شەهیدان؛ میراتە هەتاهەتاییەكانی ئازادی گەلن؛ رابردوو دەناسن، ئەمڕۆ هەڵدەسەنگێنن و بۆ گەلەكەیان داهاتوو رووناك دەكەنەوە. ئەوان شتێك بۆ فیداكردن لە خۆیاندا ناهێڵنەوە. گیانی شیرینیان بۆ گەیشتن بە ئامانجیان بێ دوودڵی پێشكەش دەكەن و لە هەركوێ پێویست بێ، ئامادەی بەخشینی ئەو گیانەن. هەتا گەیشتن بە ئامانجیان واز لە تێكۆشان ناهێنن و بێ ئەوەیكە چاوەڕوانی پاداشێك بن، تەنیا و تەنیا بەرەو سەركەوتن رێ دەپێون. ئامانجی شەهیدان جگە لە ئازادی گەل و نیشتمان، خاك و ژیان، فكر و رامان، هەست و ڤیان و بەرابەری مرۆڤەكان هیچی دیكە نیە. ئەوان بۆ ئەوەیكە ئێمە رووناك بژین، ژیانیان وەك مۆمێك دادەگیرسێنن. بۆ ئەوەی كە ئێمە ئاسوودە بنووین، لە سەنگەرەكانی پێشەوە دا جێگا دەگرن. بۆ ئەوەی كە ئازادی گەل و وڵاتەكەمان ببینین چاویان لە سەر ژیانی خۆیان دەنووقێنن. ئەوانن كە ئێش و ئازارەكانی ئێمە بە گیان دەكڕن. ماندوونەناسانە تێدەكۆشن و بۆ هەبوونمان گیانیان دەبەخشن.
شەهیدان؛ بێ ئەوەیكە چاوەڕوانی قەرەبوو كردنەوەیەك بن دەڕۆن، بەڵام گەورەترین پاداش پێشكەشی ئێمە دەكەن. هیچیان لێمان ناوێت بەڵام هەموو شتێكمان پێ دەبەخشن. ئەوان بوون بە ریشەی ژیان تا ئەو ژیانە ئازادەی كە لە سەر كۆكی ئەوانەوە دەپشكوێ قەت نەهەژێ و گوڵ و میوە بدا. ئەوان بوون بە مێژوو، ئەوان ئەوڕۆن بۆ خوڵقاندنی داهاتوویەكی ئازاد.
شەهیدان خەیاڵ و ئاواتی هەزاران ساڵەی نیشتمان و نەتەوەیان دەكەن بە ئامانج و وەدوای دەكەون. ئەوان بوون كە بێ هیوایی و ژیانی بەختەكیانەیان تێك شكاند و بە بڕوا و ئیمان و ورەیان گۆڕیەوە . خۆیان لە ئاسۆ دا نغرۆ كرد و بوون بە ترووسكەی ئازادی سەر رێگای مرۆڤایەتی. شەهیدان مێژوو ئاوەژوو دەكەنەوە؛ مێژووی داسەپاوی پڕ لە ناڵەو فرمێسك و هەنیسك، دەكەن بە داهاتوویەكی لێوڕێژ لە خەندە و پێكەنین. شەهیدان، برووسك ئاسا چارشێوی رەشایی دەدڕن. ئەو ئاورەن كە سەرما و سۆڵە دەتوێننەوە. ئەو ئاوێنەیەن كە رابردووی تاریك تێك دەشكێنن و داهاتووی روون دەدرەوشێننەوە. شەهیدان ئەو مزگێنیەن كە ژیانمان دەڕازێننەوە.
ئاخرین ئاوڕ و نیگا، ئاخرین پێكەنین و قاقا، ئاخرین بزە، ئاخرین هەناسە و قسە، ئاخرین هەستی گەرمی ئەو قارەمانانە، یەكەمین سروودی بەرەبەیانی ئێمەیە.
***************
وەك سەرجەم گەلانی‌تر، بۆ گەلی كوردیش شەهید سەرمایەی هەرە بەرز و بەنرخە. ئەو دەستكەوتانەی كە بە دەستیان دێنێ ئاكامی رەنج و خوێنی پاكی شەهیدانێتی. بزووتنەوەی ئازادیخوازی گەلی كوردیش بە پێشەنگایەتی PKK لە تەمەنی چل ساڵ تێكۆشانی بێ ئامانی خۆی دا دەیان هەزار شەهیدی داوە. رێبەر ئاپۆ ئەو سنوورە دەستكردانەی كە وڵاتەكەمانی لەت‌لەت كردبوو، لە زەین و دڵ و مێشك دا لە نێوبرد و PKKیەكی دروست كرد كە هیچ سنوورێك نەناسێ و لە پێناو ئازادی گەل و نیشتیمان دا فیداییانە لەم پەڕەوە بۆ ئەوپەڕی وڵات رێ بپێوێ و لە هەر شوێنێك كە پێویست بێ، بۆ وەدەرنانی داگیركەران لە وڵات شەڕ بكات. یەكێك لە گەورەترین سەركەوتنەكانی PKK ئەوە بوو كە توانی چاندی عەشیرەیی و بنەماڵەیی تێپەڕێنێ و بیری نەتەوەیی و نێونەتەوەیی لە نێو كۆمەڵگای كوردەواری دا دابەزێنێ. هەر بەو كردەوانەیەوە توانی خۆی بكاتە پارتێكی نەتەوەیی وئازادیخوازی كوردان و هەموو گەلانی تر.
بە دەست پێكردنی ساڵی 2011 پیلانە چەپەڵەكانی دوژمنیش بۆ سەر گەل و پارێزوانانی دەستی پێكرد. لە لایەكەوە رژیمی داگیركەری ئێران بە هێرشەكانی بۆ سەر قەندیلی سەربەرز و لەو لاشەوە فڕۆكە رەشەكانی توركیا.
ئێران قەندیلی كردبووە ئامانج، رژێمی فاشیستی توركیا هەرێمەكانی پاراستنی مەدیای بومباران دەكرد و لەو لاشەوە هێرشی نامرۆڤانە دەكرا سەر بەرێوبەرانی پارتی یەكێتی دیموكراتیك PYD لە رۆژئاوای كوردستان، كە تازە چرۆی ئازادی لە ناویدا دەپشكوت. بەڵام لە بەر ئەوەیکە ورەی بەرزی گەریلا و تێكۆشەرانی رزگاری كە هیچ كات لە بەرانبەر تەكنیك و تاكتیكی دوژمنان دا سەری بەرزیان نەوی نەكردووە، بۆ جارێكیتر توانیان زەبرێكی كوشندەیان لێ بدەن و ترسێكی بێوێنە بخەنە ناو مێشكیانەوە.
پێشتر PKK لە ساڵی ٢٠١٠ ە وە “هەڵمەتی شەڕی شۆڕشگێڕانەی گەل”ی دەست پێكردبوو. بە پێی ئەو هەڵمەتە گەریلا بە چالاكی سەربازی و گەلیش بە راپەرینی جەماوەری و سەرهەڵدان پێكەوە دەكەوتنە مەیدانی شەڕەوە و ئەرتێش و دەوڵەتی توركیایان لە كوردستان وەدەر دەنا. چالاكیەكانی گەریلا لە ساڵی ٢٠١١ش دا لە سەر ئەو رێبازە پێك دەهاتن كە دوژمنانی گەلی كوردی خستبوە ناو دڵەڕاوكێوە. بەو هۆیەوە ئێران و توركیا بە مەبەستی لاواز كردن و پێشگیری لە سەركەوتنی ئەو هەڵمەتە، پەیمانیان بەست تا پێكەوە (ئێران لە قەندیل و توركیاش لە باكوور و باشوور) هێرش بێننە سەر گەریلا و پیلانی پاكتاوكاریان بە ئەنجام بگەینن. ئێران لە شەڕی قەندیل دا بنكەوت، توركیاش لە باكوور. هەر بۆیە توركیا بەرنامەی خۆی گۆڕی. بەو پێیە؛ وەرزی زستان لە باكووری كوردستانەوە هێرشی زەمینی و هەوایی دەبردە سەر كەمپەكانی گەریلا. هەڤاڵان لە نێو بەفری زۆر و سەرمای سەخت و دژواریش دا شەڕێكی زۆر قارەمانانەیان بەڕێوە برد. لە ئاكام دا سەدان سەرباز و فەرماندەی دوژمن كوژران. جێی ئاماژەیە كە ئەو سەركەوتنە بە گیان بەخت كردنی چەندین گەریلا وە دەست كەوت. هەر چەند رێژەی گەریلایانی شەهید لەچاو كوژراونی دوژمن زۆر كەم بوو بەڵام لە ناو بیرەوەریەكانماندا جێگایەكی مەزنیان گرت و فریشتە ئاسا تێكەڵی خەون و خەیاڵ و ئامانجمان بوون.
بەهاری ساڵی ٢٠١٢ گەریلا هەم دەبوایە هەڵمەتی شەڕی شۆڕشگێڕانەی گەلیان بە لوتكە گەیاندبا، هەمیش تۆڵەی شەهیدانی زستانیان ستاندباوە. واتە ئەركیان دوو بەرابەر ببوو.
ئەو ساڵە وەك هەرێمەكانی‌تر لە هەرێمی بۆتان‌یش لە ناوەندی شڕنەخ و ناوچەكانی دەوروبەری، ئەو هەڵمەتە بەڕێوە چوو. یەكێك لە پیلان و بەرنامەكان ئەوە بوو كە گەریلا لە كاتێكدا هەم ناوەندی شارۆچكەی “ئەلكێ”(بەیتوشەباب) لە دەست دوژمن دەرهێنێ، هەمیش لە ناوەندی شاری “شڕنەخ” لە چەند لاوە لە بنكەكانی دوژمن بدات. بەو پێیە؛ لە چەند لاوە لە شڕنەخ هێرشیان دەبردە سەر ناوەندەكانی پۆلیس و هەدەفەكانی‌تری شار و چەند قۆڵیش لە هەدەفەكانی دەوروبەری شاریان دەدا. هاوكات چەند قۆڵ هێرشیان دەبردە سەر هەدەفە پۆلیسیەكانی ناوەندی “ئەلكێ”، چەند قۆڵ هێرشیان دەبردە سەر هەدەفە سەربازیەكانی دوژمن لە شاخەكانی دەوروبەری شار، چەند قۆڵیش دەوروبەری شاریان دەگرت بۆ ئەوەیكە نەهێڵن دوژمن لە شارەكانی‌ترەوە بە هانای هێزەكانی نێو ئەلكێ’وە بێن و ئەگەریش بێن بكەونە كەمینی گەریلاوە.
سەرەتاكانی وەرزی پاییز بوو. شەوی ٢ی ئەیلول (سێپتەمبر) ی ٢٠١٢، كاتژمێر ٩:٠٠ چالاكی دەستی پێدەكرد. پێویست بوو لە كاتژمێری دیاری كراو دا هەموو هێزەكان بگەنە جێی خۆیان. هەڤاڵ فەرهاد(مێهرداد تەتمویی) لە قۆڵی هێرش دا بوو بۆ سەر تابووری تەپەی بایراق كە لە لای رۆژهەڵاتەوە بە سەر ئەلكێ دا زاڵە. هەڤاڵ هاوڕێ ئیلام (داریوش هەواسی)، هەڤاڵ مەتین ئاڵان (رەحمان مەحمودپور) و هەڤاڵ ئەرنێستۆ جیلۆ’ش(؟) لە سێ قۆڵی جیاوازی هێرش بۆ سەر ناوەندەكانی پۆلیس لە نێو شاردا بوون.
ئەو شەوە نیو كاتژمێر بەر لەوەی كە هەوا تاریك بێ باران وردە وردە دەستی پێكرد. یەكەمین بارانی پاییز بوو كە بە سەر دار و بەردی كوردستانەكەمان دا دەباری و ئوقرەی بە خاكی تینوو ئەبەخشی. هێزەكانی چالاكی پۆل پۆل لە “چیای كاتۆژیركا” كە لە لای رۆژئاواوە بە سەر ئەلكێ دا ئەڕوانێ هاتنە خوارەوە و بەرەو شوێنی چالاكی بەڕێ كەوتن. باران دوای چارەگێك وچانێكی نیو سەعاتەی دا. پاشان بە جارێك تەم و مژ هەموو جێیەكی داگرت، هەورە سك پڕەكان هەموو ئاسمانیان داپۆشی و بارانێكی قورس وێڕای هەورەبروسكە دەستی پێكرد. دەنگی گوڕێنی هەورەكان وەك شمشێر سینگی ئاسمانی دەدڕاند. دڵۆپە بارانەكان گەورە و قورس بوون و بە توندی لە ئاسمانەوە سەراوژێر دەبوون و خۆیان بە زەوین دا دەماڵی. هەموو رێگاكان باریك و خاكی بوون. تێكەڵبوونی ئاو و خاك قوڕێكی خوڵقاندبوو كە رێگابڕینی سەخت ئەكردەوە.
بەڵام نە بارانی دژوار، نە دڵۆپە بارانی گەورە و قورس، نە تاریكەزەنگان و قوڕ، بۆ ئەوان نەدەبوون بە كۆسپ و ئاستەنگی. چونكە ئەوان بەرەو ئامانج، بەرەو ئاسۆی ڕوون، بەرەو سەركەوتن، بەرەو خەیاڵی هەڤاڵانی شەهیدیان و ئاواتی لەمێژینەی گەلەكەیان دەڕۆیشتن. هەر بۆیەش هیچ هێزێك نەیدەتوانی بێزار، نارەحەت و تووڕەیان بكات، یانخود لە پێكهێنانی ئەو چالاكیەیان وەرگێڕێتەوە. لەو دۆخەدا رێپێوان چەندە بۆیان سەختتر دەبوو ئەوەندە ورەیان بۆ “سەركەوتن” بەرزتر دەبووەوە. مۆرال و هێزی دەرونی، مەعنەوی و رۆحیان لە لوتكە دا بوو. پێكەنین بە هیچ شێوەیەك لە لێویان زویر نەدەبوو. بە خۆشی و پێكەنینەوە رێگایان دەبڕی، گاڵتەیان بە دوژمن، بە شەڕ، بە مەرگ و هەموو ئەو شتانەی كە ناڕەوایانە بەسەریاندا دەسەپێندرا، دەكرد.
لە كاتژمێر 8:30 ەوە هەموو ئەو گرووپانەی كە هێرشیان دەبردە سەر بنكەكانی نێو شار و ئەو دەستانەی كە دەوروبەری شارەكەیان دەگرت لە جێی خۆیان ئامادە بوون. ئەو دەستانەی كە دەچوونە سەر هەدەفەكانی نێو شار تەنیا چەند خولەكێك لە هەدەفی خۆیان دوور بوون. كاتێك كە لە سەر بێ سیم ئاگادار كرانەوە لەوەیكە قۆڵەكانی هێرشی سەر تەپەی بایراق –كە هەڤاڵ فەرهاد’یشیان تێدا بوو- گەییشتوونەتە جێی خۆیان و بۆ دەست پێكردنی چالاكی ئامادەن، ئەوجار قۆڵەكانی نێو شاریش لە چەند خولەكێك دا خۆیان لە هەدەف نیزیك كردەوە و چاوەڕێی كاتی دیاریكراو بوون.
باران وردە وردە كەم دەبۆوە تا ئیدی دوای ماوەیەكی‌تر بە جارێك راوەستا و ئەوەش خەڵكی شارەكەی لە گەریلاكان زیاتر شاد كردەوە چونكە لە نەبوونی باران دا هاسانتر دەیانتوانی لە پەنجەرە و سەربانی ماڵەكانیانەوە تەماشای چالاكیەكە بكەن. ئەو چالاكیەی كە شارەكەیانی لە ژێر داگیركەری رزگار دەكرد.
لە كاتی گەڕانەوەی دوكانداران بۆ ماڵەكانیان، گەریلاكان بە جل و بەرگی فەرمی گەریلایەتی و چەكەوە كەوتنە نێو شارەوە. هەندێك لەو كرێكار و دوكاندارانەی كە لە رێ دا بوون هەڤاڵانیان دیت و تێگەییشتن كە ئەو شەوە، شەوی ئازادی و گۆڤەندی گەریلایە! ئەو خەڵكەی كە لە كۆڵان و شەقام یاخود لە سەر بان و هەیوانی ماڵەكانیانەوە هەڤاڵانیان دەدیت بەرەو ئەوان دەهاتن و سڵاویان دەدا و دەستیان دەگرتن و تەنانەت هاوكاریان لە گەڵ دەكردن. بەڵام لە بەر ئەوەیكە بارودۆخەكە مەترسیدار بوو گەریلاكان خێرا تێدەپەڕین و دەڕۆیشتن. هەندێك كەس گوێیان بە ئاگادار كردنەوەكانی هەڤاڵان نەدەدا و هەر بەرەو پیریان دەهاتن.
لەو كاتە دا هەندێك جاش و پۆلیسی مەدەنی بە تەلەفون یەكسەر قایمەقامی شارۆچكەكەیان ئاگادار كردبۆوە لەوەیكە ژمارەیەك گەریلا كەوتوونەتە نێو “ئەلكێ”وە. خودی ماڵی قایمەقام هەدەفی قۆڵی ژێر فەرماندارێتی “هەڤاڵ هاوڕێ” بوو وە بە پێی بەرنامە پێویست بوو قایمەقامی شار بە ساغی بە دیل بگیردرێ. بەر لەوەیكە قۆڵەكە بگاتە جێی خۆی، پارێزوانەكانی قایمەقام، ئەو بە ژن و منداڵیەوە لە ماڵ دەڕفێنن و دەیانبەنە جێیەكی‌تر دەیانشارنەوە. لە نێو ماڵەكە دا تەنیا ژمارەیەك پۆلیسی پارێزوان و پانزێڕی زرێپۆش بۆ پاراستنی ماڵەكە مابوون. ئەو قۆڵەی كە “هەڤاڵ مەتین”ی تێدا بوو هێرشی دەبردە سەر بنكەی پۆلیس. قۆڵی “هەڤاڵ ئەرنێستۆ”ش دەچووە سەر بنكەیەكی‌تر. “هەڤاڵ هاوڕێ” و “هەڤاڵ مەتین” وێڕای كڵاشینكۆف، RPGیشیان پێ بوو، تاكو دوای هاوێشتنی راكێتەكانی RPG بە كڵاشینكۆف بكەونە نێو شەڕەوە.
***************
“هەڤاڵ هاوڕێ” و هەڤاڵێكی‌تری نێو قۆڵەكەی، بە پێكدادانێك، پانزێڕ، پۆلیس و پارێزوانەكانی دەرەوە و نێو ماڵیان بەزاند و بۆ دیل گرتنی قایمەقام كەوتنە نێو ژووری ماڵەكەوە. هەموو دیوەكانیان لێك دا. هیچ كەسێكیان نەدیت. دیوێك هەبوو كە دەرگایەكی داخراو و گەورەی پۆڵایینی پێوەبوو. بەو بیرۆكەوە كە قایم مەقام خۆی لەو ئۆدەیەدا شاردۆتەوە، سوور بوون لە سەر تێكشكاندنی دەرگاكە. بەڵام هەرچێكیان كرد نەیانتوانی دەرگاكە نە بشكێنن، نە لە جێی خۆی دەرهێنن. هەڤاڵانی‌تریان لە بەر دەرگا ئەوانیان دەپاراست و سەرنجی دوژمنیان دەهێنا سەر خۆیان تاكو ئەوان كارەكەیان سەر بخەن. تا ماوەیەكی زۆر هەوڵیان دا بەڵام بێ فاییدە بوو. بە ناچار تەنیا دەستیان بە سەر ئەو كامپیوتێر، ئارشیو و بەڵگانەی كە دوژمن دەرفەتی نەدیتبوو بیانشارێتەوە، داگرت و لە گەڵ خۆیان بردیان. لە كاتی وەدەركەوتن لە دەرگای دەرەوە دا جارێكیتر لە گەڵ دوژمن كەوتنە پێكدادانەوە. راكێتەكانی “هەڤاڵ هاوڕێ” بەر لەوەی كە بچنە نێو ماڵەكەوە تەواو ببوون و ئیدی بە كەڵاشینكۆف شەڕی دەكرد. هەر لەو كاتە دا “هەڤاڵ هاوڕێ” بە گوللەیەكی پانزێڕەكەی بەر دەرگا شەهید بوو.
“هەڤاڵ مەتین” بە RPG و ئەندامەكانی‌تری قۆڵەكەشیان بە كڵاشینكۆف هێرشیان بردە سەر بنكەی پۆلیسەكان. هەموو راكێتەكانی بە ئیسابەتەوە هاویشتە هەدەفەكانی. تەنیا یەك دانە مابوو. بە تەقاندنەوەی ئاخرین راكێت، بە گوللەیەك كە لە یەكێك لە سەنگەرەكانی دوژمنەوە هات لە قەراغی شەقام كەوتە خوارێ و شەهید بوو.
“هەڤاڵ ئەرنێستۆ” ش دوای پێكدادانێكی زۆر گران و دژوار بە بەرخۆدانێكی گەورە لە بەردەم دەرگای هەدەفەكەی شەهید بوو.
قۆڵی “هەڤاڵ فەرهاد”و سێ قۆڵی‌تر كە دوانیان پێكەوە لە دوو شوێنی جیاوازەوە هێرشیان دەبردە سەر دوژمن و دوانەكەی‌تریش ئەوانیان دەپاراست ماوەیەك بەر لە كاتی دەستپێكردنی چالاكی گەییشتنە شوێنی پێویست لە تەپەی “بایراق”. هەموو قۆڵەكان لە شوێنی زۆر ناخۆش و سەختەوە خۆیان بە هەدەف گەیاند. تەنیا رێگایەك هەبوو كە بۆ ئەو هەدەفە دەچوو. ئەویش رێگای دوژمن بوو كە لە ژێر كۆنتڕۆڵی دابوو. هەر بۆیەش لە شوێنێكی بێ‌ڕێ‌وە بەرەو هەدەف چوون. تەپەی بایراق كە دوژمن ئاڵای خۆی لێ دانابوو و تابووری دوژمنی لێ بوو. جوغڕافیاكەی سەرتاپێ كەڵەبەرد و هەڵدێری هەبوو لە گەڵ خیزێكی زۆر وشك و ڕەق دا كە مرۆڤی بەرەو خوارەوە رادەكێشاوە و هەڵیدەخلیسكاند. ئەگەر ئامانج، ئیرادە، ورە و بڕوایەكی یەكجار پتەو و گەورە نەبایا، مرۆڤ هەرگیز خۆی لە شوێنی وا دا نەدەدا. هەر دوو قۆڵی هێرش و دوو قۆڵی پاراستنەكەیان لە شوێنێكی وەهاوە خۆیان گەیاندە جێی چالاكی. ماوەیەك بەر لەوەیكە بگەنە سەنگەرەكانی دوژمن، هەر قۆڵێكی هێرش وێڕای قۆڵەكەی پاراستنی لەوانەی دیكە جودا بوونەوە، هیوای سەركەوتنیان بۆ یەكتر خواست و هەر یەكەو بەرەو شوێنی دەست نیشان كراوی خۆیان وەڕێ كەوتن. “هەڤاڵ فەرهاد” ئەندامی یەكێك لەو قۆڵانە بوو. قۆڵەكانی هێرش لە دوو شوێنی جیاوازەوە گەییشتنە بن سەنگەرەكانی دوژمن. چەند خولەكێك بەر لە كاتژمێر ٩ كۆردینەی شەڕ جارێكیتر رەوشی هەموو قۆڵەكانی ناو و دەرەوەی شار و تەپەی بایراقی پرسی و وەڵامی ” ئامادەین”ی لە هەموویان وەرگرت. كە كاتژمێر تەواو بوو لە تەپەی بایراقیش بە گوێرەی پیلانی داڕێژراو، سەرەتا قۆڵەكانی پاراستن بە RPG و هاوان لە سەنگەر و بنكەكانی دوژمنیان دا. پاشان قۆڵەكانی هێرش لە هەر دوو لاوە بە نارنجۆك و چەكەكانیان هێرشیان بردە سەر سەنگەرەكان. دوای پێكدادانێكی زۆر دژوار “هەڤاڵ فەرهاد” شەهید بوو.
***************
لە ئاكامی ئەو شەڕە دژوارە دا 4 گەریلای فیدایی كوردستان بە قارەمانێتیەكی زۆر گەورەوە شەهید بوون و زیاتر لە شەست سەرباز، پۆلیس و پایەبڵیندی دوژمن كوژران و بریندار بوون، بەڵام ئەرتەشی دوژمن بە خاڵی كردنی هەموو ساردخانە و نەخۆشخانەكانی ئەلكێ لە خەڵكی مەدەنی و هەروەها گواستنەوەی كوژراوو و بریندارەكانی بۆ شارەكانی دەوروبەر(وان، سێرت، جۆلەمێرگ) بە هێلی‌كۆپتێر، نەیهێشت ژمارەی راستی كوژراو و برین¬داران بزانرێ. دیار بوو كە زەربەیەكی گەورەترلەوەیان خواردووە. هەروەها چەند پانزێڕ و زرێپۆش و تانك لە نێو بردران و كۆمەڵێك ئارشیو و دۆكیومێنتاری دوژمن كەوتنە دەستی هەڤاڵان.
هەموو ئەوانە لە چاو ورەیەك كە گەل لە چالاكییەكە گرتبوویان زۆر گرینگ نەبوون. كاریگەری ئەو چالاكیە وای كرد كە بۆ یەكەم جار لە مێژووی ئەلكێ دا خەڵكی شارەكە سەرتاپا بە شكۆوە هەستنە سەر پێ و چۆك بە دوژمن دادەن. بە تەواو بوونی چالاكی، هەموو گەلی شارۆچكەكە یەكسەر لە ماڵ وەدەر كەوتن. بەشێكیان هەموو كامێرا دەوڵەتیەكانی شەقامەكانی نێو شاریان لێكردەوە و لە نێویان برد تا دوژمن هیچ زانیاریەك لە سەر چۆنێتی هاتنی گەریلا بۆ جێی چالاكی وەگیر نەخا چونكە هەندێك وڵاتپارێز رێگای هەدەفەكانیان نیشانی هەڤاڵان دا و هەتا نزیكی هەدەف بردیانیان. بەشێكی‌تر لە گەل نەیانهێشت هەڤاڵان خۆیان بە بردنی تەرمی هەڤاڵانی شەهیدەوە خەریك بكەن تا لەو كاتە دا دوژمن لەو دەرفەتە كەڵك وەرنەگرێ و هێرش نەكاتە سەر هەڤاڵان. سەرەڕای ئەوەی كە دوژمن بە چەكەوە هاتبوونە سەر تەرمی شەهیدان و بە ترسەوە لە تەرمەكان نزیك دەبوونەوە بەڵام گەل تەرمی شەهیدانیان لە چنگیان دەرهێنا و بەو شێوەیە بۆخۆیان دەوری تەرمی هەر سێ شەهیدەكەیان گرت و نەیانهێشت دوژمن خۆی نیزیكیان كاتەوە و هەتا بەیانی نیگابانی تەرمی شەهیدانیان دا. بەشەكەی تریش ڕێگای وەدەركەوتن لە شاریان نیشانی هەڤاڵان دا تا زوو و بە سڵامەتی وەدەركەون.
بە یەكەمین رووناكایی بەیانی گەلی ئەلكێ بێ ئەوەیكە نان و ئاوێك بخۆن یاخود بكەونە بیری كار و كاسبیەوە بە ژن و پیاو، لاو و منداڵ، كورد و ئاشوری رژانە ناو كۆڵانەكانی شار. یەك كەس لە ماڵ دا نەمابوو. لەو شارە دا تەنیا دەنگی “بژی سەرۆك ئاپۆ”، “شەهید نامرن” و “بژی كوردستانی خۆسەر و ئازاد” بەرز دەبۆوە و ئەرز و ئاسمانی شاری دەلەرزاند. گەل شەپۆل شەپۆل لە بەر دەم هەموو ئەو شوێنانەی كە شەوی رابردوو چالاكیان لێ كرابوو كۆ ببوونەوە و دروشمیان دەدا. ژنان و بە تایبەت دایكان لە هەموو دەستەكان دا بە جل و بەرگی كوردیەوە لە پێشەوە جێیان دەگرت و بەو شێوەیە سەرنجی هەموو كامێرا و رۆژنامەوانیەكانیان رادەكێشا سەر خۆیان. بەر لەوەی كە پۆلیسەكان بە پانزێڕ و دار و ئاسن هێرش بكەنە سەر گەل تا تۆڵەی شەوی ڕابردوویان لێ بستێننەوە، قایمەقامی ئەلكێ، ئۆستانداری شڕنەخ و ئەمنیەتی میللی لە ئانكاراوە فەرمانێكی وەهایان پێدان: “گەل زۆر رقی هەڵگرتووە، زۆر گەرم بووە، بە هیچ شێوەیەك هێرشیان بۆ مەكەن ئەگینا گەل لە گەڵمان دەكەوێتە شەڕەوە، ئەوەش بۆ پرەستیژ و هەیبەتی دەوڵەت باش نیە. هەوڵ بدەن بە تكا و زمانی خۆش گەل ئارام و بڵاو بكەنەوە!” دەوڵەتی توركیا كە دووهەمین ئەرتێشی گەورەی ناتۆ’ی هەیە كەوتبووە رەوشێكی وەهاوە.
پۆلیسەكان لە ترسی گەل نەیاندەوێرا لە بنكەكەیان دەركەون. لە بنكەیەك كە دیوارەكانی كون‌كون ببوون و شوشە و پەنجەرەكانی تێك شكابوون و هێشتا دووكەڵ لە پەنجەرەی دیوە سوتاوەكانیەوە كە بە راكێتی هەڤاڵان ئاوریان گرتبوو، دەهاتە دەر، پۆلیسەكان تەنیا لە پەنجەرە و سەربانەوە بە بێدەنگی چاویان لە گەل دەكرد. شەوی پێش هەڤاڵان لە لوتكەی چیای كاتۆژیركا، بە شێوەیەك كە لە تەواوی شارەوە ببیندرێ ئاڵایەكی گەورەیPKKیان هەڵواسیبوو. گەل كە بەیانی ئەو ئاڵایەیان دیتبوو، هێزێكی زیاتریان گرتبوو و بە ورەیەكی بەرزتر بەردیان بە پۆلیسەكان دادەدا و بە یەكدەنگ دروشمی “ئێرە كوردستانە، ئاڵای توركیای فاشیست لە چ دەگەڕێ؟” دەیانویست دوژمن ئاڵاكەی خۆی لە سەر دیوار و بنكەكەكانی لابا. لە سەر ئەو هەڵوێستە تووندەی گەل، لەو پۆلیسانەی كە لە ترس دا خۆیان لە ژوورەوە شاردبۆوە تەنیا دوو كەس هاتنە سەر پلیكانەكانی حەسارەكەیان و هەر لەوێوە تكایان لە گەل كرد كە دوور بكەونەوە. بەڵام گەلی داغدار سوور بوو لە سەر داخوازەكەی و گوێی نەدەدا بە تكاكانی دوژمن. هەر بۆیەش لە‌ترسی ئەوەیكە گەل هێرش بكاتە سەریان و ئاڵاكەیان بێنێتە خوارێ دوو پۆلیسەكە خێرا ئاڵاكەیان لە بەر چاوی هەموو كامێراكانی كوردستان و توركیا هێنا خوارێ. لە لایەكی‌ترەوە چەند پانزێڕی دوژمن كە بۆ بڵاو كردنەوەی گەل هاتبوون فەرمانی وەستانیان پێ درا. ئەو دەوڵەتەی كە بە پۆلیس و ئارتێشیەوە هەمیشە چاوەڕێی بچوكترین بیانوو بوو بۆ هێرش‌بردنە سەر گەل، ئەمجارە لە ترسی لە دەستدانی شار دەستوری بە پانزێڕەكانی دابوو هێرش نەكەن، بەڵكوو بۆ ئەوەیكە گەل بڵاو بێتەوە لە نێو شار دا تەنیا جارێك بگەڕێن. كەچی گەل هێرشیان بۆ برد و ئاڵای نەتەوەیی سەوز و سوور و زەردیان لە بەر چاوی پۆلیسەكان بە پانزێڕەكانەوە هەڵاوەسی. دوژمن نەیدەوێرا بە هیچ كردەوەیەكی گەل “نا” بڵێ. لە ئاكام دا پانزێڕەكان بە ئاڵای نەتەوەیی كوردستانەوە لە شاردا گەڕان. لە نێو شاردا راپەڕین بوو و دیمەنەكان راستەوخۆ دەدران بە میدیاكان. لە گوند و شارەكانی دەوروبەریشەوە گەل بە كورد، ئاشور، ئەرمەن، ئازەر، عەڕەب و توركەوە بۆ دیتنی “ئەلكێ ی خۆسەر و ئازاد” كە لە جیاتی ئاڵای داگیركەران، ئاڵای PKK تێیدا دەشەكایەوە و بۆ ئەوەی بەشداری ریزەكانی گەلی راپەڕیو بن بە سەدان ماشێن روویان لە ئەلكێ كرد. تەنانەت ئاژانسە هەواڵنێرە فاشیستەكانیش روویان لە ئەلكێ كردبوو. دەوروبەری شار هەتا هەفتەیەك لە لایەن هەڤاڵانەوە بەرنەدرا. هەڤاڵان ئەو خەڵك و رۆژنامەوانانەی كە دەهاتن بۆ ئەلكێ’یان رادەوەستاند و ئامانجی چالاكیەكەیان پێ رادەگەیاندن، پاشان بەڕێیان دەكردن. هەندێك كەس لە شارە دوورەكانەوە تەنیا بۆ ئەوەیكە لە نزیكەوە گەریلا ببینن هاتبوون. ئەو دیمەنانەش یەكسەر بۆ میدیاكان دەنێردران و بڵاو دەكرانەوە.
ئەوانەی كە لە شەوێوە تەرمی شەهیدانیان دەپاراست سوور بوون لەوەیكە تەرمی شەهیدەكانی نەداتە دەستی دوژمن. لە دوایی دا بە رازاندنەوەی تەرمەكان بە ئاڵای PKK وHPG لە مەڕاسمێكی شكۆدار دا، ئەوانیان بەرەو سەردخانە بەڕێ كرد.
دوای چەند رۆژ HPG ناسنامەی شەهیدەكانی راگەیاند و گەل ئاگادار بۆوە كە سێ كەس لەو چوار شەهیدە (شەهیدان؛ هاوڕێ، مەتین و فەرهاد) خەڵكی رۆژهەڵاتی كوردستانن. ئەو هەواڵە، وەك بۆمب لە تەواوی هەرێمەكە دا دەنگی داوە و وزەیەكی زیاتری بە راپەڕینەكان بەخشی. ئیدی گەل لە سەر پلاكارد و دیواری ماڵ و دوكانەكان دەیاننوسی: “ئەلكێ هەتا ئەلكێ بێ شەهیدانی رۆژهەڵات لە بیر ناكات!”