لە کاتێکدا نزیکی سێزدەهەمین خولی هەڵبژاردنەکانی سەرۆک کۆماری و شه‌شومین دەورەی هەڵبژاردنی شۆڕاکانی شار و گوند دەبین کە بەرهەمی زیاتر لە چوار دەیە حوکمڕانی دەسەڵاتداری رەهای کۆماری ویلایەتی بریتی لە فاشیسم، تواندنەوە، سەرکوتی سەرهەڵدانەکان، کوشتار و دژایەتی لە گەڵ هەرجۆرە تێكۆشان و دەرفەتی ئازادی و دیمۆکراسی‌خوازی کۆمەڵگای مەدەنیە و بەردەوامی پێدەدا. رژیم بە پرۆپاگاندای هەمەڵایەنە و ئەندازیاریکردن، هەوڵدەدا بۆ بەڕێوەبردنی هەڵبژاردنێکی شانۆیی و ئەوە لە حاڵێکدایە کە دەرئەنجامی هەڵبژاردنەکان پێشتر دیاری کراون. جیاوازی ئەو هەڵبژاردنە لە گەڵ خولەکانی رابردوو، پێدانی رواڵەتێکی نیزامی و توندئاژۆیە لەبەر ئەوەی کە دەسەڵات هەم لە لایەن گەلانی ئێران و هەم لە بەرامبەر رکابەرە هەژمۆنی‌خوازەکانی جیهانییەوە هەست بە مەترسی دەکات.
ریزبەندی هێزە توندئاژۆکان بە مەبەستی دەست‌داگرتن بەسەر جومگەکانی هێز بۆ پەرەپێدان و هەڵایساندنی شەڕە. تەنانەت هەوڵدان بۆ زیندووکردنەوەی بەرجام و ئیدعای لابردنی گەمارۆکانی ئابووری کە هیچ پێوەندییەکی بە مافە دیمۆکراتیکەکانی گەلانەوە نییە، بە واتای کۆتایی‌پێهاتنی شەڕ نایە، چونکە رژیم هەم لە ئاستی دەرەکی و هەم ناوخۆییدا تەنیا هەوڵدەدا بۆ سازانی کاتی نەک بەستنی پەیمان و چارەسەری یەکجارەکی کێشەکان. ئێران ئێستاکە لەناو شەڕێکی بەربڵاو دایە کە بەدەر لە گۆڕەپانی سەربازی، لە ئاستی ناوخۆدا وەک پەرەسەندنی ملیتاریسم و قووڵبوونەوەی قەیرانەکان خۆی دەنوێنێ. رژیم زۆر بە چڕی کەوتووەتە ناو قەیرانە زەبەڵاحەکانی گۆڕەپانەکانی کۆمەڵایەتی، سیاسی، ئابووری، ئایدۆلۆژیک و فەرهەنگی و کۆنتڕۆڵێ ئەو قەیرانانەی لەدەست دەرچووە. لەبەر ئەوەش سەرکوت‌کردنی ئازادیەکانی مەدەنی، سیاسی و کپ‌کردنی هەر دەنگێکی دژبەری ئازادیخوازانی لە ترسی تەقینەوەی یەکجاری و بەربڵاوی کۆمەڵگە بە دژی ناکارامەیی و ستەم و زوڵم کردووە بە ستراتژی سەرەکی خۆی و رەچاوی دەکا.
بنەمای چارەسەری پرسی ژنان لە رۆژهەڵاتی کوردستان پەیوەستە بە چارەسەری سیاسی پرسی کورد و کێشەکانی بنەڕەتی کۆمەڵگاوە نەوەک بەڕێوەبردنی هەڵبژاردن. دژەژنی و چەوساندنەوەی ژنان یەکێک لە ستوونەکانی ستراتژیکی مانەوەی رژیمە و لە رابردوودا ژنان زۆر زیاتر لە بەشەکانی دیکەی کۆمەڵگا کەوتوونەتە ژێر زەختی سەکوت و نکۆڵی لە ئازادی و هەبوونیان کراوە. تاکانە رێی چارەسەری، وەدەست‌خستنەوەی هەموو مافە دیمۆکراتیکەکانی ژنان بە شێوازێکی رادیکال و گۆڕانگاری لە پێکهاتەی پێاوسالاری هەیی و گۆڕینی یاسای بنچینەییە کە وەک کۆسپێکی سەرەکی دەبیندرێ.
پرسی کوردـ لوڕ و پرسی نەتەوەکانی عەرەب، ئازەری، بەلووچ و نەتەوەکانی دیکە وەک پرس‌گەلێکی بنەڕەتین و لەناو پرسەکانی سەبارەت بە ئێران سەرەکی ترینن. بەردەوام هەڵسوکەوتی رژیمی ئێران سەبارەت بە پرسی کورد وەک رابردوو ملیتاریسم و ژینۆسایدی فەرهەنگی‌ـ سیاسییە و بچووکترین گۆڕانكاری تێدا بەدی ناکرێ. لەو چوارچێوەیەدا دەسەڵاتی رەهای رژیم و باڵە جیاوازەکانی وەک تۆندئاژۆترین و سەرەڕۆترین شکڵی فاشێسم و شۆوێنیسم لە درێژایی دەیەکانی رابردوودا بەردەوام لە دژی شوناس و هەبوونی گەلەکەمان کاریان کردووە. ئەوە لە کاتێکدایە کە كۆدار و پژاک بە لەبەرچاوگرتنی هێڵی سێیەم و کۆنفێدڕالیسم و نەتەوەی دیمۆکراتیک، نیازپاکی و نییەتی ئازادیخوازانەی خۆیان بە روونی نیشانداوە و سەلماندوویانە. لەو دۆخە ناهەموار و ئاڵۆزەدا، چوونە سەر سندووقی کۆمەڵگای مەدەنی و نەتەوەکانی ستەملێکراو ئاو بەردانە ناو ئاشی رژیمە و بەواتای خۆکوژی و خۆلەناوبردنە.
رژیمی فاشیستی کۆماری ئیسلامی فێڵبازانە، هەڵبژاردنەکانی شۆڕاکان و سەرۆک‌کۆماری هاوکات بەڕێوەدەبا تا ئاستی بەشداری گشتی لە بەر چاوی دونیا و راگەیاندنەکانی دەرەکی زۆر و زەبەند و پتەو نیشان بدا و هەر بەشدارییەک لە هەڵبژاردنی شووڕاکاندا وەک دەنگدان بە سەرۆک‌کۆماری و رەوایی رژیم دەهەژمێری. تێکۆشانی دیمۆکراتیکی کۆمەڵگا درێژخایەن و هونەرمەندانەیە، گەل بۆخۆی هێزی هۆشیاری، ناسین، بژار و هەڵبژاردنی هەیە، بۆیەش گەڵ دەبێ خۆی لە مژاری شۆڕاکاندا مەجال و دەرفەت بخوڵقێنێ و دەستی رژیم لە گۆڕەپانی شۆڕاکاندا کورت بکاتەوە.
بێگومان هەر دەنگێک فیشەکێکە بەرەو کۆڵبەران، هەڵدانی سێدارەیەکە، بێ‌ڕێزییە بە ژنان و لەناوبردنی ژینگە و سروشتە. وەک و ” کۆمەڵگەی دیمۆکراتیک و ئازادی رۆژهەڵاتی کوردستانـ کۆدار” و “پارتی ژیانی ئازادی کوردستانـ پژاک” بە لەبەرچاوگرتنی ئەو مژارانەی کە لە سەرەوە باسکران و هەروەها بڕوا بە تێکۆشانی دیمۆکراتیک و رادیکاڵی گەلان و بەو پێیەی کە دەرفەتی و بەستێنی هەڵبژاردنێکی ئازاد و دیمۆکراتیک بوونی نییە، راشکاوانە سێزدەهەمین خولی هەڵبژاردنەکانی سەرۆک‌کۆماری ئێران بایکۆت دەکەین و ئاماژە بەو هۆکارانەی ژێر دەکەین:
١ـ زیاتر لە چوار دەیە زوڵم و ستەم، ژینۆسایدی فەرهەنگی، سیاسی، ئابووری رژیمی ویلایەتی بەو پەڕی بێ‌شەرمی بەردەوام دەکا و هیچ چەشنە گۆڕانکارییەک لەو هەڵسوکەوتەدا بەدی‌نەکراوە، مافی گەلانی ستەم‌ڵێکراوی کوردـ لوڕ، عەرەب، ئازەری، بەلووچ و … بنپێکراوە. چەمک و تێگەکانی ئازادی و دیمۆکراسی لەلای کاربەدەستان و بەرپرسانی رژیم هیچ بەهایەکی نییە و لە پێشکەوتن و گەشەسەندنی سەراسەری و گەسەندوویی هاوسەنگ و مایندەی نەتەوە ستەملێکراوکان بە ئەنقەست پێشگیری دەکرێ.
٢ـ لە سەردەمی دەسەڵاتداری رژیمی “کۆماری ویلایەتی” هەموو سەرهەڵدانەکانی گەلان سەرکوت کراون و سەهەڵدێرەکان کۆمەڵکوژ کراوان. سەرهەڵدانەکانی بەفرانباری ١٣٩٦ و خەزەڵوەری ٩٨ نموونەی دیار و مێژوویین لە کارنامەی رەشی رژیمدا. پەسەند و قەبووڵی هەڵبژاردنێكی دیکە بە واتای سەرکوت چەوسانەوەی گەلان و ئۆپۆزیسیۆنی سەراسەری ئێرانە.
٣ـ گەلانی ئێران لە رژیمی دەسڵاتدار یەکجار ناڕازین و بە سەرهەڵدانەکانی ئەو ساڵانەی دوایی و دژایەتی دەربڕینی رۆژانەی چێن و توێژەکان ئەوەیان بە روونی نیشان داوە. بۆیەش دەبێ ئێمە رێز لەو هەڵس‌وکەوتەی گەلان بگرین و بەوپێیە، بایکۆت وەک کردارێکی دیمۆکراتیکی رادیکال لەبەرچاو بگرین.
٤ـ رەفتاری رژیم و هەموو باڵە جیاوازوکانی سەبارەت بە پرسی کورد، هاوشێوە، فاشیستی و دوژمنکارانە بووە و ئێستاش هەر وایە. بەردەوام لە ستراتژی ژینۆسایدی فەرهەنگی، سیاسی کەڵک وەردەگرێ و پێداگرە لەسەر تواندنەوە و نکۆڵیکردن و دان بە پرسی کورد وەک گەورەترین پرسی سیاسی ئێران دانانێ. درێژە بە ملیتاریزەکردنی رۆژهەڵاتی کوردستان دەدا و هەر ساڵ هێرشکانی بۆ سەر هەرێمەکانی رۆژهەڵات دژبە هێزەکانی گریلا پەرەپێدەدا و شەپۆلی دەستبەسەرکردن، زیندانیکردن و لەسێدارەدان بە تایبەت هی چالاکانی ژینگەپارێز، مەدەنی و کوشتنی کۆڵبەران رووی لە زیادبوونە و گەیشتووەتە ئاستێکی مەترسیدار. شەڕهەڵایساندنەکانی بەردەوامی رژیم وەڵامێک بووە بۆ نەخشەڕێی دیمۆکراتیک و ئاشتی‌خوازانەی كۆدار و پژاک و هەروەها وەڵامی دوژمنکارانەیە سەبارەت بە ماف و داخوازییەکانی رەوای نەتەوەی کورد.
٥ـ رژیمی ئێران ستراتژی و بەرنامەیەکی دیار و روونی بۆ چارەسەری بنەڕەتی قەیرانەکانی کۆمەڵایەتی، ئابووری، ژینگەیی، فەرهەنگی، سیاسی، ئایدۆلۆژیک و هتد نییە، لە هەمان کاتدا هەوڵدانێتی بە لە ئەستۆداماڵینی کێشە و قەیرانەکان و خستنەسەرشان و گرێدانیان بە هۆکارەکانی ناوخۆیی و دەرکی بەدەر لە دەزگا و پێکهاتەی دەسەڵاتی خۆی لە ژێر بەرپرسیارێتی هەڵێ. هەموو ئەو قەیرانانە گەیشتوونەتە ئاستی مەترسیدا و تەقینەوە و کۆمەڵگا تاقەت و توانای ئەو گوشارە قورسانەی نەماوە.
٦ـ چین و توێژەکانی جیاوازی کۆمەڵگا وەک جوانان، ژنان، کرێکاران، کارمەندان و رۆشنبیران، لە قەیرانە دەسکردەکانی رژیمدا و لە دژوارترین هەلو‌مەرجدا بۆ بەدەست‌هێنانی ئازادییەکانی سروشتی و بژیوی ژیانیان لە تێکۆشاندان و بەردەوام سەرکوت دەکرێن. رژیم بە قەدەغە‌کردنی ئازادییەکان، نکۆڵی مافە دیمۆکراتیکەکان و تەمێ‌کردن و سەزادانی زیاتر دەیهەوێ کۆمەڵگا بە تەواوی بێدەنگ بکا. بە تایبەت دەنگ‌هەڵبڕین و ناڕەزایی کرێکاران و بزووتنەوە مەدەنی و خۆڕسکەکانی کرێکاران لە ئاستی سەراسەریدا رەنج و مەینەتی زۆری کێشاوە و هەموو مافەکانیان بنپێکراوە، بەڵام دیسانیش درێژە بە ناڕەزایەتیەکانیان دەدەن و ئەوەش نیشانەی بەناڕەوا زانینی رژیمە لە لایەن هەموو کرێکارانەوە. پشکی جوانان لەو ناوەدا دەسبەسەرکردن و سێدارەیە لە حاڵێکدا کە دەبێ تێکۆشانی سەراسەری کۆمەڵگا لەسەر بنەمای رێکخستن و بەڕێكخراوبوونی جوانان بەرەوپێش بڕوا.
٧ـ رژیمی تئۆکراتیک و پێاوسالاری بونیادنراو لە لایەن کاربەدەستانی دەسەڵات، بە پەرەپێدانی رۆژانەی رەفتاری دژەژن، هەموو دەرفەتەکانی سروشتی بۆ دەستەبەرکردنی ئازادی لە ژنان دەستێنێ و هەموو گۆڕەپانەکانی بەڕێوەبەری، بڕیارسازی، بڕیارگرتن، جێبەجێ‌کردن، کاری سیاسی و یاسایی بە رووی ژناندا داخستووە. هەبوونی روانگەی دوژمنانەی پیاوسالار و رەگەزپارێز سەبارەت بە ژنان لە پێکهاتەی رژیمی ئێستادا نکۆڵی، وەلانان و سەکوتی ژنانی بە شوێنەوەیە. رژیم تێکۆشانی دیمۆکراتیک و رادیکاڵی ژنان تەحەموول ناکا و بە زیندان و سێدارە وەڵامی دەداتەوە.
٨ـ رژیم رواڵەتێکی سەربازی و شەڕانگێزانەی بە سیزدەهەمین خولی هەڵبژاردنەکانی سەرۆک‌کۆماری جۆزەردانی ١٤٠٠ی هەتاوی بەخشیوە و دەنگۆی قووڵبوونەوەی شەڕەکانی ناوخۆیی و دەرەکی، قڕکردن، سەرکوتکاری، کپ کردن، نکۆڵی، ترساندن و تۆقاندن، دژەژنی و چەوساندنەوە، ولانانی کۆمەڵگا، زیندان و سێدارەی زیاتر لە پاڵ گەورە‌قەیرانەکانی مەترسیدار دەگاتە گوێ. دیارە رژیم دەیهەوی گەڵ وەک ئامێرێک بۆ مەبەستی هەڵبژاردن بەکاربهێنێ.
هەڵبژاردنی شۆڕاکانی شار و گوند
کۆمەڵگەی دیمۆکراتیک و ئازادی رۆژهەڵاتی کوردستانـ کۆدار و پارتی ژیانی ئازادی کوردستانـ پژاک بڕوای راستەقینەی بە تێکۆشانی دیمۆکراتیکی کۆمەڵگەی ئێران و رۆژهەڵاتی کوردستان هەیە و لە سۆنگە و رەهەندی مافی گەلەکەمان و تێکۆشانی توێژەکانی کۆمەڵگا دەرەوەی چوارچێوەی پێکهاتەیی دەسەڵات و حاکمییەت سەبارەت بە هەڵبژاردنی شۆڕاکان دەڕوانی. لەبەر ئەوەش هەڵبژاردنەکانی شۆڕاکان و بابەتی بەشداری یا خود بایکۆتی ئەو هەڵبژاردنە وەک مافێکی ئازادانە دەسپێر درێتە کۆمەڵگا و توێژەکانی.
هەڵبژاردن هەموو شتێک نییە. پێویستە کە تێکۆشانی دیمۆکراتیکی گەڵان و شەقام بە یەکگرتوویی ریزەکانی کرێکاران، ژنان، جوانان، کارمەندان، رۆشەنبیران و توێژە ئازادئەندێش و دیمۆکراسی‌خوازکان وەک کردار و خەباتێکی سەرتر و گرینگ‌تر لە هەڵبژاردن، گەشەدارتر بێت و بە یەکانگیری هەمەلایەنە و بە دروشمی ” نا بۆ سێدارە، بڵێ بۆ دیمۆکراسی” بەڕێکخستن بکرێ. تۆکمەکردنی رەوتی تێکۆشانەکانی دیمۆکراتیک، ستراتژی بنەڕەتی گەڵانە. لەبەر ئەوەش تەنیا بایکۆت و تەحریمی هەڵبژاردن تێرکەر نابێ و دەبێ رێکخستنی خۆبونیاد و خۆڕسکی گەلان تەوەرەی سەرەکی تێکۆشانی درێژخایەنی دیمۆکراتیک و رادیکاڵ بێ.
کۆمەڵگەی دیمۆکراتیک و ئازادی رۆژهەڵاتی کوردستانـ کۆدار
پارتی ژیانی ئازادی کوردستانـ پژاک
۱۱.۰۵.۲۰۲۱