ئامەد شاهۆ
بە شانۆنامەی هەڵبژاردنی خولی سێزدەهەمینی سەرۆک کۆماری ئێران و هەڵبژاردنی کارتۆنی خولی شەشەمی شۆرای شار و گوندەکان کە لەڕێکەوتی ٢٨ی جۆزەردان بەڕێوە دەچێت، نزیک دەبینەوە و دەرهێنەر و ئەکتەرەکانی ئەو شانۆنامە لەهەوڵدان کە تەنووری هەڵبژاردن گەرم و گوڕتر بکەن و بە سیناریۆی ماوە بە سەرچوو و بەڵێنی ساختە و درۆی قەڕن، مانەوەیان لەسەر کورسی دەسەڵات درێژ بکەنەوەو بە هەرا و هووریا، بەربەست لەبەردەم هەرەسی سەرتاسەری بایکوتی هەڵبژاردن دابنێن. تۆمارکردنی ناوی بەربژێرەکانی سەرۆک کۆماری بە فەرمی لە ٢١ی گوڵانەوە دەستپێدەکات و بانگەشەی فەرمی هەڵبژاردن، ٧ی جۆزەردان راگەیەنداراوە کە تا ٢٦ی جۆزەردان، ململانێیەکی نمایشی لە هەڵبژاردنی ساختە و کۆنتڕۆڵ کراو، بەردەوام دەبێ. ئەوەش قۆناخێکی چارەنووسسازە کە هەر کەس چاوەڕێی کاتژمێرەکانی دەرئەنجامی ئەو قیامەتەیە.
کاربەدەستانی رژێم بۆ مانەوەیان لەسەر کورسی دەسەڵات دەیانەوێت بە بانگەشەی پڕوپووچ و بێ بنەمای شانۆی هەڵبژاردن، تەواوی گەل و کۆمەڵگا بخەنە سەفەربەرییەوە، تا بگەنە مەرام و ئامانجە چەپەڵەکانیان کە بۆ خۆیان دەستنیشانیان کردووە. ئەوەش لە کاتێکدایە کە ئەو سەفەربەرییە، دەبێتە بوومەلەرزەی سیاسی بۆ رژێم کە سەرجەم بەرنامە و پیلانەکانیان سەراوژێر و پێچەوانە دەکات و شکستێکی قورس و جەرگبڕ لە نیو سەدەی قەڕن تۆمار دەکات. واتا لەبەر ئەوەی مێشکی کاربەدەستانی رژێم لە پێناو نوێکاری و دیمۆکراتیزەکردنی وڵات، وەک بەرد رەق هەڵهاتووە کە شیمانەی دووپات بوونەوەی بوومەلەرزەی سیاسی هاوشێوەی هەڵبژاردنی ساڵی ١٣٨٨ و تەنانەت بە گوڕتر لەو، لە ئارادایە کە قوتاربوونی رژێم لەو قیامەتە زۆر ئەستەم دەبێ.
چون کارنامەی ٤١ ساڵەی رژێم ئەوەندە بێ خێر و بێ کەڵکە و لێوانلێوە لە؛ درۆ، فرت و فێڵ، زۆڵم و زۆرداری، داگیرکەری، گەندەڵی، گرتن و لە سێدارەدان. ئەوەش هیوای بەشداری گەلی لە هەر جۆرە پڕۆسەیەکی داگیرکەری و تاڵانی بۆ رژێم لەبار بردووە کە رژێم بە ناچاری بە بانگەشەی بەتاڵ و بەڵێنی بریقەدار، دەیەوێت گەل پەلکێشی سەر سندووقی دەنگدان بکات. دەسەڵات و دەوڵەتی ئێران لە ژێر شانۆی هەڵبژاردندا جارێکی تر دەیانەوێت گەل لە ئیرادەی سیاسی و مافی دیمۆکراتیک بێ بەش بکەن و کۆمەڵگا لە چەکی بەرگری رەوایان داماڵن. واتا کەشێک دەخوڵقێنن کە گەل لەناو بژاردە دەستنیشان کراوەکانی رژێم، بە ناچاری بژاردەیەک هەڵبژێرن و تەسلیمی ویست و حەزی پیلانە سەپێنراوەکان ببن، ئەوەش لە قازانجی دەسەڵات ناشکێتەوە و ئەو سیاسەتەی رژێم ئەو کەشە دەخولقێنێت کە بازاڕی هەڵبژاردن ببێتە بازاڕی بورس و رژێم رکوردی کەمترین رێژەی بەشداری گەل لە مێژووی هەڵبژاردنەکانیدا تۆمار بکات.
کاربەدەستانی رژێم بۆ کەم کردنەوەی کاردانەوە و تووڕەیی رای شەقام، چەند مانگە بە بۆردومانی میدیایی لەسەر فەتح کردنی رۆح و هزری کۆمەڵگا کار دەکات و بۆ سەرکەوتنی مۆرەکانی خۆی لە شەڕی دەسەڵات، دەرفەت خۆش دەکات، تاوەکوو بە قەناعەت هێنان و لاواز کردنی کۆمەڵگا و تێکشکاندنی دیواری خۆڕاگری گەل، سەرکەوتنی لە پڕۆسەی هەڵبژاردنی دەسەڵات مسۆگەر بکات. بەڵام ئەقڵی هاوبەش و ویژدانی هۆشیاری کۆمەڵگا، باڵاتر لەو خەون و خەیاڵەی رژێمە کە بۆ خۆی گرساندوویە و ئیرادەی پۆڵایینی گەل، سەرجەم حیساب و کیتابەکان سەراوژێر دەکەن و لە دژی داگیرکەری، تاڵان و چەوسانەوە، فازێکی نوێی تێکۆشانی دیمۆکراتیک لە ئێران سەرهەڵدەداتەوە کە جیاوازتر لە سەرجەم قۆناخەکانی رابردوو دەبێت.
دۆخی شڵەژاو و سەرلێشێواوی کاربەدەستانی رژێم، حەقیقەتێک وێنا دەکات کە هێز و بڕیاری چارەسەری گیروگرفتەکانی زۆر لاواز بووە و رژێم بۆ خۆی بووەتە گەورەترین کۆسپ و کێشە لەبەردەم گوزەران، ئاسایش و ئارامی و خۆش بژێوی گەل، بۆیە رژێم دەیەوێت سەرجەم کێشە و گرفتەکانی ئێران بە کلیدە رزیوەکەی روحانی و بەختی هەڵبژاردن بکاتەوە و هەموو هیوا و ئومێدی خۆی بەم هەڵبژاردنە بەستوەتەوە. بەڵام رژێم لەناو زەلکاوی کێشە ناوخۆیی و دەرەکیەکان خنکاوە و ئەوەی خۆی بە رژێمدا هەڵبواسێت، هاوشانی رژێم گیرۆدەی ئەو زەلکاوە دەبێت. بۆیە لەو بڕوایەدام ئەنجامی ئەم هەڵبژاردنەش کێشە و گرفتەکانی ناوخۆ و دەرەوەی رژێم لە سەردەمی سەرۆک کۆماری ٨ ساڵەی روحانی زیاتر بکات و ئەوەش رژێم لەناو گێژاوی سیاسی، کۆمەڵایەتی و ئابووری دەگەوزێنێت و دۆخی ناوخۆی ئێران ئاڵۆزتر و نالەبارتر دەبێت.
دەرئەنجامی تووڕەیی گەل لە کارنامەی کاربەدەستانی رژێم لەم خولەی هەڵبژاردن نیشانی دەدات کە کۆمەڵگا نابێتە دەوڵەت و ئیدی چارەنووسی خۆی بە سیاسەتی نادیمۆکراتیک، چەواشەکار و گەندەڵی رژێم گرێ نادات و ئەو دەوڵەتەش کە بە زوڕناژەنی و زۆرەملێ خۆی بە دەوڵەتی گەل وەسف دەکات، نابێتە دەوڵەتی گەل و کۆمەڵگا، بەڵکوو ئەوە تەنیا درووشمێکی بێ ناوەڕۆک و بێ واتایە کە لەپێناو رەوایەت بەخشین بە داگیرکەریەکانی بانگەشەی دەکات. هەرچەندەیش رژێم دیاردەکانی میللی گەرایی، رەگەزگەرایی، ئاین گەرایی و زانست گەرایی تۆختر بکاتەوە، وەک گولەیەکی چرووکن کە ناتەقن و کاریگەرییان لەسەر کۆمەڵگا کەم بووە و بە پێچەوانەوە تۆخترکردنیان زیاتر رژێم بەرەو داڕمان دەبات و سنووری دەسەڵاتداری بەرتەسکتر دەکات. چون ئەنجامی هەڵبژاردنی خولی یازدەهەمی پەڕلەمان، پایەکانی رژێمی بە توندی هەژاند و رەوایەتی رژێمی خستە ژێر پرسیارەوە و ئەگەری زۆر لەئارادایە کە لە هەڵبژاردنی خولی سێزدەهەمی سەرۆک کۆماری، دوا بزماری تێکۆشانی دیمۆکراتیکی گەل لە تابووتی داگیرکەری ئێران بدرێت و رژێم یەکجارەکی قورسایی و رەوایەتی خۆی لەناو گەلان لەدەست بدات.
کردەوەکانی رژێم وای کردووە کە گەل بە زۆرەملیش بێت، پەلکێشی سەر سندووقەکانی دەنگدان نەبن و مەودای نێوان گەل و دەسەڵات فراوانتر ببێ. ئەو حەقیقەتەش بۆ ئەوە دەگەڕێتەوە کە رژێم سڵی لەخۆ نوێکردنەوە و هەڵنانی هەنگاوی دیمۆکراتیک هەیە، بۆیە متمانەی خۆی لەنێوان گەلانی ئێران لە دەستداوە. پێداگری رژێم لە سیاسەتی نادیمۆکراتیک و کۆنەپارێزانە، کۆمەڵگاکانی ئێرانی بەرەو هەڵدێر و پووکانەوە دەبات و بەو پێیە سەرجەم دەرفەتی دیمۆکراتیک و پێکەوە ژیانی گەلان لەبار دەبات.
کارنامەی ٤١ ساڵەی رژێمی داگیرکەری ئێران سەلمێنەری ئەوەیە کە دەسەڵات ئاشنای زاراوەکانی دیمۆکراسی، کۆمار و ئیسلام نەبووە و هەڵگرتنی ئەو ناوانە تەنیا لە پێناو پەردەپۆش کردنی فاشیسمی مەزهەبی و گەشەپێدانی ئیسلامی دەسەڵاتە. ئەو سیاسەتەی رژێم وای کردووە کە قورسایی کۆمەڵگا لەبەرامبەر دەوڵەت و دەسەڵات کەم ببێتەوە و سیاسەت و ئەخلاقی کۆمەڵایەتی تا عەرشی ئاسمان بەرتەسک ببێ. واتا رژێمی ولایەتی موتلەقەی فەقیە، موزاییکی دیمۆکراتیکی گەلانی ئێرانی کردوەتە بیابانێکی کولتووری، کە رەنگ و دەنگە ئازادیخوازەکانی تێدا سەرکوت دەکات و دایدەپڵۆسێنێت. واتا پاکتاوکردنی گەلان و کولتوورەکان بە هیچ هەڵبژاردن و بانگەشەیەکی فریودەرانە، پەردەپۆش و ساڕێژ ناکرێت. بۆیە هەڵوێست و تووڕەیی گەل لە ئەگەری بەشداری لاوازیان لەم خولەی هەڵبژاردندا، قۆناخی “کات کاتی ئازادییە” بە دوای خۆی دێنێت کە ئەوەش لە دەرئەنجامی کردەوەکانی رژێمەوە سەرچاوە دەگرێت کە هێڵی بەرخودان و تێکۆشانی دیمۆکراتیکی گەلان تۆختر دەکاتەوە.
ئەوەی کە بازاڕی شانۆی هەڵبژاردنی گەرم کردووە، دەنگۆی فراوانی بەربژێری ژمارەیەک لەفەرماندە باڵاکانی باندەکانی ناو سوپای پاسدارانە. واتا سوپای پاسداران بە پێی بەرنامە و ئیستراتیژی هەنگاوی دووهەمی شۆڕش، لەهەوڵی بونیادنانی دەوڵەتی جەوانی ئینقلابی یان سەربازییە. چون لە جۆزەردانی ساڵی ١٣٩٩، خامنەیی بە پێناسەی دەوڵەتی جەوانی ئینقلابی و حزبوڵلاهی لە هەوڵی یەکدەست کردنی کۆمەڵگای ئێرانە و دەیەوێت سەرجەم باڵ و رەوتە جیاوازەکانی ناوخۆی ئێران، راستەوخۆ بخاتە ژێر چەپۆکی دەسەڵاتداری سوپا. دوابەدوای ئەو پێناسەی خامنەیی، هەڵمەتی رەش کردن و لاواز کردنی باڵی رفۆرمخواز و میانڕەوکانی رژێم بە پتەوی دەستی پێکرد و بەو هەڵمەتە دەرفەتی لەباربردنی رەنگ و دەنگە جیاوازەکانی ناوخۆی ئێرانی زیاتر خۆش دەکات.
خۆکاندید کردنی فەرماندەکانی باندی سوپای پاسداران و ململانێی تۆخی نێوان باڵەکانی، ئەم هەڵبژاردنەی لە ١٢ خولی پێشووی هەڵبژاردنی سەرۆک کۆماری، جیاوازتر کردووە. ئەگەری ئەوە هەیە کە رژێم بۆ گەڕانەوەی متمانەی گەل و راکێشانی گەل بۆ سەر سندووقەکانی دەنگدان، بازنەی ململانێی هەڵبژاردنی لە باڵەکانی ریفۆرمخواز و بناژۆخوازەوە بۆ ناو گرووپی میلیشیایی و باندەکانی سوپای پاسداران بەرتەسک کردبێتەوە. ئەوەش ئەو گومانە درووست دەکات کە خامنەیی، متمانەی بە پۆستی سەرۆک کۆماری لەژێر رکێفی باڵی ریفۆرمخوازەکاندا نەماوە و دەیەوێت سەرجەم دەسەڵاتەکانی ئەو پۆستە رادەستی سوپای پاسداران بکات. بۆیە پێدەچێت یەکێک لە گۆڕانکاریە بنەڕەتیەکانی رژێم، گۆڕینی پۆستی سەرۆکی دەسەڵاتی جێ بە جێ کار بە فەرماندەی دەسەڵاتی جێ بەجێ کار بێت کە بە تەواوی گوێڕایەڵی خامنەیی بن. بۆیە خامنەیی و سوپای پاسداران بە رێگای شورای نیگەهبانەوە، رکابەرەکانیان و لە شەترەنجی هەڵبژاردن، کیش و مات یان دەکات تا گۆڕەپان بۆ فەرماندە گوێڕایەڵەکانی خۆی بە تاڵ بکات و هەڵبژاردن لە کۆنتڕۆڵیان دەرنەچێت.
رژێم لەژێر پاساوی شانۆی هەڵبژاردن، دەیەوێت پۆستی سەرۆک کۆماری فەتح بکات و ئەو ئەرکەیشی خستوەتە ئەستۆی سوپای پاسداران. سوپای پاسداران لە ئێران فەتحکارێکی نایاب و ترسناکە. ئەوەش دەیسەلمێنێت کە رژێمی داگیرکەری ئێران مەترسیدارترین و زۆردارترین سیستەمی ناوچەکەیە، چون رژێمێکە کە بێکاری، هەژاری، گەندەڵی و تاڵان لە ناوخۆی وڵات و ناوچەکە بەرهەم دێنێت. بۆیە هەر هەڵبژاردنێک لەژێر هەیمەنەی ئەو زیهنیەتەدا بەڕێوە بچێت، تەنیا بە واتای ئاشی هاڕینی ئیرادە و دەنگی ئازاد، بیر و باوەڕی گەلانە. رژێمێک کە بە پاساوی هەڵبژاردن بە دوای فراوانخوازی دەسەڵاتی سوپای پاسدارانەوە بێت، سیاسەتی شەڕانگێزی، میلیشیایی و مافیاگەری لەسەر دایە، ئەو سیاسەتەیش لەناوخۆی ئێران بڕۆکراسی(ئیداری) قووڵتر دەکات. ئەوە لەکاتێکدایە کە سوپای پاسداران بۆ خۆی رێکخستنێکی بڕۆکراتییە. بێگومان بڕۆکراسیش پەیوەندی بە پەرەسەندنی سەرمایە هەیە کە ئەو تۆڕە مافیاییە بە رێگای رێکخراوەی خاتەمول ئەنبیا کۆی سەرمایە و سامانی زەبەلاحی ئێرانی قۆرخ و تاڵان کردووە. بۆیە سەپاندن و تەشەنەدانی چەمکی بڕۆکراسی، رژێم بەرەو دڕندەیی، هەڵئاوسان و تەقینەوە خلۆر دەکات. ئەو زیهنیەتە مەودای مەزنی لەگەڵ دادپەروەری کۆمەڵایەتی، ئاشتەوایی، ئازادی و دیمۆکراسی هەیە.
رژێمی داگیرکەری ئێران بەو سیاسەتە کۆنەپارێزەی دەیەوێت کۆمەڵگا لە؛ ئەخلاق، سیاسەت و چالاکی دیمۆکراتیک بێ بەری بکات، تاوەکوو کۆمەڵگا بەرەو چەواشە، گۆج بوون و پووکانەوە ببات. ئەوەش داگیرکەری و چەوسانەوەی هاوچەرخی رژێم لە دژی کۆمەڵگا نیشان دەدات کە بە هەنگاوی دووهەمی شۆڕش، ناوزەد کراوە. رژێم بەو کردەوەی دۆخی شەڕ لە دژی گەل و کۆمەڵگا رادەگەیەنێت و رێز لە ئیرادە و مافی سرووشتی گەل ناگرێت. واتا رێگا بە گەل و کۆمەڵگا نادات، دامەزراوە سیاسی و ئەخلاقیەکانی خۆی ئاوا و کارا بکات تا پڕۆسەی دیمۆکراسی لە ئێران سەقامگیر ببێت. بەهاتنە ئارای ئەو دۆخە تەنیا بژاردە و رێگایەک بۆ کۆمەڵگا دەمێنێت، بەرگری گەوهەرییە کە گەل پاڵی پێببەستێت.
رژێم بە تۆخ کردنەوەی دەسەڵات و هەژمۆنی میلیشیا و باندی مافیایی سوپای پاسداران، دەیەوێت مانەوەی لەسەر کورسی دەسەڵات گەرەنتی بکات. لەبەر ئەوەی سوپای پاسداران هێزیێکی کارامەی سەرکوتە، هاتنە سەر دەسەڵاتی رەهای، بەرنامە و پیلانی کۆمەڵگاکوژی ئێران دەخاتەڕوو کە لە قڕکردنی گەل و کۆمەڵگا مەترسیدارترە. چون باندەکانی سوپای پاسداران، کۆمەڵگا لە ناوەڕۆکی خۆی دەردەخات و بۆ ئامرازێکی پاوانی ئاراستەکراو وەریدەچەرخێنێت. واتا کەشێکی میلیتاریستی باڵ بە سەر ئێراندا دەکێشێ کە گەورەترین زیانی بۆ پڕۆسەی ئاشتی و دیمۆکراسی لەناوچەکە دەبێت. لەبەر ئەوەی سوپا تۆڕێکی مافیاییە و گرێ کوێرەی هەموو کێشەکانی ئێرانە، ئیرادە و باوەڕی کۆمەڵگا بە تاڵان دەبات و دوابەدوای ئەوەش ئابووری جۆگرافیای پڕپیت و بەرەکەتی ئیران وشک دەکات و هەرەسی بێکاری، برسێتی و هەژاری لەناو کۆمەڵگا دەئافرێنت و وەک گەنەیەک خوێنی کۆمەڵگا دەمژێت و کۆمەڵگا تووشی هەڵاوسان و چەرمەسەری دەکات.
سوپای پاسداران بە زەبری چەک و تۆقاندن بووەتە ناوەندی دەسەڵاتی ئێران، وەک تۆڕێکی مافیایی پشتی خۆی بە ئابووری زەوتکراوی کۆمەڵگا بەستووە و ئەو کەسانەی کە لەژێر ناوی کۆمپانیا زەبەلاحەکانی ئابووری، ڵاتیان حەپەلووش کردووە، ئەمڕۆ خزاونەتە مەیدانی سیاسەت و بانگەشەی بەربژێربوونی خۆیان بۆ پۆستی سەرۆک کۆماری دەکەن. کردەوەکانی ئەو تۆڕە مافیایە ئاماژەیەکن بۆ ئەوەی کە تەواوی باڵ و تاقمەکانی ناو دەسەڵات بۆ قۆرخ کردنی پۆستی سەرۆک کۆماری، ناچارەن لەگەڵ ئەو باندە تاڵانکارەدا سازش و هاوبەشێتی لەگەڵ دا بکەن. ئەوەش هەنگاوێکی مەترسیدارە کە رژێم لەدژی گەل و کۆمەڵگا هەڵیدەگرێت و ئەو هەنگاوەش میلتاریزەکردنی ئێرانی لێ سەوز دەبێت. بۆیە میلیتاریسم، دەبێتە دژوارترین و دڕندانەترین هێزی رێکخراوەیی رژێم کە دوابەدوای هەڵبژاردنی سەرۆک کۆماری ستارتی لێدەدرێت. ئەو رێکخراوەش دەیەوێت لەئاکامدا، کۆمەڵگا بخاتە ناو قەفەسی ولایەتی موتلەقەی فەقیە و لە ژێر رکێفی دەسەڵاتی خۆیەوە، دزە بکاتە ناو سەرجەم جۆمگەکانی کۆمەڵگا تا کۆنتڕۆڵ و حوکمڕانی رەهای لەسەر بکات.
هەڵبژاردنی ئەم خولەی سەرۆک کۆماری وەک باڵۆنێکی بەتاڵە کە رژێم پڕ لە بای دەکات و تا دەچێ زەبەلاح وێنا دەکرێت. رای گشتی ئێران بڕوا و متمانەی بە هەڵبژاردن نەماوە و رژێم بە بانگەشە و رێکلامێک کە بەڕێوەی دەبات. لەهەڵبژاردنەکانی رابردوو بە گوڕتر نیشانی دەدات. چەند مانگە ژمارەیەک لە کەسایەتە دیارەکانی ناو سوپا و دەسەڵات، کار بۆ گەرم کردنی ئەم هەڵبژاردن دەکەن و ئەگەری ئەوەش لەئارادایە کە ژمارەیەکی زۆر لەو کەسایەتیانە بۆ سەرنج راکێشانی گەل، ناویان بۆ پالێوراوی تۆمار بکەن و باڵە تێکشکاوەکانی میانەڕەو و ریفۆرمخوازەکانیش بۆ بەرز کردنەوەی رێژەی بەشداری گەل، بەشداری کارایان لەم هەڵبژاردنەدا هەبێ. بەس ئەوەی کە دیارە هەر باڵ و لایەنێک تا کۆتایی بانگەشەی هەڵبژاردن بە قازانجی بەربژێری دیاریکراوی خامنەیی بکشێنەوە و سازش و هاوبەشێتی لەگەڵ سوپا بکەن.
بەڵام دەبێ رژێم بە باشی لەوە تێبگات، هەڵبژاردنێک لەلایەن گەلەوە پێشوازی لێ دەکرێت کە هەڵبژاردنێکی دیمۆکراتیک و فرەڕەنگ بێت و لە یەکدەستی و تەک تیپ کردن، پارێزراو بێ و کولتوورێکی کێبرکێی دیمۆکرتیکی تێدا سەروەر بێ و رەنگ و دەنگەکانی تر قوربانی رەنگ و دەنگێکی رژێم نەکرێت. رژێم بە جێگای ئەوەی پەنا بباتە بەر بژاردەیەک کە لە کولتووری دیمۆکراسی داماڵراوە، پێویستە دەرگا بۆ بەشداری کارای ژنان و کەسانی ئازادیخواز و بێ لایەن بکاتەوە، تاوەکوو بە شێوەیەکی دیمۆکراتیک لە کێبڕکێی هەڵبژاردندا بەشداری بکەن. بە جێگای خولقاندنی کەش و هەوایەکی میلیتاریستی، خولقاندنی کەش و هەوایەک پێویستە کە هیوا بە گەل بدات کە سەرۆک کۆماری داهاتووی ئێران، کێشەی ژنان، گەنجان، گەلان و بە تایبەت کێشەی سیاسی، ئابووری و کۆمەڵایەتیەکانی وڵات چارەسەر دەکات، بخوڵقێنێ. ئەگەر هەر لە ئێستاوە لە قۆناخی بەربژێربوون و رەددی سەلاحیەتی بەربژێرەکان، رژێم مۆرەکانی خۆی لە گۆڕەپانی ململانێی هەڵبژاردن بهێڵێتەوە و دەرفەتی بەربژێربوونی ژنان، کەسایەتە دیمۆکرات خوازەکانی سەر بە نەتەوە و ئاینزاکانی تری ئێران بۆ پۆستی سەرۆک کۆماری نەڕەخسێنێ، ئەوا پرسی بەشداری گەل لە هەڵبژاردن لەلای گەلان و بە تایبەت ژنان و گەنجان لەتاق دەنرێ و هیوای گەل بۆ بەشداری لەهەڵبژاردنی نمایشی کە تێدا سەرۆک کۆماری بە بێ رەچاو گرتنی ئیرادەی گەل دەستنیشان کراوە، هەرەس دەهێنێ. بە خوڵقاندنی ئەو دۆخەش توندڕەوی و میلیتاریسم باڵ بە سەر ئێراندا دەگرێت و مەترسیدارترین قۆناخی دەسەڵاتداری رژێم دەستپێدەکات، کە دەرئەنجامەکەی رژێم لێ بەرپرسیارە.