1388 لە كاتی دەركەوتن لە مەهابادوە بۆ ئۆرمیە (بە پێ بەڵگەنامەی تاوانباری ئیتلاعاتی ئێران) لەگەڵ هێندێ كتێب و لە چاپدراوی گرێدراوی پژاك لە لایەن هێزەكانی ئیتلاعاتی سوپای مەهابادەوە گیرا. چەند مانگ لە ژێر لێپرسینەوەو ئەشكەنجەی كاربەدەستانی ئیتلاعاتی شارەكانی مەهاباد، ئۆرمیە و سنە ماوەتەوە.
حەبیب لە نامەیەكی خۆی دا ئاماژە بە ئەشكەنجەی رۆحی و جەستەیی خۆی دەكات و ئەڵێ:”سەرەڕای لێپرسینەوەی درێژخایەن و ئەشكەنجەی جەستەی و رۆحی منیان هەتا ئاستی مردن برد. شكایەتی ئەوەشم بەردەوام دەهەناردە داموو دەزگاكانی دەوڵەتی، بەڵام لەم وەڵاتەدا دەنگی ئێمە حۆجرەكانی زیندانیش تێناپەرێنێ، هەتاكوو بیسەری هەبێت.” حبیب لە 24 رەشەمەی 1388 لە دادگای شۆرشی مەهاباد بە بەرپرسیارێتی قازی خۆدادادی لە ناو چەند خولەك بە تاوانی ئەندام بوون لە پارتی ژیانی ئازادی كوردستان مەحكوومی لەسێدارەدان بوو. حۆكمەشی لە لایەن دادگای باڵای وەڵاتەوە پەسەند كراوە و ئێستاش هەر كات لە مەترسی لەسێدارەدان دایە.
حەبیب وەكوو زیندانیانی سیاسی دیكە لە زیندانی ئورمیە لە ناو ساڵانی رابردوودا بە چەندین جار لە لایەن رایەدارانی زیندان و ئیتلاعاتی شاری ئورمیەوە لە گەڵ چەند زیندانی سیاسی دیكە كەوتۆتە حوجرەی تاكەكەسی و بۆ وەرگرتنی دانپێدانان تەلەویزیونی زەختی زۆریان لە سەر داناوە و لە ئەگەری هاوكاری نەكردن دا تەهدیدی پێك هێنانی حوكمەكەیان كردووە. حەبیب لە هاوینی 1391 لە ئورمیە راگوێزی سمنان كرا.
2. حبیب الله لەتیفی
حبیب الله لەتیفی لە دایك بووی 1 خاكەلێوەی ساڵی 1361(1982) شاری سنە، خوێندكاری ئەندازیاری سەنایعی زانكۆی پەیام نووری ئیلام بووە. لە بەرواری 1 خەزەڵوەری ساڵی 1386 لە شاری سنە لە لایەن هێزەكانی ئیتلاعاتەوە گیرا. 4 مانگ لە حوجرەی لێپرسینی ئیتلاعاتی سنە ماوەتەوە و لەم ماوەیەشدا ئەشكەنجەی زۆر كراوە كە بۆتە هۆی خوێنرێژی گورچیلە و شكانی سەری، لە دوای ئەوەش گۆازراوەتەوە زیندانی سنە. حبیب الله لەتیفی لە بەرواری 10 پووشپەری ساڵی 1387 لە دادگای سنە بە بەرپرسیارێتی قازی بابایی بە تاوانی موحاریبە و ئەندام بوون لە پارتی ژیانی ئازادی كوردستان دادگایی كراوە و سەرەرای پارێزوانی وەكێلی ئەو یانی نیكبەخت و نعمت ئەحمەدی لە ئاكام دا حۆكمی سێدارەی پێ درا. لە دوای ئەرێ كردنی لە لایەنی دادگای باڵای وەڵات، لە بەرواری 16 رەشەمەی ساڵی 1388 ئەم حوكمە بە پارێزوانەكەی راگەێندرا.
حوكمی لەسێدارەدانی حەبیب كە بڕیار بوو لە 5 بەفرانباری 1389 لە زیندانی سنە پێكبێت، رووبەڕووی نارەزایەتی گەلی كورد و رێكخراوە مەدەنیەكان و چالاكانی مافی مرۆڤ لە هەر چوار بەشی كوردستان بۆوە، بۆیەش بە فەرمانی دادستانی سنە بە شێوازێكی كاتی راوەستا. حەبیب ئێستا لە زیندانی سنەیە و بە هۆی قەتعی بوون حوكمەكەی هەر كات مەترسی پێك هێنانی هەیە.
3. سیروان نژاوی
سیروان نژاوی خەڵكی شاری سەردەشت لە بەرواری 14ی پووشپەری 1391 لە لایەن هێزەكانی ئیتلاعاتەوە لە شاری كەرەج دەستگیركرا و بۆ لێپرسین گۆازرایەوە ئورمیە و بۆ ماوەی یەك مانگ و نیو لەوێ ماوە. لە دوای ئەوە دەربازی زیندانی مەهاباد كراوە و لە لایەن دادگای شۆڕشی مەهابادەوە بە تاوانی هاوكاری كردنی پارتی ژیانی ئازادی كوردستان حوكمی سێدارەی بەسەردا سەپێنرا. پاشانیش لە زیندانی مەهابادەوە بۆ زیندانی ئۆرمیە گۆازراوەتەوە. دۆسییەكەی بۆ پێداچوونەوەی دووبارە نێردراوەتە دادگا و ئێستاش چاوەڕوانی حۆكمی دواییە.
4. ئیبراهیم عیسی‌پور
ئیبراهیم خەڵكی شاری سەردەشتە و لە ساڵی 1391 لە لایەن ئیتلاعاتەوە گیرا و بۆ لێپرسینەوە دەربازی شاری ئورمیە كرا. لە دوای یك مانگ و نیو مانەوە لە حوجرەی تاكەكەسیدا بەرێی زیندانی مەهاباد كرا. ئیبراهیم لە پەروەندەیەكی هاوبەش لە گەڵ سیروان نژاوی لە بەرواری 23 خاكەلێوەی 91 لە لایەن دادگای شۆرشی مەهابادەوە بە تاوانی هاوكاری لە گەڵ پارتی ژیانی ئازادی كوردستان حوكمی سێدارەی بەسەردا سەپێنرا. ئێستا لە زیندانی ئورمیەیە و چاوەڕوانی بەرێوەچونی حوكمەكەی دەكا.
5. رەزا ئیسماعیلی
رەزا ئیسماعیلی (مامەدی) 34 ساڵە و خەڵكی شاری سەڵماس كە لە پاییزی ساڵی 1390 لە لایەن هێزەكانی ئیتلاعاتی سەڵماسەوە گیرا. ئەو لە دوای چەند مانگ كە لە ژێر لێپرسینەوەی ئیتلاعاتی شاری سەڵماسدا مایەوە و ئەشكەنجە كرا، لە لایەن دادگای شۆرشی شاری خۆی بە تاوانی هاوكاری لە گەڵ پارتی ژیانی ئازادی كوردستان حوكمی سێدارەی پێدرا. ئەم بەرێزە ئێستا لە زیندانی سەڵماس دایە و لە دوای نارەزایەتی لە حوكمەكەی بۆ دووبارە پێداچوونەوە ناردراوەتە دادگای گشتی ئەیالەتی ئازەبایجانی رۆژئاوا.
هاوكات دەرەوەی زیندانیانی سیاسی دۆزی پارتی ژیانی ئازادی كوردستان (PJAK)، ئەندامانی پارتێ كوردیەكانی دیكەش حوكمی سێدارەیان بەسەردا سەپێنراوە. كەسانی وەكوو لوقمان و زانیار مۆرادی و شێركۆ مەعاریفی سەزای سێدارەیان هەیە و مەترسی پێك هێنانی سەزاكەیان هەیە.
دیسان زۆر زیندانی سیاسی هەن كە بە هۆی ئەشكەنجەی لە رادە بەدەر و بێ بەرپرسیارێتی كاردارانی زیندان لە دەرمان كردنیان دا ئێستا باروودۆخی تەندرووستیان نالەبارە و مەترسی گیانیان لە سەرە. زەینەب جەلالیان یەك لەو كەسانەیە، كە ئێستا لە زیندانی دیزل ئابادی كرماشانە. زەینەب جەلالیان لە دایك بووی ساڵی 1982 گۆندی دێم قشڵاقی سەر بە شاری ماكۆیە. كە لە ساڵی 2008 لە كاتی چوونی لە كامیارانەوە بۆ كرماشان گیرا و بە تاوانی ئەندامێتی پارتی ژیانی ئازادی كوردستان و چالاكی چەكداری، كە هیچ كات ئەم تاوانەی قەبووڵ نەكرد لە دادگایەكی چەند خۆلەكیدا بەبێ هەبوونی پارێزەر حۆكمی ئیعدامی بە سەردا سەپێندرا. لە ماوەی لێپرسینەوەی لە ژێر ئەشكەنجەی رۆحی و جەستەیی هێزەكانی ئیتلاعاتی ماوەتەوە و لە ئەنجامی ئەم ئەشكەنجانە زەربەی گران لە سەری دەكەوێ و خوێنرێژی زۆر دەكات بەڵام بەرپرسانی زیندان تەنیا دەرمانی سەرپێی دەكەن و بۆ چارەسەری و دەرمانی زیاتر هەوڵدانێك ناكری. دیسان لە ئەنجامی ئەم ئەشكەنجانەدا لاشی تووشی عوفوونەتی جیدی بووە، بە تایبەت ریخۆڵەكانی برینی هەڵگرتووە. هەروەها سۆمای چاوی كەم بۆتەوە. بەڵام هەتا ئێستا بەرپرسانی زیندان ئامادە نەبوونە لە دەرەوەی دەرمانگای ناو زیندان چاەرسەری نەخۆشییەكانی بۆ بكەن. بۆیە مەترسی لە دەس چوونی بینایی هەیە. زۆر جار لە بەر برین و عوفوونەتی دەروونی ناتوانێ خواردن بخوات و لە بەر ئازاری سەر ناتوانێ پشوو بدات.
زەینەب چەندین جار لە ژێر زەختی ئەوەدا بووە كە پێویستە لە بەر كامێرا دان بە تاوانەكانی كە قەت نەیكردووە دانێ، هەتاكوو حۆكمەكەی بۆ كەمكەنەوە یان بیگۆرن. بۆ ئەوەی دان بە تاوانی سەپێنراو دا بنێ ئەشكەنجە كراوە و لە گەڵ بنەماڵەی بۆ رازی كردنی گفتوگۆ كراوە و… بەڵام زەینەب بە هیچ شێوازێك ئەمە قەبووڵ ناكات. بە هەوڵدانێكی نیونەتەوەیی لە لایەن دام و دەزگاكانی مافی مرۆڤ چالاكانی مەدەنی حوكمەكەی گۆرا، بەڵام سەرەڕای راوەستانی حۆكمی سێدارە دیسان رووبەڕووی مەترسی گیانیە.
دیسان رەمەزان موحەممەد موسلیم كە خەڵكی شاری كووبانێی رۆژئاوای كوردستانە، لە ساڵی 1385 بە تاوانی ئەندامێتی پارتی ژیانی ئازادی كوردستان گیرا. لە كاتی گرتنی دا بە هۆی پێهەڵچوونی لە گەڵ هێزەكانی سوپای پاسداران، دەستی بریندار دەبێت. هاوكات لە گەڵ ئەوەش بە هۆی ئەشكەنجەی هێزەكانی ئیتلاعاتەوە برینەكەی چڵك دەكات و باروودۆخی تەندرووستی دەكەوێتە مەترسییەوە. بەڵام بە هۆی بێ بەرپرسیاریەتی رایدارانی زیندان هەتا ئێستا برینەكانی چارەسەر نەبووە و برینەكەی تەشەنەی كردووە و ئەگەری بڕینەوەی دەستی زۆرە.
بێهرووز ئاڵاخانی لە دایك بووی 1364 شاری سەڵماسە كە لە رێبەندانی ساڵی 1388 لە لایەن هێزەكانی ئیتلاعاتی سەڵماسەوە گیرا و بۆ ماوەی 19 مانگ لە ژێر لێپرسینەوەدا بووە. لە ئیتلاعاتی شارەكانی خۆی و ئورمیەدا، لە ژێر ئەشكەنجەی جەستەیی و رۆحی دا ماوەتەوە. ئەم ئەشكەنجانە بۆتە هۆی ئەوە كە ئێستا لە بواری رۆحی و دەروونی تووشی نەخۆشی ببێت و باروودۆخی تەندرووستی باش نیە. لە سەرەتا دا بە تاوانی هاوكاری لە گەڵ پارتی ژیانی ئازادی كوردستان تاوانبار كرا بەڵام لە دوای چەند جار لێپرسین، بەشداری لە كۆشتنی دادستانی خۆی لە سەر پەروەندەكەی زیاد كرا. بەڵام ناوبراو ئەوتاوانە رەت دەكاتەوە. لە 23 رەزبەری ساڵی 1390 لە دادگای شاری ئورمیە بە بەرپرسیارێتی قازی چابوك حوكمی سێدارەی بە سەردا سەپێنرا. هەروەها بە تاوانی هەڵگرتنی چەك كاتی دەستگیر كردنی، 10 ساڵ زیندانی بەسەردا سەپێنراوە. بێهرووز مافی چاوپێكەوتنی لە گەڵ بنەماڵەی تەنیا مانگێ جارێك، ئەویش بە ئامادە بوونی بەرپرسانی زیندان هەیە. ئێستاكەش باروودۆخی بێهرووز باش نیە و لە بەر حەساسیەتی پەروەندەكەی بەرپرسانی زیندان ئامادە نیین لە نەخۆشخانەی دەرەوەی زیندان چارەسەری نەخۆشینەكەی بكەن. پەروەندەكەی لە پاش رادەست كردنی بۆ دادگای باڵای ئێران، هاو كات لە گەڵ سەید سامی حۆسەینی و سەید جەماڵ مۆحەمەدی حۆكمەكەیان شكا و بوو بە زیندانی هەتاهەتایی.
لە گەڵ ئەوەش بە سەدان زیندانی سیاسی لە زیندانەكانی ئێران بە هۆی هاوكاری یا ئەندامێتی لە گەڵ پژاك سەزای زیندانی درێژخایەنیان هەیە یا چارەنووسیان نادیارە.
كۆمیتەی زیندانیانی سیاسی پژاک
27.09.2012