ئامەد شاهۆ
لەگەرماوگەرمی شەڕی جیهانی سێهەمدا هەڵسەنگاندن و شرۆڤە کردنی کولتووری توندوتیژی و شەڕ و ئاژاوەگێڕی و تیرۆر لە لانکەی رۆژهەڵاتی ناوین و پەیڕەو کردنی لەلۆژیکی دەوڵەت – نەتەوە هەرێمیەکان و سیستەمی مۆدێڕنیتەی سەرمایەداری و پاسەوانەکانیان زۆر گرنگ و بایەخدارە. چون هەڵگرساندنی شەڕی ماڵوێرانکەر و قووڵ بوونەوەی قەیران و گێژاو لەهەرێمەکە نیشان دەدات کە توندوتیژی و شاڵاوی تیرۆر لەهەر ماڵ و دەزگایەکی کۆمەڵگای رۆژهەڵاتی ناوین بە خەستی بڵاو بووەتەوە و شیرازەی کۆمەڵگا و ئیرادەی ئازادی تاکەکانی رووبەڕووی هەڕەشەیەکی جیدی کردووەتەوە. تایبەت لۆژیک و زیهنیەتی تیرۆر؛ رۆڵێکی دیاریکراوی لەبونیادنانی سیاسی، کۆمەڵایەتی، کولتووری، پەروەردەیی، تەندروستی و تەنانەت بونیادی ئابووری ناوچەکەش داناوە. واتا داگیرکەرانی کوردستان بە رێگای پەرەپێدانی تیرۆر و تیرۆریستەوە بەرگری لەبەرژەوەندی و زیهنیەتی دەسەڵاتخوازییان دەکەن. بەو پێیە چەندێک پانتایی تیرۆر و توندوتیژی بەربڵاو بێت، بەو ئەندازەیە دەسەڵاتی رەهایان بە سەر گەل و کۆمەڵگا دەسەپێنن و کۆمەڵگا لەناو زەلکاوی بێ ناسنامەیی، هەژاری، بێکاری، ماڵوێرانی و کۆچبەری نۆقم دەکەن و زەین و هۆشی تاکەکانی کۆمەڵگا پەلکێشی چەمک و لۆژیکی توندڕەویی و تیرۆریستی دەکەن. چون تا زیهنیەت و ویژدانی کۆمەڵگا بەو دیاردە چەپەڵانە داگیر نەکەن، ناتوانن لەناو خەیالی فراونخوازی و هەژمۆنییان ئاوژەنی بکەن.
رێبەر ئاپۆ لەبەرگرینامەی پاراستنی گەلدا راشکاوانە ئاماژەی بەوە داوە کە؛ «دەسەڵات و توندوتیژی دوو برای دووانەن». واتا ئەو کۆمەڵگایانەی کە بە دەسەڵات ئاشنابوون، راستەوخۆ لەتوندوتیژی تێوە گلاون و لەپێناو پەرەپێدانی تیرۆر و تیرۆریزمی دەوڵەتی کار دەکەن. واتا لەکۆمەڵگایەک کە دەسەڵات تۆقێنەر و ناوەندی بێت، دیاردەی تیرۆر و تیرۆریست روو لەهەڵکشان دەکات. بازنەی تیرۆری دژ بە گەلی کورد ئەمڕۆ لەژێر ناوی شەڕ لەدژی تیرۆر، هێرشی پاکتاوکاری و قڕکردن بەڕێوە دەبەن. واتا تورکیا لە هێرشی ١٧ی نیسان بۆ سەر هەرێمی زاپ و ناوچەکانی دیکەی کوردستان لەلایەن بەریتانیا، ئەمریکا و ناتۆوە، رۆڵی پەلەپیتکەی چەکی سەرمایەداری (لێڤی ئاتهانی هاوچەرخی) پێدراوە، چون دەسەڵاتی حاکم لەسەر ئەو وڵاتە لەپێناو مانەوەی لەسەر دەسەڵات هزری تیرۆر لەناوچەکە بەربڵاو دەکات و لەهیچ جۆرە کردەوەیەکی تیرۆریستیش سڵ ناکاتەوە. چون دەوڵەتێک کە بە هەوێنی دەسەڵات گرسابێت، جیا لەپەرەپێدان و گەشەدانی تیرۆر و تیرۆریزمی دەوڵەتی ئامانجێکی دیکەی نابێت. کردەوەکانی ئەو دەوڵەتە لەرۆژهەڵاتی ناوین و بە تایبەت لەکوردستان بە کراوەیی ئەوە پشتڕاست دەکاتەوە کە جیا لەهەڵگرساندنی شەڕ، داگیرکەری، تاڵان، کۆمەڵکوژی، پشێوی، دووبەرەکی نانەوە و قووڵکردنی قەیران و تیرۆر شتێکی دیکە نازانێت و ئەوەش هەڕەشەیەکی جیدی بۆ مرۆڤایەتییە. بۆیە هێزە هەژمۆنگەرا جیهانیەکان چ ئان و ساتێک دەیانەوێت پیلان و پڕۆژەکانیان بەربڵاو بکەن و پەرە بە شەڕ و ئاژاوەگێڕی و دووبەرەکی ناو گەلان بە تایبەت گەلی کورد بدەن، دەوڵەتی تورک وەک پەلەپیتکەی تیرۆر و پەدەکەش وەک پەلەپیتکەی خیانەت بە کار دەبەن. ئەمەش پڕۆژەیەکی سەد ساڵەیە کە لەم سەردەمەدا ماوەی بە سەر دەچێت و بە تێکۆشانی نەبەزانەی گەلی کورد و رۆڵە قارەمانەکانی بازنەی تیرۆر و خیانەت پارچە و هەڵدەوەشێتەوە و پەلەپیتکەی تیرۆر و خیانەت دەکەونە ناو زبڵدانی مێژووە.
سەرەڕای ئەو خوێندنەوەیە بنەماڵەی بارزانی و پەدەکەش بوونەتە پارچەیەک لەو پیلانە مەترسیدارە و بە ئەرێ کردنی بازنەی تیرۆر، رۆڵی پەلەپیتکەی خیانەت بە بارزانی و پەدەکە بەخشراوە. لەکاتێکدا ئەوەش بە دوور لەگەوهەر و راستی کۆمەڵگای کوردییە. ئەوەش دەرفەتی ئازادی، دادپەروەری و دیمۆکراسی لەکوردستان لەبار دەبات و پەدەکەش هاوشێوەی هاوپەیمان و هاوسەنگەری خۆی جیا لەترس، تۆقاندن، رفاندن، گرتن، کوشتن، بڵاوکردنەوەی هەژاری و بێکاری قەرەی شتێکی دیکە نەکەوێت. ئەوەش تەنیا خزمەت بە پڕۆژەی داگیرکەران دەکات. چون هەڵبژاردنی بژاردەی سیاسی پەدەکە، بژاردەیەکی مەترسیدارە. واتا پەلەپیتکەی خیانەت، لەقازانجی پڕۆژەی ئەردۆغان و ناتۆ کار دەکات و دەستکەوتەکانی گەلی کورد دەخاتە ژێر مەترسییەوەو بنەماڵە و پارتێک بەرەو بێ ئیرادەیی و کوێلەتی پەلکێش دەکات. بەشداری پەدەکە لەهێرشی ١٧ی نیسانی ٢٠٢٢ی دەوڵەتی فاشیستی تورکیا بۆ سەر هەرێمەکانی پاراستنی میدیا، رۆڵی کراوەیی پەدەکە و بارزانی لەو هێرشە داگیرکاریەدا دەخاتە بەرچاو کە بە چ شێوەیەکی مەترسیدار رۆڵی پەلەپیتکەی خیانەت دەگێڕێت و لەپێناو مانەوەی ئەردۆغان لەسەر کورسی دەسەڵات و پاراستنی بەرژەوەندی تەسکی بنەماڵەیی بە هەموو شێوەیەک خزمەتی هێڵی داگیرکەری و خیانەت دەکات و بەڕەنگاری هێڵی خۆڕاگری و تێکۆشان رەوای گەلی کورد دەبێتەوە. لەکاتێکدا ئەم شەڕە بۆ هەر لایەنێک بە واتای مان و نەمانەو شەڕێکە کە هەر تاکێکی کورد لە هەر قوژبنێکی جیهان دەخاتە ژێر بەرپرسیارییەوە. بۆیە هۆشیاری و هەستی وڵاتپارێزی و نیشتمانپەروەری هەر تاکێکی کورد و مرۆڤێکی ئازادیخواز لەم شەڕە چارەنووسسازەدا، هزری تیرۆر و توندوتیژی دەوڵەتی فاشیستی تورکیا و بنەماڵەی بە کرێگیراوی بارزانی تێکدەشکێنێت.
ئەمڕۆ گەلی کورد بە هەموو شێوەیەک رووبەڕووی شاڵاوێکی تیرۆر و کۆنسێپتێکی پاکتاوکاری بووەتەوە و ئەوەش مایەی نیگەرانییە. تایبەت هەندێک هێز و لایەن وەک پەدەکە و هێزە دەمامکدارەکانی رەوایەتی بەو شاڵاوە مەترسیدارە دەدەن و پاساو بۆ کردەوە تیرۆریستیەکان خۆش دەکەن و لەشکەرکێشی و داگیرکاری وڵاتێک لەلایەن هێزێکی تیرۆریستی بە کردەوەیەکی ئاسایی لەقەڵەم دەدەن و جادەی تیرۆر و داگیرکەرییان بۆ خۆشتر دەکەن و بە جێگای پاڵپشتی و هاوکاری رۆڵە قارەمانەکانی کورد، چاوساخی و دژایەتی و تەنانەت بەشداری شەڕی داگیرکەری و خیانەت دەکات. لەکاتێکدا گەلی کورد تاکە بیانووی شەڕ کردنی، پاراستنی هەبوون و کەرامەتی خۆی دەکات و لەپۆزسیۆنی خۆپاراستندایە و بەو پێیە بەرگری لەبوون و ناسنامەیەک دەکات کە لەژێر هەڕەشەی قڕکردن و پاکتاوکاریدایە.
نەیارانی کورد دەیانەوێت ئیرادەی ئازادی گەلی کورد لەناو ئاشی دەسەڵات بهاڕن و گەلێکی بێ ئیرادە و کوێلە بئافرێنن کە لەپێناو پلان و بەرنامەی هێزە هەژمۆنگەراکان بجووڵێتەوە. بۆیە بە رێگای ئایین، فەلسەفەو تەنانەت زانستی دەوڵەتییەوە دەیانەوێت رەوایەت بە تیرۆر و کردەوە توندوتیژییەکانیان بدەن. لەکاتێکدا تیرۆر و توندوتیژی چالاکییەکی دەرەوەی مرۆڤایەتییە. بەڵام ئەمڕۆ لەژێر ناوی یاسا و رێسای دەوڵەتی، تیرۆر و توندوتیژی وەک کردەوەیەکی مرۆیی رەوایەتی پێدەدرێت و لەدژی گەل و کۆمەڵگا بە سیستەم کراوە. ئەوەی جێگای پێزانین و بایەخە بە پێی کام یاسا و رێسا قسەکردن هەڵدەگریت؟! چون هێرشێکی پاکتاوکاری و قڕکردن لەسەر گەلی کورد بەڕێوە دەچێت، گوایا بە یاسا و پاراستنی مافی مرۆڤ خەمڵێندراوە. واتا بازنەی تیرۆری گەلی کورد بە پێی یاسای ئەورووپا و داگیرکەرانی کوردستان، گەلی کوردیان تیرۆریزە کردووە و تایبەت تەڤگەری ئازادیخوازی کورد کە بەرپەرچی زیهنیەتی تاڵان و داگیرکەری لەکوردستان دەبێتەوە، خراوەتە لیستی رێکخراوە تیرۆریستیەکان. هاوکات بە پێی هەمان یاسا رەوایەتی بە لەشکەرکێشی و داگیرکەریەکانی تورکیا و هاوپەیمانەکانی دەدرێت. هەروەها بە پێی هەمان یاسا رفاندن، دیلگرتن و سەپاندنی گۆشەگیری توند سەر رێبەر ئاپۆ رەوایەت پێدەدەن و تەنانەت بە کارهێنانی هەر جۆرە چەک و تەقەمەنی و بە تایبەت چەکی کیمیایی لەدژی گەریلا بە کار دەبەن و ئەوەش لەژێر پەردەی یاسا ئەنجام دەدەن. لەکاتێکدا ئەوە یاسای داگیرکەرییە و گەلی کورد و دۆستانی کورد هەرگیز ناچنە ژێر باری یاسایەک کە بەرگریکاری تیرۆر و تیرۆریست و بە کوێلەکردنی تاک و کۆمەڵگا و قڕکردنی دەکاتە ئامانج.
هاوکات دەوڵەتانی داگیرکەری وەک تورکیا و ئێرانیش بە پێی یاسای وڵاتەکەیان گەلی کورد کۆمەڵکوژ، دەستگیر، زیندانی و تیرۆر دەکەن و دەربڕینی ناڕەزایەتی و بە دەنگ هاتن دەخرێتە خانەی تیرۆرەوەو بەو لۆژیکە ماڵ لەخاوەن ماڵ حەرام دەکەن. واتا تیرۆر لەکوردستان لەلایەن ئەو دەوڵەتانەوە بە یاسایی کراوەو ناتۆ، ئەمریکا و ئەورووپا راشکاوانە پاڵپشتی و هاوکاری هێزی تیرۆر و تیرۆریست دەکەن و لەلایەکی تریشەوە بانگەشەی ئازادی و دیمۆکراسی ناو بەتاڵ دەکەن. بۆیە بە پێی ئەو راستییە یاسا بۆ خۆی لەکوردستان بە واتای سەپاندنی بێ رەوشتییە. کپ کردنی دەنگی ئازاد و هێڵی دیمۆکراسی و ژیانی ئازادە. کەلەپچەیەکە کە ناسنامە، زمان، ئیرادە و بوونی گەلانی پێی قوفڵ دەکرێت و بەرهەمی تیرۆر و تیرۆریستی لێ سەوز دەبێت. بۆیە سەرچاوەی هەر تیرۆرێک لەکوردستان بۆ ئەو یاسا دەوڵەتییە دەگەڕێتەوە کە رێکەوتنی لەسەر کراوە کە رۆژانە گۆمی خوێن بەرپا دەکات و سەکۆی مافەکانی مرۆڤ و میدیا بە ناو بێ لایەنەکان کەڕ و کوێرن. ئەو کات یاسایەک کە هەڕەشە لەسەر هەبوون، ئیرادە و ئازادی گەل و کۆمەڵگایەک درووست بکات، تێکۆشان و بەڕەنگاربوونەوە لەبەرامبەری رەوایە، چون ئەو یاسا گەلی کورد و تەڤگەرە ئازادیخوازەکەی بە تیرۆریست لەقەڵەم دەدات و مافی دەستەبەرکردنی ژیانی ئازاد و دیمۆکراتیک بە گەلی کورد نادات.
سەرجەم سیستەمەکانی پلەداری و کۆمەڵگای دەوڵەتی لەناویاندا دەوڵەتی تورک و پەدەکە بە پشتبەستن بە توندوتیژی و تیرۆر دەسەڵاتداریان دەپارێزن و گوایا ستاتۆ و هەژمۆنی داهاتوویان ئاوا دەکەن. بۆیە دوا شانسی مانەوەیان لەسەر کورسی دەسەڵات و درێژکردنەوەی تەمەنیان، بەندە بە هەڵگرساندنی شەڕێکی درێژخایەن کە ئێستا تێدا چەقیون. بێگومان ئەنجامەکەی بۆ ئەو هێزە شەڕانگێز و تیرۆریست و خائینانە، مەرگەساتبار دەبێت و بەو کردەوانەیان دارەمەیتی مردن بۆ خۆ فەراهەم دەکەن. چون سەردەمی دەوڵەت – نەتەوە بە سەرچووە و بە قووڵ کردنەوەی قەیران و گێژاو ناتوانن داهاتوویەکی روون لەپێناو بەرژەوەندی دوسەڵاتیان گەرەنتی بکەن. چون گەرەنتی مانەوەی هەر هێزێک بەندە بە چارەسەری مێژوویی و ئاشتیانەو دیمۆکراتیکی کێشەی کورد کە بە بژاردەی موزاکرەی دیمۆکراتیک دەستەبەر دەبێت.
رێبەر ئاپۆ، پەکەکە و گەریلاکانی ئازادی کوردستان بە فەلسەفەی بەرخۆدانیان لەئیمڕاڵی، زاپ و هەرێمەکانی پاراستنی میدیا، بەڕەنگاری زیهنیەت و یاسایەک دەبنەوە کە ئازادی، دادپەروەری، پێکەوە ژیانی گەلان و دیمۆکراسی لەبار دەبات. بۆیە بەرخۆدان و تێکۆشانی بێ وچانی رێبەر ئاپۆ و گەریلاکانی کوردستان هیوای گەهێشتن بە ژیانی ئازاد و دیمۆکراتیک گەشاوە دەکات و کوردستان و کۆمەڵگایەکی ئازاد، دادپەروەر و دیمۆکراتیک بونیاد دەنێن کە خەون و خەیاڵی مرۆڤایەتییە.