شەهید سەنا کەرەمی بە ناوی ڕێکخستنیی (سیروان قەندیل)، ژنێک لە کەناری دەریاچەی زرێبارەوە بە عەشقی ئازادییەوە هەنگاوی نایە نێو ڕێگەیەک کە ئازادی مسۆگەر دەکات. لەم جیهانە پیاوسالارەدا کە ژنانی پەراوێز خستووە و لە سووچی ماڵدا قەتیسی کردوون، شەهید سەنا ئەم بازنە دووبارەیەی پساند و بە هۆشیارییەوە پێی نایە ڕێڕەوی ئازادییەوە. ئەو بیرهێنەرەوەی «خاتوو خۆرشید»ە؛ ئەو ژنەی هێمای ئیرادە بوو، هەروەها نموونەی وەسیەتەکەی «قانع»ی شاعیری ناوداری مەریوان بوو بۆ ئەو ژنانەی لە دژی دابونەریتە کۆنەپەرستەکان تێکۆشان.
ئەو لە بنەماڵەیەکی شۆڕشگێڕدا لەدایک بوو؛ پێشتریش ئامۆزاکەی، عەبدولڕەحمان کەرەمی بە ناوی ڕێکخستنیی (سیروان مەریوان) پەیوەندیی بە هێزەکانی گەریلاوە کردبوو و لە ساڵی ٢٠١٦دا شەهید ببوو. هەڤاڵ سەنا هەوڵی دا شوێنی ئەو پڕ بکاتەوە و هەر بۆ ڕێزگرتن لە یاد و بیرەوەریی ئامۆزا گەریلاکەی، ناوی «سیروان»ی وەکوو ناوی ڕێکخستنی بۆ خۆی هەڵبژارد. شەهید سیروان لێرەشدا هەنگاوێکی پێشەنگانەی نواند؛ «سیروان» کە ناوی ڕووبارێکە لە دڵی هەوراماندا و لە کۆمەڵگەدا وەکوو ناوێکی پیاوانە دەناسرێت، دەیکاتە ناسناوی ڕێکخستنیی خۆی. لە ڕاستیدا ئەو ئەم ڕووبارە لە قۆرخکاریی پیاوسالارانە دەردەهێنێت و گرێی دەداتەوە بە «ئاناهیتا»ی خوداوەندی ئاوەکانەوە.
ئەو بە پشتبەستن بەم یادە پیرۆزانە و هەستکردنێکی قورس بە بەرپرسیارێتی، بۆ ناسین و تێگەیشتنێکی قووڵتر لە تێکۆشانی ئازادیخوازیمان، هەوڵ و لێگەڕانێکی زۆری کرد و تەنانەت لە ئاستی خۆجێیشدا بە شێوەیەکی کارا لە کارە شۆڕشگێڕییەکان و چالاکیی گەنجانی وڵاتپارێزدا بەشدار بوو. لەو ماوەیەدا دەرفەتی بۆ ڕەخسا تاکوو ئاشنای فەلسەفەی ڕێبەر ئاپۆ و پارادایمی ئازادیی ژن ببێت و لێی تێ بگات. بەتایبەت بە خوێندنەوەی قووڵی شیکردنەوەکانی ڕێبەر ئاپۆ لەسەر فەلسەفەی ئازادیی ژن، وەرچەرخانێکی شۆڕشگێڕانەی لە ناخی خۆیدا خوڵقاند. دوای ئەوەی ئامۆزا و هەڤاڵەکەی، سیروان مەریوان (عەبدولڕەحمان کەرەمی)، لە ساڵی ٢٠١٦دا لە هەرێمەکانی پاراستنی مەدیا فیداکارانە جەنگا و گەیشتە پلەی شەهادەت، ئاگری تۆڵەسەندنەوە و ئیرادەی ئازادی لە دڵی سیرواندا زیاتر کڵپەی سەند و بڕیاری کۆتاییی خۆی دا بۆ پەیوەندیکردن بە ڕیزەکانی تێکۆشانەوە.
بەهۆی هەندێک هەلومەرجەوە، ناچار بوو بۆ ماوەیەکی دیکە پەیوەندیکردنەکەی دوا بخات، بەڵام تامەزرۆییی بێسنووری بۆ چیا و ئازادی هەرگیز دانەمرکایەوە. سەرەنجام لە ساڵی ٢٠١٨دا ڕووی لە چیا ئازادەکانی کوردستان کرد و پەیوەندیی بە ڕیزەکانی گەریلاوە کرد. هەر لە یەکەمین ڕۆژەکانی ژیانی گەریلایییەوە، سیروان ئاوێتەی سروشتی شکۆمەندی چیا پیرۆزەکان، پەیوەندیی قووڵ و پتەوی هەڤاڵێتی و شێوازی ژیانی کۆمەڵایەتیی گەریلا بوو و بە جۆش و خرۆش و داهێنەرییەوە لە ژیاندا ئامادە بوو. پەروەردە جیاوازەکانی بواری ئایدیۆلۆژی و سەربازی دەرفەتیان پێ دا لە هەموو ڕوویەکەوە گەشە بکات. ئەم پەروەردانە یارمەتیدەر بوون تاکوو پێوانەکانی ئازادیی ژن لە کەسایەتیی خۆیدا بەرجەستە بکات و ڕۆڵە چەوسێنەرانەکان، قاڵبە نەریتییەکان و ئەو سنووردارکردنانەی سیستەمی باڵادەست بۆ ژنانی دیاری کردووە، بناسێت؛ ئەو سەرلەنوێ خۆی وەکوو شەڕڤانێکی ئازاد خوڵقاندەوە.
دوای تەواوکردنی پەروەردەی بنەڕەتیی گەریلا، هەڤاڵ سیروان لە هەرێمی قەندیل تێکەڵی خەباتی شۆڕشگێڕی بوو و زانستە تیۆرییەکانی نێو پەروەردەی بە هەنگاوی کردەیی و بەرجەستە خستە بواری جێبەجێکردنەوە. هەوڵدانی بێسنوور، کاری بێوچان و کۆڵنەدانی بێوێنەی، ئەوی کردە گەریلایەکی بەتوانای هێزەکانی یژاستار (YJA-Star) کە هەڤاڵانی دیکە وەکوو سەرمەشق چاویان لێ دەکرد. لەگەڵ ئەوەشدا، هەرگیز خۆی بە تەواو و بێکەموكوڕی نەدەزانی؛ بە سادەیی هەمیشە تێدەکۆشا لێهاتوویی و قووڵبوونەوەی ئایدیۆلۆژی و سەربازیی خۆی زیاتر بکات. هەر لەسەر ئەم بنەمایە، لە لقە سەربازییەکان و بەتایبەت لە بواری نیشانەشکێنیدا (قەناس) پسپۆڕیی وەرگرت، تاکوو بە کارنامەیەکی شایستە وەڵامی قۆناغی ئەو شەڕە بەرفراوانە بداتەوە کە دەوڵەتی داگیرکەری تورکیا دەستی پێ کردبوو.
بۆ دروستکردنی بەربەستێک لە بەرانبەر هێرشە قڕکەر و داگیرکارییەکانی دەوڵەتی تورکیا بۆ سەر هەرێمەکانی پاراستنی مەدیا —بەتایبەت هەرێمەکانی مەتینا، زاپ و ئاڤاشین— هەڤاڵ سیروان بە پێداگرییەوە داوای کرد بچێتە ئەو بەرەیانەی کە شەڕ تێیاندا سەختتر بوو. بە هەڵسوکەوتی پتەوی لە ژیاندا، هەڵوێستی ئایدیۆلۆژی، ئامادەبوونی خاکیانەی و ئەو توانستە سەربازییە دیارەی کە هەیبوو، توانیی فەرماندەیی قایل بکات کە داواکارییەکەی قبووڵ بکەن. ئەو چووە ڕۆژئاوای زاپ، ئەیالەتی شەهید «دەلیل» و پەیوەندیی بە بەرخۆدانی مێژووییی ئەوێوە کرد؛ ناوچەیەک کە یەکێک بوو لە ناوەندە سەرەکییەکانی شەڕی قورس. شەهید سیروان هەر لە سەرەتای پەیوەندیکردنی بە ڕیزەکانی گەریلاوە، بەشداریی فیداکارانە لە قۆناغی شەڕدا و قووڵبوونەوە لە ڕێڕەوی فیداییبوون و هێڵی ئازادیی ژنی کردبووە بنەمای سەرەکیی ژیانی خۆی. چاونەترسی و بوێریی ئەو، کاریگەرییەکی قووڵی لەسەر سەرجەم ئەو هەڤاڵانە دانا کە کاری لەگەڵ دەکردن و ببووە پێشەنگی تێکۆشان بۆیان.
هەڤاڵمان سیروان هەمیشە بۆ بەرپەرچدانەوەی هێرشەکانی دوژمن بۆ سەر مەیدانی بەرخۆدانی «سەرگەلێ» ئامادە بوو. ئەو بە وەشاندنی گورزی سەخت لە داگیرکەران، ئەرکی جەنگاوەریی ئاپۆیی بەبێ کەموکوڕی بەجێ گەیاند. بە هەڵوێستی پتەو، ڕاستگۆ، سەمیمی و سادەیی کە لە پرەنسیپەکانی ئازادیی ژندا بەقەدەر مسقاڵەزەڕەیەک پاشەکشەی نەدەکرد، پێگەیەکی هەمیشەیی و نەمری لە دڵی هەموو ئەو هەڤاڵانەدا چاند کە لە تەنیشتیانەوە خەباتی دەکرد.
هەڤاڵمان سیروان قەندیل لەئەنجامی هێرشی دوژمن بۆ سەر مەیدانی بەرخۆدانی سەرگەلێ لە ڕۆژئاوای زاپ (ئەیالەتی شەهید دەلیل)، فیداکارانە جەنگا و گەیشتە پلەی شەهادەت و بەم شێوەیە ناوی خۆی بە پیتی زێڕین لە مێژووی پڕشکۆی ئازادیی گەلی کورددا تۆمار کرد. ئەو بە ژیانی خۆی، ڕۆحی یاخی و سەربەرزی ڕۆژهەڵات، ئیرادەی پۆڵایینی لە ڕێڕەوی ئازادیی ژندا و ئەو ڕێگەیەی کە مەشخەڵە پیرۆزە بەجێماوەکەی ئامۆزاکەی (شەهید سیروان مەریوان)ی گەیاندە لووتکەکان، شوێنپەنجەیەکی هەمیشەیی لە مێژووی تێکۆشاندا بەجێ هێشت. ئەو میراتە تێکۆشانەییەی کە شەهید سیروان لەدوای خۆی بەجێی هێشتووە، بێگومان تێکۆشانی ئازادیخوازیمان بەرەو سەرکەوتن دەبات.
بە بۆنەی شەهادەتی پڕ لە شانازیی شەهید سەنا کەرەمی بە ناوی ڕێکخستنیی (سیروان قەندیل)، سەرەخۆشیی خۆمان ئاراستەی بنەماڵەی بەڕێز و وڵاتپارێزی کەرەمی، خەڵکی وڵاتپارێزی مەریوان، گەلی شۆڕشگێڕی کوردستان و سەرجەم ئازادیخوازان دەکەین.

ناوی ڕێکخستنی: سیروان قەندیل
ناو و پاشناو: سەنا کەرەمی
مێژوو و شوێنی لەدایکبوون: ٢٠٠٠ / مەریوان
ناوی دایک: چیمەن
ناوی باوک: عەتا
مێژوو و شوێنی بەشداربوون: ٢٠١٨ / مەریوان







