دەوڵەتی داگیركەری تورك لەچوارچێوەی كۆنسێپی دژە كورد و بەئامانجی قڕكردنی گەلی كورد و دەستكەوتەكانی و بەهۆی دۆڕانی جەندەرمەكان لەبەرەكانی شەڕ و بەرخۆدان لەبەرامبەر بەگەریلاكانی ئازادی كوردستان لەهەرێمەكانی شەڕ لەئاڤاشین، زاپ و مەتینا و خواكورك هەموو پێوانە و یاساكانی شەڕی ژێر پێ ناوە و بەهێرش كردنە سەر ژێرخان و سەرخانی گەلەكەمان لەرۆژئاوا و باشوری كوردستان و بەئامانجگرتنی خەڵكی مەدەنی دەیەوێت قەرەبووی شكستەكانی بكاتەوە، تەنانەت بەهۆی هێرشە قڕکەرەکانی دەوڵەتی داگیركەری تورك لەم چەند رۆژەی رابردوودا بۆ سەر گەلەکەمان لەباكور و رۆژهەڵاتی سوریا ژمارەیەک هاوڵاتی مەدەنی کە لەناویاندا سینەماكاری كورد “مەنسوور كەریمیان” كە لەرۆژهەڵاتی کوردستانەوە بۆ بەڵگەكردن و تۆماری كارەساتەكان و ئەو دەستكەوتانەی گەلەكەمان چووبووە رۆژئاوا، دەكەنە ئامانج و شەهید دەبن.
واتا دەوڵەتی تورکیا بە شێوەیەکی ترسنۆکانە، ناوەندەكانی رۆشنبیری، پەروەردە و خزمەتگۆزاری و شوێنی نیشتەجێ هاولاتیان بەشێوەیەكی دڕندانە و بەچەكی قەدەغەكراو و فرۆكەی بێ فرۆكەوان دەكاتە ئامانج و سڵ لەهیچ پێوانەیەکی مرۆیی ناكاتەوە و رای گشتی جیهانیش لەبەرامبەر ئەو هێرشە هەمە لایەنەی دەوڵەتی داگیرکەری تورک بێدەنگە. بۆیە جارێکی دیکە ئەو هێرشانە شەرمەزار دەکەین و ستایشی بەرخودانی بێ وێنەی گەلەکەمان دەکەین.
هەر لەچوارچێوەی ئەو هێرشانەش فرۆكە بێ فرۆكەوانەكانی دەوڵەتی تورك؛ دوێنێ، بەرواری 27ی كانوون لەكاتژمێر نۆ تا دووی پاش نیوەڕۆ سێ جاران دەوربەری گوندی كانی میرانی سەر بەشارۆچكە پێنجوێن بۆردومان کرد و هاوكات لەنێوان كاتژمێر دوو و نیو بۆ سێ و بیست خۆلەك هەمان رۆژ دوو جاران دەوروبەری گوندی ساڵیاوا بۆردومان کرد. لەئەنجامی ئەو بۆردۆمانانە هیچ زەرەر و زیانێكی گیانی نەكەوتووەتەوە، بەڵام زەرەر و زیانی زۆر بەر رەز و باخی هاووڵاتیان و سروشتی ناوچەكە كەوتووەو بووەتە مایەی نیگەرانی خەڵکی ناوچەکە.
تایبەت ئەو شوێنانەی کە فرۆكەی شەڕكەر و بێ فرۆكەوانەكانی دەوڵەتی داگیرکەری تورك بۆردومانی كردوون، شوێنی نیشتەجێ هاووڵاتیانی مەدەنییە و هێزەكانی ئێمە دوورن لەو ناوچانەوە. بۆیە پێویستە گەلەكەمان لەهەرچواربەشی كوردستان و دەرەوەی وڵات و باشوری كوردستان و تایبەت گەلەکەمان لەرۆژهەڵاتی کوردستان لەبەرامبەر بە دەستدرێژیەكانی دەوڵەتی فاشیستی تورك بۆ سەر گەلەكەمان خاوەن هەڵوێست بێ.
ناوەندی راگەیاندنی یەرەكە
٢٨\١٢\٢٠٢٣