سەرەتا لە کەسایەتی نیکا شاکەرەمی، ئەسرا پەناهی، سارینا ساعیدی، مەهسا مۆگویی، سارینا ئیسماعیلزادە هەموو شەهیدانی ژن و جوان و لەناودا خویندکاران و سەرجەم شەهیدانی رێگای شۆڕشی حەقیقەت کە پێشەنگایەتی شۆڕشی ژن ژیان ئازادی دەکەن، وەبیر دێنینەوە.
سەرهەڵدان و خۆڕاگری مێژووی رۆژهەڵاتی کوردستان و ئێران کە بە بیر و فەلسەفەی رێبەر ئاپۆ گەش و گەشتر دەبێ، دوای ٦ مانگان دەربازی قۆناخێکی نوێی تێکۆشان بووە. دژایەتی و سەرکوتکاری داگیرکەری ئێران بۆ ئەوەی هەڵوێستی کۆمەڵگا لاواز بکات، رۆژانە رێ و رێبازی شەڕی تایبەت بەکار دێنێت و بەو کردەوانە پەلەقاژەی دوا ساتەکانی تەمەنی دەسەڵاتداری خۆی دەکا. ئەوەش نیشاندەری لووتکەی لاوازی دەوڵەت – نەتەوەیە کە راستینەی رماندن و داتەپێنی خۆی پەردەپۆش پێ دەکات.
سەرەڕای ئەو هێرشە پان و بەرینەی رژێم بە رێ گرتن و ئەشکەنجە و بەرزبوونەوەی رێژەی سێدارەدان شاهیدی ئەوەین کە سیاسەتی داگیرکەری و کۆمەڵکوژی رژێم بە ئەنجام نەگەیشتوە. لەبەر ئەوە رووی لە خوێندکاران کردوە و پەلاماری سەر خوێندنگاکانی کچانە دەدات. ئەوە راستییەکی حاشاهەڵنەگرە کە پێشەنگانی شۆرشی ژن ژیان ئازادی گەنجانن. لە ناو گەنجانیشدا قوتابی و خویندکاران رەنگدانەوەیەکی دیارکەریان هەبوو. خۆ بە رێکخستن کردنی قوتابیانی کچی دەبیرستانی و زانکۆکان و رژانەسەر کۆڵان و شەقامەکان رووداوێکی مێژوویی – کۆمەڵایەتیە کە بۆتە کابووسی دەسەڵاتداری نیو سەدەی وەلایەتی فەقێ. دەتوانین بڵێن بۆ یەکەم جار لە مێژووی ئێران خوێندکاران ئەرکی راستەقینەی خۆیان گرتۆتە ئەستۆ و بە هێز و ئیرادەی پۆڵایینیان خوێندنگا و شەقامەکانیان خرۆشاندووە. ئەو هێزە پێشڕەوە سەلماندیان کە خاوەنی راستەقینەی زانکۆ، قوتابخانە و شەقام، گەنجانی ئەم وڵاتەنە و جێیەکیان بۆ بەکرێگیراو و داربەرەستانی دەوڵەت، وەک بەسیج، نەهێشتۆتەوە. کچانی دەبیرستانی، گۆڕەپانێکی وەک قوتابخانە کە بە هەزاران ساڵە، دەسەڵات ئەسپی زۆرداری خۆی تێدا تاو دەدات، لە زۆردارانی گرتەوە و پێشکەشی مامۆستای راستەقینە، واتا کۆمەڵگایان کردەوە. لە دەست دانی گۆڕەپانێکی وەک پەروەردە بۆ سیستمی دەسەڵاتداری تۆقێنەرە و رژێم بەرەو لە ناو چوون دەبا. بۆیە سیستەم کەوتۆتە هەوڵی تۆڵەسەندنەوە لە قوتابیان و بە رێبازێکی ترسنۆکانە بە ژەهراوی کردنیان هێرش دەباتە سەر کچانی پێشەنگی دەبیرستانی و دەیەوێت پێشەنگانی شۆرش بێکاریگەر و لەگۆرەپانی تێکۆشان و بەرخودان وەلاوە بنێت. ئەو بنەماڵانەی کە خاوەنداری لە منداڵەکانیان دەکەن، سەرکوت و دایاندەپڵۆسێنن. چونکە بە پلان و زانابوون ئەو شوێن و پێکهاتەیان کردوەتە ئامانجی هێرشەکانیان تا رژێم هەژمۆنی دەسەڵاتداری خۆی بە سەر گەل و کۆمەڵگاوە ساز بکاتەوە.
لەو پێناوەدا وەک کۆمەڵگای جەوانانی رۆژهەڵاتی کوردستان و یەکێتی ژنانی جەوانی رۆژهەڵاتی کوردستان و ئێران، ژەهراوی کردنی کچانی خوێندکار کە بە درووشمی ژن ژیان ئازادی لەدژی فاشیزم و داگیرکەری لەلووتکەی بەرخودان دان، هاوشێوەی ئەو هێڕشانەی کە بە چەکی کیمیاوی دەکرێتە سەر گەریلاکانی کوردستان لە زاپ، ئاواشین و مەتینان لەقەڵەم دەدەین. چونکە ژەهراوی کردن و بە کارهێنانی هەر جۆرە چەکی دژە مرۆیی و لەناودا چەکی کیمیایی، کولتوورێکی فاشیستانە و پیاوسالارانەیە کە بە هیتلێر و سەدام دەستی پێکرد و بە ئەردۆغان و خامنەیی بە ڕێ و رێبازی چەپەڵ بەردەوام دەکات. بۆیە وەک گەلی کورد لە بۆن و هەڵمژینی گازی کیمیایی و ئەو رێبازانەی شەڕی تایبەت نامۆ نین. بۆیە نەیارانی کورد و دیموکراسی ئیدی لەو بابەتانەدا خەیاڵیان خاوە، کە بەو رێ و رێبازانە گەنجان و ژنانی کورد و گەلانی ئازادیخواز لەتێکۆشان پاشگەز بکەنەوە. چۆن داگیرکەرانی کوردستان بە ساڵانە بە بەکارهێنانی چەکی کیمایی لە شاخەکانی کوردستان لەدژی کچ و گەنجانی گەریلا نەگەهێشتوونەتە ئەنجام، بۆیە هەرگیز لەسەنگەرەکانی بەرخودان و تێکۆشانی گەل وەک خوێندنگاکانی کچانەش ئەنجام ناگرن.
بۆیە وەک هێزی پێشەنگی گەنجان بەڵێنمان دووپات دەکەینەوە کە ئەو هێرشە دڕندە و نامرۆیانە بە بێ وڵام ناهێڵینەوە و بە پشتیوانی و یەکانگیری لەگەڵ گەنجان بە گەشانەوەی شۆڕشی ئازادی ژن تۆڵەی ئەو پیلانە نەگریسانە دەستێنینەوە. هەر وەها داوا لە تەواوی گەنجان، بە تایبەت قوتابیان و خویندکاران دەکەین کە لەبەرامبەر ئەو هێڕشانە بێ دەنگ نەبن و بە یەکگرتوویی و تەبایی بڕژنە سەر شەقامەکان تا تاوانبارانی ئەو کۆمەڵکوژی و جەنایەتانە کە دەیانهەوێ کۆمەڵگای گەنجان و ژنانی گەنجی پێ دابمرکێنن بە سزای پێویست بگەیەنن و پێویستە بنەماڵەکان لەم قۆناخە دژوارەدا بە پشتیوانی و هانای رۆڵەکانیانەوە بچن و ریزەکانی شۆڕش پتەوتر و بەرین تر بکەن.
کۆردیناسیۆنی کۆمەڵگای جەوانانی رۆژهەڵاتی کوردستان ـ KCR
٥/٣/٢٠٢٣