ئارام کەریم، ئەندامی مەجلیسی پژاک
سەرچاوە: گۆڤاری ئاڵتەرناتیڤ – ژمارەی ٢٨
كۆنگرەی حەوتەمینی پەژاك كە بە دروشمی؛ “بە فەلسەفەی ژن، ژیان، ئازادی كوردستان ئازاد دەكەین و نەتەوەی دیموكراتیك بونیاد دەنێین”، لەكاتێكدا پێكهات كە سیستەمی مۆدیرنیتەی سەرمایەداری دەیەوێت بەگوشار و رێكارگەلی جیاواز لەوانە سیاسی، ئابوری، سەربازی، چاندی، دیبلۆماسی ئەو هێز و وڵات و گروپ و ئەتنیكانەی خۆڕاگرن و تەسلیم و ملكەچی ئەو زیهنیەت و سیستەمە نابن، بەچۆكدا بهێنن. بۆ سەركەوتنی ئامانجەكانیان یەك لەو رێبازانەی بەكاری دەهێنن، خولقاندنی زەمینەی دەستوەردان و هەڵگیرساندنی شەڕ و بەرفراوانكردنی ئاڵۆزییە. شەڕی نێوان لایەنگرانی ناتۆ و ئەمریكا و ئەوروپا لەلایەك و لایەنگرانی روسیا، چین، ئێران هەرچی دەچێت پەرەدەستێنێت و لەونێوەندەدا كۆمەڵگەكان و گەلان دەبنە قوربانی سەرەكی ئەو شەڕ و ناكۆكیانە، بەتایبەتی شەڕی ئۆكرانیا و روسیا دوای دووساڵ شەڕی نێوانیان بەدەر لەماڵوێرانی و كۆمەڵكوژی و كۆچبەری و برسیەتی و نەخۆشی هیچ شتێكیتری بەدوادا نەبووە. شەڕی نێوان فەلەستین و ئیسرائیل كە ماوەی پێنج بۆ شەش مانگە دەستی پێكردوە بەهەمانشێوە، كودەتاكانی زۆربەی وڵاتانی ئەفریقای باشور لەو جۆرەیە و هەرچی دەچێت، ئەو هێزانە دەیانەوێت لەزۆر شوێنی تردا بەو نزیكبوون و هەڵوەستانەیان ئاڵۆزی و گێرەشێوێنی بنێنەوە و گەلان بەردەنە گیانی یەكتر. لەلایەكی تر لەنێوخۆی ئێراندا شۆڕشی ژن، ژیان، ئازادی لەئارادایە و دۆخی رژێمی ئێران لەو وڵاتە تووشی نەخۆشی نێوخۆیی هاتووە و بگرە لەوانەی باسمان كرد خراپترە.
هەرچەندە رژێمی داگیركەری ئێران لەكۆتاییەكانی ساڵی رابردوو بە هەڵبژاردنێكی فۆرمالیتەی پەرلەمانی و ئەنجوومەنی شارەزایان ویستی ئەو پەیامە بداتە هێزەكانی مۆدێرنیتەی سەرمایەداری كە گەلان و پێكهاتەكانی ئێران بەدەنگەكانیان رەوایەتیان بەرژێم بەخشیوەتەوە، بەڵام لەراستیدا وەك ئەوەی رژێم پروپاگەندەی بۆ كرد كە گوایە 41% گەل بەشداری دەنگدان بوونە، بەپێی داتا بڵاوكراوەكان لەمەدیا وكاناڵەكانی تردا دەردەكەوێت كە شتێكی وا نییە و بگرە لە سەدا بیستی خەڵكی ئێران دەنگیان بەو رژێمە زیاتر نەداوە و ئەو رژێمە بەلای گەلانی ئێرانەوە ئیدی رەوایەتی خۆی لەدەست داوە و بەهیچ شێوەیەك گەلانی ئێران رژێمی فاشیستی دینی ـ مەزهەبی پەسەند ناكەن.
لەلایەكی ترەوە شۆڕشی ژن، ژیان، ئازادی بەشێوە و فۆرمی جیاوازتر پەرە بەبەردەوامی خۆی دەدات و بەتێپەڕبوونی كات، گەلان لەمەوبەدوا زیاتر و بێزارتر و تووڕەتر بڕژێنەوە سەر شەقام و كوچە و كۆڵانەكان و رژێمیش ناتوانێت خۆی لەبەردەم شەپۆلی زیاتری ناڕەزایەتیەكانی گەل رابگرێت، چونكە ئەوانەی لەگۆڕەپانەكاندا خوێن و رەنجیان داوە، بەئاسانی دەست هەڵناگرن و پاشگەز نابنەوە و بۆ دواوە ناگەڕێنەوە.
خاڵێكی تر كە دەبێت راوەستەی لەسەر بكرێت، پەیوەندییەكانی رژێمی ئێرانە لەگەڵ هەردوو بەرەی شەڕەكەدا. لەلایەك دەیەوێت ئەمریكا و ئەوروپا و ناتۆ و نەتەوە یەكگرتووەكان رازی بكات و دەیەوێت بەرێگەی بەرتیل و سازش و سەفەقەی سیاسی لە چارەسەركردنی كێشەكانی دەرەوەی بگاتە رێككەوتن، بەڵام سیستەمی مۆدێرنیتەی سەرمایەداری بۆ ئەوەی ئیمپراتۆریەتی جیهانی خۆی بونیادبنێت و خۆی وەك تاكە هێزی جیهانی نیشان بدات، لەبەرامبەر بە رژێمی ئێران بەم زووانە ناچێتە رێككەوتنێكی ستراتیژیكەوە. واتا رژێمی ئێران نە دەتوانێت بۆ ماوەیەكی درێژخایەن لەگەل روسیا و چین بەردەوام بێت و نە دەتوانێت لەگەل ئەمریكا و ئەوروپا و ناتۆ درێژە بەسیاسەتەكانی خۆی بدات. لەئاستی هەرێمیش دا پەیوەندییەكانی ئێران لەگەل دەوڵەتی تورك و سوریا و عێراق هەرچی دەچێت دەچێتە فازێكی تر و پەل بۆ ململانێیەكی ناوچەیی دەكێشێت. بۆیەش رژێمی ئێران لەدۆخێكی شڵەژاو و ناسەقامگیری نێوخۆیی و دەرەكیدا دەژی، نە ئەوەتا مل بۆ چارەسەری پرسە نێوخۆییەكانی بدات و نە ئەوەتا سیاسەتێكی هاوسەنگ كە بەرژەوەندیەكانی گەلانی ئێران بپارێزێت لەگەڵ وڵاتانی تردا پەیڕەو دەكات.
رژێمی داگیركەری ئێران بەهۆی نزیكبوونەوەی دەسەڵاتخوازی و پاشڤەڕۆیانە ودیكتاتۆرانە و رەگەزگەرایی و دین پەرستی و مەزهەبگەرایی، یاری بەژیانی گەلان و پێكهاتەكان دەكات وكۆمەڵگەش رۆژبەرۆژ لەبێهیوایی و بێ ئومێدیدا دەخنكێنێت. بەشێوەیەكی كۆنكرێت، مۆدێرنیتەی سەرمایەداری خاوەن پرۆژەیەك نییە كە بەرژەوەندییەكانی گەلان بپارێزن و تەنیا دەیانەوێت ئاگری شەڕ و تێكبەردان و قووڵكردنەوەی ناكۆكییەكان پەرە پێ بدەن و شتێكی جیاوازیان لەئەجێندایا نییە.
لەلایەكی تر هەرچوار دەوڵەتی داگیركەری سەركوردستان، بەتایبەتی دەوڵەتانی داگیركەری تورك و رژێمی ئێران نایانەوێت لەبابەتی چارەسەری پرسی كورددا هەنگاوێك بەئاراستەی چارەسەری دیموكراتیك هەڵێنن. بەپێچەوانەوە دەوڵەتی داگیركەری تورك لەهەوڵی پێكهێنانی هاوپەیمانیەتیەكی نێودەوڵەتی و هەرێمی دایە لەبەرامبەر بە بزوتنەوەی ئازادیخوازی گەلی كوردستان و هەموو هەل و دەرفەت و دەرەتانێك بەكاردەبات بۆ لەناوبردن و پاكتاوكردنی بزووتنەوەی ئازادی گەلی كوردستان. ئەمەش نیشانەی بەردەوامی پیلانگێڕیەكی قووڵە كە سەرێكی پیلانگێڕیەكە دەگاتە سیستەمی ئیمراڵی كە رێبەر ئاپۆی تێدا گۆشەگیركراوە و ئەو سەرەكەی دیكەشی دەگاتەوە چیاكانی كوردستان بۆ پەلاماردانی هێزەكانی گەریلای ئازادی كوردستان.
لەم چەند ساڵەی دواییدا بەپێشەنگایەتی دەوڵەتی داگیركەری تورك و سیخوڕی سیستەمی مۆدێرنیتەی سەرمایەداری لەناوچەكە، دەوڵەتە سەردەست و داگیركەرەكانی سەر كوردستانی لەبەرەیەكی دژە كورددا راگرتووە و دەیانەوێت هاوشێوەی رابردوو بەردەوامی بەسیاسەتی كۆمەڵكوژی و كۆچبەری و برسێتی و توانەوەی گەلی كورد بدەن، ئەوەشی جێگەی سەرسووڕمانە، وڵاتە زلهێزە جیهانیەكانیش كە دووسەد ساڵە بە بونیادنانی دەوڵەت ـ نەتەوەی سەرمایەداری لەناوچەكە بوونەتە سەرئێشە و بەڵا بەسەر گەلانی ناوچەكەوە، بەردەوامن لەیارمەتیدان و هاوكاری دەوڵەتە ستاتۆپارێزەكان لەناوچەكە، ئەمەش لەسەدەی بیست و یەكەمدا جێگەی تێڕامان و هەڵوەستە كردنە، بەوەش دۆخێكی مەترسیدار و قەیراناوی لەناوچەكە و لەكوردستان هاتووەتە ئاراوە. ئەو دەوڵەتانە دەیانەوێت بەئینكار و لەناوبردنی گەلی كورد و بزاڤە ئاشتیخوازانەكەی، گەلانی تری ناوچەكەش لەمافە مرۆیی و دیموكراتی و نەتەوەییەكانیان دووربخەنەوە و بێ پێشەنگ و بێ رێبەرایەتی و بێ پرۆژەیان بهێڵنەوە. تەنانەت ئەوەی لەم چەند مانگەی رابردوودا بینیمان بە هاوكاری چەند لایەنەی دەوڵەتانی ئێران و توركیا ژمارەیەك لە پارتەكانی رۆژهەڵاتی كوردستان و ئێران لەباشوری كوردستان و عێراق بەرەو هەڵوەشانەوە برد. ئەو شێوە هاوكاریانە لەبەرامبەر بەشۆڕشی ژن، ژیان، ئازادی لەلایەن رژێمی ئێران و وڵاتانی ئەوروپایی رووی دا. لەبنەمادا ئەو سیستەمە كە هیچ نرخێك بۆ مرۆڤایەتی دانانێت، دەیەوێت بەرەی بەرخۆدانی گەلان لاواز بكەن.
لەدیدێكی گشتیدا ئەوەی دیارە سیستەمی مۆدێرنیتەی سەرمایەداری لەپێناو پاراستنی بەرژەوەندییە ماددییەكانیان و مانەوە لەسەر دەسەڵات، دەیانەوێت ژمارەیەك لەهێزە خۆجەیی و هەرێمیەكان پاكتاو بكەن و بیانكەنە قوربانی چاوچنۆكیەكانی خۆیان و دەسەڵاتەكانیان.
پەژاك لەقۆناخێکی مێژوویدا كۆنگرە دەبەستێت
پەژاك هەست بەقووڵایی ستراتیژیەتی پیلانگێڕی سیستەمی مۆدێرنیتەی سەرمایەداری دەكات و بەخوێندنەوەیەكی بابەتیانە و دوورودرێژ و بەرفراوان و لۆژیكیانە خۆی بەبەرپرسیار دەبینێت لەپێناو پووچەڵكردنەوەی ئەم دۆخە قەیراناویە كە رۆژانە گەلان دەچەوسێنێتەوە و رێگا بۆ كۆمەڵكوژی و برسێتی و لەناوبردن دەكاتەوە. بەتایبەتی وەك لەدروشمەكەشیدا دیارە پەژاك لەبەرامبەر بەسەرخستنی ئامانجەكانی شۆڕشی ژن، ژیان، ئازادی پێشەنگی ئەو فەلسەفە و هزر بەئەركی خۆی دەزانێت دەستەوەستان نەمێنێت و هەموو هەوڵەكانی بخاتەگەڕ.
پەژاك، خاوەن پرۆژەی نەتەوەی دیموكراتیك و خۆسەری دیموكراتیك و كۆنفدراڵیزمی دیموكراتیكە. لەسەر بنەمای ئازادی ژن پشت بەفەلسەفە و پارادایمی كۆمەڵگەیەكی سیاسی ـ ئەخلاقی و ئیكۆلۆژیك دەبەستێت. بۆیەش خۆی لەبەرامبەر بە ناسنامە و شوناسی گەلی كورد و بەتایبەتی رۆژهەڵاتی كوردستان و لەبەرامبەر بەچارەنووسی گەلان و پێكهاتەكانی تری ئێران وەك ئەركێكی ویژدانی، ئەخلاقی و سیاسی و هزری سەیر دەكات.
كۆنگرەی حەوتەمی پەژاك بەخوێندنەوەیەكی قووڵ و بابەتیانە بارۆدوخی سیاسی ئێران، كوردستان، رۆژهەڵاتی ناوین و نێودەوڵەتی هەڵسەنگاند و پرۆژە و پیلان و بڕیاری گونجاوی وەرگرت. لەهەمانكاتدا كۆنگرەی حەوتەم پەنجەی خستەسەر ئەو كەم و كوڕیانەی لەساڵانی رابردوودا روویانداوە یاخود دووبارە بوونەتەوە رەخنە وهەڵوەستەیان لەسەر كرا و بڕیاری پێویست بۆ تێپەڕاندنیان وەرگیرا.
پەژاك، خاوەن تێكۆشانێكی بیست ساڵەیە لەرۆژهەڵاتی كوردستان و ئێران و لەساڵی 2004 لەسەردەستی ئەو شۆڕشگێڕانەی بەرهەمی سەرهەڵدانی ساڵی 1999ی پیلانگێڕی نێونەتەوەیی لەسەر رێبەر ئاپۆ، دامەزراوە و لە بیستەمین ساڵیادی خۆیدا كۆنگرەی حەوتەمی دەبەستێت و كۆنگرەكەی پێشكەشی رێبەر ئاپۆ، بنەماڵەی شەهیدانی رێگای ئازادیخوازی گەلی كودستان و رۆژهەڵاتی كودستان و بنەماڵەی شەهیدانی شۆڕشی ژن، ژیان، ئازادی و گەلانی ئێران دەكات.
بەبەستنی ئەم كۆنگرەیە لەقۆناخێكی وەها هەستیار و چارەنووسسازدا، دەیسەلمێنێت كە تاكە هێزە لەگۆڕەپانی پاراستنی رەوای گەلی كورد لەرۆژهەڵاتی كوردستان و ئازادیخوازان خاوەن هەڵوێستێكی شۆڕشگێڕانەی نەگۆڕەو سەرەڕای هەموو كەم و كوڕیەكانیش، جارێكی تر بەرۆحی ئاپۆیی دەیەوێت برەو بە تێكۆشانی ئازادیخوازانەی گەلەكەمان لەرۆژهەڵاتی كوردستان و گەلانی ئێران بدات و مل بۆ هیچ هێزێكی دەسەڵاتخواز و سەردەست نەوی ناكات.