لە بیست و یەكەمین ساڵیادی دامەزراندنی پارتی ژیانی ئازادی كوردستان”پەژاك” كە هاوكاتە لەگەڵ لەدایكبوونی رێبەر ئاپۆ، پۆلێک لەگەریلاكانی پەژاك بەمەراسیمێك هەردوو یادەكەیان بەرز و پیرۆز راگرت.
مەراسیمەكە لەچیاسەركەشەكانی كوردستان و بەكردنەوەی پێشەنگایەكی وێنەكێشان و بەئامادەبوونی ژمارەیەك لەئەندامان و بەرێوەبەران و هاوسەرۆكی پەژاك بەرێوەچوو. لە پێشەنگاكەدا كۆمەڵێك لەوێنەكانی رێبەر ئاپۆ و ژمارەیەك لەشەهیدانی بزوتنەوەی ئازادیخوازی كوردستان و وڵاتپارێزان و بەرخۆدانڤانانی زیندان و ژنان و دژ بەسێدارە و کیمیابارانی هەڵەبجە دانرابوون. گەریلاكان بەمەراقەوە تابلۆكانیان یەك بەیەك سەیر كرد و گەنگەشەی وێنەكانیان دەكرد.
لەپێشەنگاكەدا، هاوسەرۆكی پەژاك، پەیمان ڤیان ووتەیەكی پێشكەش كرد و دامەزراندنی پەژاك و لەدایكبوونی رێبەر ئاپۆی لەگەریلاكان و بنەماڵە و كەس و كاری شەهیدان و رێبەر ئاپۆ و گەلەكەمان بەگشتی و بەتایبەتی رۆژهەڵاتی كوردستان و ئازادیخوازان و لەوانە ژنان و گەنجان، هەڤاڵانی و تێكۆشەرانی بەرەكانی بەرخۆدان و زیندانیان و لە بەرخۆدانڤانانی سەرشەقام و كۆڵانەكان پیرۆز كرد و ووتی؛ لەدایكبوونی رێبەر ئاپۆ لەچواری نیسان، لەدایكبوونی هەموومانە، لەدایكبوونی پەژاكە و لەدایكبوونی فكر و فەلسەفە و چاندێكی نوێ تێكۆشان و رێبازێكی نوێ تێكۆشان و چارەسەرییە لە رۆژهەڵاتی كوردستان و هەرێمەكە و تەنانەت جیهانیشدا و بەرێكخستنی گەلەكەمانە لەرۆژهەڵات و سەرلەنوێ بۆنیادنانەوەیەتی و بوونە خاوەن ناسنامەیە. بۆیە پەژاك لەرۆژێكی ئاوەها تایبەتدا دامەزراوە.
خاوەنداری گەلەكەمان لەساڵی 1999ەوە بەرفاندن و پیلانگێڕی نێونەتەوەیی دژ بەرێبەرمان و بەشداربوونی سەدان و هەزاران هەڤاڵ و وڵاتپارێز لەریزەكانی گەریلا، و بۆ ئەوەی وەڵامێكی بەهێز بەدۆژمنان بدەنەوە، پەژاكیان دامەزراند و بیست ساڵی تێكۆشانی لەدوای خۆیەوە هێشت و بەم بۆنەوە، هەموو شەهیدان بەبیر دێنینەوە و سەری رێز و نەوازش لەبەردەم قامەتی بەرزیان دادەنوێنین، بەتایبەتی لەكەسایەتی شەهید نەوزاد وەك یەكەمین شەهیدی پەژاك و تا دواین هەڤاڵی شەهیدمان، هەڤاڵ عەبدولرەحمان حاجی ئەحمەدی یادی هەموو شەهیدان بەرز رادەگرین و بەتێكۆشانی ئەو شەهیدانەیە كە تێكۆشانی پەژاك بەرەو سەركەوتن هەنگاو دەنێت و لەسەر رێ و رێبازی شەهیدان بەردەوام بوون بۆ گەیشتن بەهیوا و ئاوات و ئامانجەكانی شەهیدان ئەرك و بەرپرسیاریەتی هەرە مەزنە كە دەكەوێتە سەرشانمان و بەو بیروباوەڕەش برەو بەخەبات و تێكۆشانی خۆمان دەدەین.
لەهەمانكاتدا، كردنەوەی پێشەنگایەكی بەمشێوەیە لەم هەلومەرجەی ژیان و تێكۆشان و بەرخۆداندا، نیشانەی ئاستی بەرزی گرنگیدانی بزوتنەوەكەمان و رێبەرەكەمانە بەهۆنەر و هەموو نرخی شەهیدان و ئەو نرخ و بەهایانەی كە رێبەرەكەمان بۆمانی ئافراندوە لێرەدا نیشان دەدرێت و ووتی؛ شۆڕش بەهۆنەری خۆیەوە دەتوانێت ببێتە چاندێك و لەدڵی گەلدا بەجێ ببێت. رێبەر ئاپۆ ژیانێكی نوێ ئافراند و ئێمەش هەموومان ئازادی خۆمان لەئازادی جەستەیی رێبەر ئاپۆدا دەبینین و لەپێناو ئازادی جەستەیی رێبەر ئاپۆ دەبێت لەهەموو گۆڕەپانەكاندا تێكۆشانمان بەهێزتر بكەین. چونكە ئێمە لەكەسایەتی رێبەر ئاپۆدا خۆمانمان بینیوە و بووینە ئیرادە و بووینە خاوەن رێكخستن و پارتی.
پەیمان ڤیان تیشكی خستە سەر بیست و یەكەمین ساڵیادی دامەزراندنی پەژاك و ئاماژەی بەتێكۆشانی بێ وچانی بزوتنەوەكەی كرد و ووتی؛ پەژاك بەرهەمی رەنج و ماندووبوون و تێكۆشان و شەونەخۆنی و شەهیدبوونی هەزاران هەڤاڵ و وڵاتپارێز و نیشتیمانپەروەرە. پەژاك تەنیا پارتێك نییە لەرۆژهەڵاتی كوردستان و ئێران؛ بەڵكو رێ و رێبازێكی نوێ تێكۆشان و هزر و فەلسەفەیەكی نوێیە كە سەرچاوەكەی فكر و فەلسەفەی رێبەر ئاپۆیە. بۆیە لەدایكبوونی رێبەر ئاپۆ لەهەمانكاتدا لەدایكبوونی پەژاكە.
پەژاك پارتی شەهیدانە؛ چونكە لەسایەی ئەو هەزاران شەهیدەی داومانە پەژاك گەیشتووەتە ئەمڕۆكە و لەسایەی ئەوانەوەیە كە ئەمڕۆ وەك پێشەنگەی شۆڕشی رۆژهەڵات و شۆڕشی ژن، ژیان، ئازادی خۆمان بەبەرپرسیار دەبینین و لەپێناو ویست و ئامانجی شەهیدانەوە بەرەو بەتێكۆشانمان دەدەین.
هاوسەرۆكی پەژاك، پەیمان ڤیان، ووتیشی؛ بەو رۆحەی لەنەورۆزی ئەمساڵدا دەركەوت و بەو بەرخۆدانی و خۆڕاگری و پێكەوەییەی دایكان، ژنان و گەنجان و چین و توێژەكانی كۆمەڵگە لەنەورۆزدا نیشانیاندا و نەورۆزیان كردە نەورۆزیان كردە نەورۆزی گەلان، دەبێت گەلەكەمان لەچواری نیساندا نەمام بچینن و لەپێناو وڵاتێكی سەوز و ئیكۆلۆژیدا رۆژی لەدایكبوونی رێبەر ئاپۆ و دامەزراندنی پەژاك پیرۆز بكەن.
پاش ووتەكانی هاوسەرۆكی پەژاك”پەیمان ڤیان” گەریلاكان هەڵبەست و گۆرانییان پێشکەش کرد و بەبۆنەی بیست و یەكەمین ساڵیادی دامەزراندنی پەژاك و لەدایكبوونی رێبەر ئاپۆ نەمامیان چاند و بەگۆڤەند و هەڵپەڕكێ و بەدرۆشمی”بێ سەرۆك ژیان نابێ، بژی سەرۆك ئاپۆ، ژن، ژیان، ئازادی كۆتاییان بەمەراسیمەكە هێنا.
پارتی ژیانی ئازادی كوردستان ساڵی 2004 دامەزرا و تاكە پارتیە لەرۆژهەڵاتی كوردستان سیستەمی هاوسەرۆكی پەیڕەو دەكات و لەماوەی ئەم بیست و یەكساڵەدا، حەوت كۆنگرەی بەستووە.