پاش ناره‌زایه‌تیه ریشه‌ییه‌كانی كۆمه‌ڵگا له‌به‌رامبه‌ر ده‌سه‌ڵات و گه‌نده‌ڵی رژێمی كۆماری ره‌های وه‌لایی، دۆخی گشتی ئێران یه‌كجار قه‌یراناوی و ئاڵۆزه. كاربه‌ده‌ستانی سه‌ره‌ڕۆی رژێم؛ واتا ئه‌وانه‌ی وا بوونه‌ته نموونه و هێمای گه‌نده‌ڵی و چه‌وساندنه‌وه، به‌هۆی لاوازی و داماویی له‌ڕاده‌به‌ده‌ر، تووشی نه‌خۆشی و سه‌رخۆشی سه‌ركوت كردنی ناڕازیان و چالاكانی سیاسی و مه‌دنی، ژنان، كرێكاران، كۆڵبه‌ران و چین و توێژه‌كانی دیكه به‌تایبه‌ت له رۆژهه‌ڵاتی كوردستان بوونه. قه‌یرانه ئابووری و كۆمه‌ڵایه‌تیه‌كان، نه‌بوونی ره‌وایه‌تی ئایدیالۆژیكی و سیاسی، ئاژاوه‌گێڕی و دوژمن دروست كردن له په‌یوه‌ندییه ده‌ره‌كییه‌كان، ده‌ستبه‌سه‌ركردنه بێ ره‌حمانه‌كان له رۆژهه‌ڵاتی كوردستان، شه‌پۆلی له‌سێداره‌دان و سه‌ركوتی ناڕازی و بیرجیاوازه‌كان له سه‌رتاسه‌ری ئێران و ده‌یان كێشه و بابه‌تی یه‌كجاری قه‌یراناوایی دیكه، ئاماژه‌ن بۆ دارزین و پوكانه‌وه‌ی مه‌كینه‌ی سه‌ركوتی كۆماری ئیسلامی ئێران. به‌رخۆدان و تێكۆشانی ئازادی و دیمۆكراسی خوازانه‌ی گه‌لان له سه‌رتاسه‌ری ئێران و رۆژهه‌ڵاتی كوردستان له به‌رامبه‌ر سناریۆكانی ئه‌منییه‌تی و ئیتڵاعاتی رژێم كه له رۆژانی رابردوودا رووبه‌ڕووی سه‌ركوتی توند بۆته‌وه، ئاماژه‌ن بۆ هۆشیاری زیاتری گه‌لان به‌تایبه‌ت له رۆژهه‌ڵاتی كوردستان. له كرێكارانه‌وه بگره هه‌تا ژنان، رۆشنبیران و چالاكانی تێكۆشه‌ری گه‌ل، به چه‌شنی شه‌پۆڵێكی زنجیره‌یی و یه‌ك له دوای یه‌كن له ده‌ڕبڕینی خواست و ئێراده‌ی جه‌ماوه‌ری و گشتی بۆ هاتنه نێو مه‌یدانی سه‌رهه‌ڵدانێك.
رژێمی ئێران له دۆخه‌ی هه‌نووكه‌یی، به قه‌یرانگه‌لێكی ناوخۆیی كه له خراپ ترین ئاستدان و په‌یوه‌ندیگه‌لێكی شه‌ڕفرۆشانه و دۆژمنانه ی ده‌ره‌كی، له لووتكه‌ی شه‌ڕه‌نگێزی و ئاژاوه‌گێڕیدایه. هه‌روه‌ها به‌رده‌وام هه‌ل و ده‌رفه‌ته‌كان ده‌كات به هه‌ڕه‌شه‌ی جیددی كۆمه‌ڵایه‌تی و سیاسی. ئه‌م ده‌سه‌ڵاته گه‌نده‌ڵه، چه‌نده په‌ره به سناریۆكانی له دژی كۆمه‌ڵگای نێۆنه‌ته‌وه‌یی و ده‌وڵه‌ته‌كان ده‌دات و ئامانجه قیزه‌ون و ره‌دكراوه فراوانخوازیی و ئه‌مپریالیستیه تایبه‌ته‌كانی خۆی ده‌دات، به هه‌مان شێوه‌ش له دژی گه‌لان و كۆمه‌ڵگاكانی ئێران له‌ناوخۆ مه‌كینه‌ی سه‌ركوت راناوه‌ستێنێت.
شاردنه‌وه‌ی لاوازییه‌كان، تێكچوونه‌كان و ئه‌و قه‌یرانه ناوخۆیی و ده‌ره‌كییانه‌ی رژێم كه له ئاستی هه‌ره‌ژووردان به كه‌ڵك وه‌رگرتن له جموجۆڵی شه‌ره‌نگێزانه و هات و هاوار وه‌ك بابه‌تی به‌رجام، پیشاندانی هێزی مووشه‌كی و سه‌ربازی، هێشتا نه‌یتوانیوه له ترس و دڵه‌ڕاوكێی رژێم كه‌م بكاته‌وه و جیا له شكست و مۆته‌كه‌ی له‌ناوچوون، شتی دیكه‌ی ده‌ستنه‌كه‌وتووه. بێگومان روبه‌ڕوو بوونه‌وه‌ی دوو لایه‌نه‌ی ئێران و ئه‌مریكا، ئه‌ورووپا و ده‌وڵه‌تانی ناوچه‌یی، كاتێ به درێژایی چوار ده‌یه‌ی رابڕدوودا دوژمنانه و له‌وپه‌ڕی ناكۆكیدا بووه، به پێی عه‌قلی دروستی سیاسی، هه‌نووكه كه به‌رهه‌می ژه‌حراوی ئه‌و دوژمنایه‌تیه دوور و درێژه هاتووه‌ته به‌ر، روون و ئاشكرایه كه ئاشتی و سه‌قامگیری و رێكه‌وتنی ریشه‌یی به‌دواوه نابێت. چل و چه‌ند ساڵ سیاسه‌تی دوژمنایه‌تی له گه‌ڵ كۆمه‌ڵگای نێونه‌ته‌وه‌یی و په‌ره‌دان به ترس و تۆقاندن و تیرۆر، هاوشانی سه‌ركوتی به‌رده‌وامی گه‌لان و ئازادیخوازان له ناوخۆی وڵات، ناتوانێت ئه‌نجامێكی جیاواز له سه‌رهه‌ڵدان و شۆڕش هه‌بێت. دوژمنایه‌تی ئێران و رۆژئاوا هه‌تا ئێستا شكست و نامرازی بۆ هه‌ر دوو لایه‌نی به‌دواوه بوو و له‌م نێوه‌دا ته‌نیا گه‌لانی ئێران له‌تمه‌ی جیددیان به‌ركه‌وتووه. بێگۆمان هیچ رێكارێك وه‌ك گه‌ڕانه‌وه بۆ به‌رجام و رێكه‌وتنه‌كانی هاوشێوه به هۆی ئه‌وه‌ی كه ریشه‌یی نین و له سه‌رئه‌ساسی هێز و دوژمنایه‌تین، سه‌قامگیریی و ئاسایشی به‌دواوه نیه. سه‌لمێنراوه كه ئه‌و رێكاره كاتی، تاكتیكی و ده‌ستهه‌ڵبه‌ستانه‌ی هه‌ر دوو لایه‌ن بۆ ده‌ستپێڕاگه‌یشتن به هه‌ل و ده‌رفه‌تی باشتر بۆ هێرش و له‌ناوبردنی یه‌كتره. ئێستراتژیه سیاسیه درێژخایێنه‌كانی ئێران له گه‌ڵ ئه‌مریكا_ ئه‌ورووپا، ره‌گ و ریشه‌یان ده‌گه‌ڕێته‌وه بۆ دژایه‌تیه قووڵه ئایدیالۆژیكی، سیاسی، ئابووری و فه‌رهه‌نگیه‌كان و به ئاسانی چاره‌سه‌ر نابن. چوار ده‌یه دوژمنایه‌تی و فێل و درۆ بۆته هۆی ئه‌وه‌ی كه ململانێیه‌كی كوشنده له سه‌ر تابلۆی ره‌شی هه‌ردوو لایه‌ن بنه‌خشێنێت. گێره‌وكێشه‌كانی كۆماری ئیسلامی له گه‌ڵ ئێسرائیل هێنده به‌ربڵاو و فره ره‌هه‌نده كه چوارچێوه‌كانی ئێسرائیل و ئێران تێپه‌ڕ ده‌كات و رۆژئاواییه‌كانیشی به خۆیه‌وه تێوه‌گلاندووه. بگره ئه‌م دوژمنایه‌تیانه چاره‌نووسی گه‌لانی چه‌وساوه‌ی رۆژهه‌ڵاتی ناوین و به‌تایبه‌ت به شێوه‌ی ناڕاسته‌وخۆ چاره‌نووسی گه‌لی كورد ده‌خاته ژێر كاریگه‌ری خۆی. هم ئاشتی له لایه‌ن كۆماری ئیسلامی و هه‌میش شه‌ڕ، لێكه‌وته‌ی ناوچه‌یی ده‌بێت. سه‌ره‌ڕای بانگه‌شه میدیاییه‌كان، ئێستاكه ئاسۆیێكی روون چاوه‌ڕوانی ئێران_ئه‌مریكا نیه، ئه‌وان یا له رێگای شه‌ڕه‌وه گه‌لان تووشی نه‌هامه‌تی ده‌كه‌ن یا له رێگای رێكه‌وتنه تاكتیكی و كاتیه‌كان كه خاوه‌ن ماته‌وزه‌ی شه‌ڕه‌نگێزانه‌ن و یا له میانه‌ی ململانێی ئابووری، سه‌ربازی و سیاسی یه‌كجار مه‌ترسیدار ئه‌و كاره ده‌كه‌ن. له ئه‌گه‌ری هه‌ركامه‌یان، ئه‌وه گه‌لانی ناوچه‌كه‌ن كه هه‌ر وه‌ك به‌رێ ده‌بنه قوربانی شه‌ڕه‌نگێزی و چه‌په‌ڵی هه‌ر دوو لایه‌ن.
به له‌به‌رچاوگرتنی دۆخی كونژكتۆری، رێگای سێهه‌مین به‌ده‌ر له ئێستراتژییه‌كانی دوو لایه‌نه، دوو ره‌وتی رۆژهه‌ڵات و رۆژئاوا، بێگومان پشت به‌ستنی گه‌لان به هێزی گه‌وهه‌ری خۆیان و تێكۆشانی رادیكاڵ، دیمۆكراتیك و ئازادیخوازانه‌یه كه به‌سالانه گه‌لی كورد له رۆژهه‌ڵاتی ناوه‌ڕاست وه‌ك هێڵی سێهه‌م ده‌ستیپێكردووه و پێشه‌نگایه‌تی ئه‌و تێكۆشان بێگه‌رده ده‌كات.
به هۆی دژكرده‌وه‌ی سروشتی و دیمۆكراتیكی گه‌لانی ئێران له دژی ملهوڕی و گه‌نده‌ڵی سیسته‌ماتیكی رژێمێك كه پشت ئه‌ستوور به یاسای فه‌رمیه، شه‌قام، زیندان، شوێنه‌كانی كار و ناوه‌نده‌كانی دیكه‌ی گوزران بۆ گه‌لان بوونه‌ته گۆڕه‌پانی رووبه‌ڕوو بوونه‌وه‌ی له‌گه‌ڵ رژێمی كۆماری وه‌لایی ره‌ها. ئه‌وه‌ی كه هه‌موو رۆژێك تێكۆشانی كرێكاران، كۆڵبه‌ران، ژنان، چالاكانی سیاسی و مه‌ده‌نی، رۆشنبیران، كورد، عه‌رب، به‌لووچ و … له دژی رژێم، به كوێ ده‌گات، گرێدراوی ئاستی به‌رزكردنه‌وه و به‌گوڕكردنی تێكۆشانه‌كانه. رۆحی دیالكتیكی كۆمه‌ڵگای مه‌دنی به‌ڵام له فۆرمی ناره‌زایه‌تییه مه‌دنی و سیاسیه‌كان سه‌لماندوویه‌تی كه ئه‌م تیكۆشانه دانامركێت و له به‌رژه‌وه‌ندی رژێمی سه‌ركوتگه‌ر كۆتایی پێنایێت. ناره‌زایه‌تی و به‌رخۆدانه‌كان سه‌لماندوویانه كه كۆمه‌ڵگای سه‌ركوتكراو سه‌ره‌ڕای توندی له‌ڕاده‌به‌ده‌ری سه‌ركوته سه‌ربازی و ئه‌منییه‌تیه‌كان، ناتوانێت له ئامانجه‌كانی پاراستنی هه‌بوون و پێشكه‌وتنی خۆی پاشه‌كشه بكات و ئه‌مه، له رۆژانی رابردوودا بووته‌ی هۆی زیندووكردنه‌وه‌ی هیوا له دڵی یه‌كه‌به‌یه‌كی شارۆمه‌ندانی ژێر زوڵم و رژێمی تووشی لاوازی و په‌شۆكاوی كردووه. ئه‌گه‌رچی ناوه‌نده ئه‌منییه‌تیه‌كان زیاتر له ۸۳ كه‌سیان له ماوه‌ی كه‌متر له یه‌ك مانگ له رۆژهه‌ڵاتی كوردستان ده‌ستبه‌سه‌ر و زیندانی كردووه، ده‌یان چالاكی سیاسی و مه‌ده‌نی له زیندانه‌كان رووبه‌ڕووی سێداره و سه‌ركوت و بێده‌نگی بوونه‌ته‌وه و زیاتر و جیاوازتر له‌مانه، چین و توێژگه‌لێك وه‌ك كۆڵبه‌ران كه هێمای زوڵم لێكراوی گه‌لێكن، ده‌كوژرێن، به‌ڵام هه‌مووی ئه‌مانه ئاماژه‌ی شكست و دامركاندنه‌وه نین، به‌ڵكوو به پێچه‌وانه ئاماژه‌ن بۆ جموجۆڵ و تێكۆشان به تایبه‌ت له رۆژهه‌ڵاتی كوردستان. جارێكی دیكه شاڵاوی ده‌ستبه‌سه‌ركردنه‌كان سه‌لماندی كه كۆمه‌ڵگا بێده‌نگ و ده‌سته‌وئه‌ژنۆ دانه‌نیشتووه و ئه‌م كارنامه رادیكاڵه، زۆر گه‌وره‌تر و به‌نرختره له بابه‌ت گه‌لێكی خڵه‌تێنه‌ری وه‌ك به‌رجام، به‌رنامه‌ی مووشه‌كی و دوژمنایه‌تیه دوو لایه‌نه‌كانی ئێران_ رۆژئاوا. رژێمی فاشیست هه‌وڵده‌دات به هات و هاوار و كێشه‌نانه‌وه له بواری بابه‌تگه‌لێك وه‌ك به‌رجام، خۆ به‌زوڵم لێكراو نیشاندان له به‌رامبه‌ر ئه‌مریكا و ئیسرائیل و هه‌روه‌ها خۆ وه‌هانیشاندان كه له دژی ئه‌و گه‌نده‌ڵی، دزی، رانت خواردن و باج سه‌ندنه‌ی نێو ده‌سه‌ڵاته‌كه‌ی تێكۆشان ده‌كات، سه‌رپۆش له سه‌ر حه‌قیقه‌تی تێكۆشان و به‌رخۆادنی گه‌لان دابنێت. هه‌م رژێم و هه‌میش هێزه بیانییه‌كان له‌هه‌وڵی ئه‌وه‌دان كه له هه‌بوونی گه‌لانی وه‌ك ئامرازێك له دژی یه‌كتر كه‌ڵك وه‌ربگرن؛ به‌ڵام گه‌لان له پرۆسه‌ی هۆشیاری مه‌ده‌نی_سیاسی خۆیان سه‌لماندوویانه كه له ئاراسته‌ی هێڵی سێهه‌م و پشت به‌ستوو به هێزی گه‌وهه‌ری خۆیان، نابن به ئامراز و كه‌ره‌سه‌ی ده‌ستی هیچ هێز و لایه‌نێك.
له مانگی رابردوودا له ۲۰ ی به‌فرانباره‌وه تا ئێستا زیاتر له ١٠٠ شارۆمه‌ند له رۆژهه‌ڵاتی كوردستان ده‌ستبه‌سه‌ر و ده‌یان كه‌س له زیندانه‌كان له سێداره دراون، ده‌ستبه‌سه‌ركراوه‌كانی مانگی خه‌زه‌ڵوه‌ری ۹۸ دادگایی ده‌كرێن، كۆڵبه‌ران ره‌شه‌كوژ ده‌كرێن و چالاكانی سیاسی و رۆشنبیران له زیندانه‌كانی تاران دادگایی و له‌ژێر گوشاری بێڕه‌حمانه دان. هه‌روه‌ها پاش چه‌ندین ساڵ گوشاره‌كان له سه‌ر زه‌ینه‌ب جه‌لالیان بۆ وه‌رگرتنی دانپێدانانی زۆره‌ملی درێژه‌ی هه‌یه. به‌ڵام هه‌موو به‌رخۆدانه‌كان «نایێكی گه‌وره‌یه به رژێم و له‌سێداره‌كان و به‌ڵێی گه‌وره‌یه به دیمۆكراسی و ئازادی». رژێم ئه‌گه‌ر سه‌ركوت ده‌كات به هۆی ئه‌وه‌یه كه ده‌زانێت دژكرده‌وه‌كانی گه‌لان و چالاكانی گه‌یشتووه‌ته ئاستێكی جیددی تر و له‌به‌ر ئه‌وه‌ی كه قه‌یرانه‌كانی ئابووری و سیاسی گه‌یشتوونه‌ته سنووری ته‌قینه‌وه، چینی ناوین له‌ناو چووه و كه‌وتووه‌ته دۆخی ناله‌باری بخۆ و نه‌مره، به‌ستینه‌كانی سه‌رهه‌ڵدانێك فه‌راهه‌م بووه و رژێم ترسی له‌وه‌یه‌كه هه‌رجار سه‌رهه‌ڵدانێك ئه‌گه‌ری ئه‌وه‌ی هه‌یه كه وه‌رگه‌ڕێته شۆڕشێكی ته‌واو. ئه‌وه‌ی كه شه‌پۆلی ده‌ستبه‌سه‌ركردنه‌كان له رۆژهه‌ڵاتی كوردستان زیاتر له ناوچه‌كانی دیكه‌ی ئێرانه، به هۆی رۆڵی گرینگ و ئێستراتژیكی گه‌لی كورد له پێشه‌نگایه‌تی ناره‌زایه‌تیه‌كان، سه‌رهه‌ڵدان و له كۆتاییدا شۆڕشه كه رژێمی خستووه‌ته نێو ترس و دڵه‌راوكێ. ئه‌م گه‌ڵه چڵ ساڵ له‌مه‌وبه‌ریش سه‌ركوت كراوه، به‌ڵام نه ئه‌و كاته كۆڵێ دا و نه ئه‌مڕۆ كۆڵ ده‌دات. كه‌واته شه‌پۆلی هۆشیاری و تێكۆشان په‌ره‌ی سه‌ندووه و ناره‌زایه‌تیه‌كان سه‌لمێنه‌ری ئه‌م راستییه‌ن.
گه‌لان و كۆمه‌ڵگای ئێران خوازیاری ئه‌وه‌ن كه چاره‌نووسیان له ده‌ستی خۆیاندا بێت و ئه‌م كاره، بناغه‌ی ژیانی ئازادی گه‌لانه له هه‌زاره‌ی سێهه‌م. دۆخی هه‌نووكه‌یی پیشانده‌ری ئه‌وه‌ن كه ده‌وڵه‌ت و كاربه‌ده‌ستانی په‌رگالی وه‌لایی ره‌ها ئاسته‌نگی سه‌ره‌كین له پێش چاره‌سه‌ركردنی كێشه‌ی كرێكاران، ژنان و چین و توێژه‌كانی كۆمه‌ڵگای مه‌ده‌نی. رژێم كۆمه‌ڵگای تووشی دوژمنایه‌تی كردووه و له‌نێو پێكاته‌ی ده‌سه‌ڵاتی خۆشیدا تووشی دووجه‌مسه‌ری بووه. كێشمه‌كێش و ململانێی ده‌سه‌ڵاتخوازنه‌ی كاربه‌ده‌ستان و ره‌وته هه‌وه‌سبازه‌كانی نێوخۆیی سیسته‌م، له رۆژانه‌ی رابردوودا هه‌موو شتێك له گۆڕی هه‌ڵبژاردنه‌كانی ساڵی ۱۴۰۰ كه ئه‌نجامه‌كانی له‌پێش دیاركراون به كاراكته‌رێكی تۆقێنه‌ری نیزامی_ پاسداری، داده‌رێژنه‌وه و خه‌ڵكیش له لێكه‌وته‌كانی تووڕه‌یی خۆیان ده‌ترسێنن. كاتێ گه‌ڵاڵه‌ی بوودجه‌ی ۱۴۰۰ له لایه‌ن پارلمانه‌وه ره‌د ده‌كرێت، دێته واتای ئه‌وه كه سه‌رچاوه‌ی گوزه‌ران و داهاتووی گه‌ل بۆیان گرینگ نیه و ده‌یكه‌نه قوربانی ململانێی نێو باڵه‌كانی خۆیان. ئه‌م ململانێ قیزه‌ونه دۆخی ئابووری و كۆمه‌ڵایه‌تی ده‌كاته قوربانی. له لایه‌كه‌وه گه‌ڵاڵه‌ی گه‌ڕانه‌وه بۆ به‌رجام و له لایه‌كی دیكه‌وه دامه‌زراندنی سانترفیوژه‌كانی نه‌سڵی نوێ و هه‌ڕه‌شه‌كانی ئیسرائیل و ململانێ دیپلۆماتیك و سه‌ربازییه‌كان، هه‌موو ئاماژه‌ن بۆ ناسه‌قامگیری گه‌وره و ته‌قالا بۆ خڵه‌تاندنی رای گشتی خه‌ڵك. بێگومان كۆمه‌ڵگا تا ئاستێكی باش ئاگاداری ئه‌م كایه‌گه‌له ناوخۆیی و ده‌ره‌كییانه‌یه و دژكرده‌وه‌ی ره‌وا و به جێی ده‌بێت. له زیندانه‌وه بگره هه‌تا شوێنی كار، شه‌قام و چیاكان، پرۆسه‌ی ئیستراتیژیكی گۆڕانی رادیكاڵ به شێوه‌ی قۆناخگه‌لی سیانه‌ی «ناره‌زایه‌تی، سه‌رهه‌ڵدان و شۆڕش» هه‌نووكه له سه‌رتاسه‌ری ئێران له ئارادایه. كرێكاران، زیندانیان و ژنان بوونه‌ته پێشه‌نگی گۆڕه‌پانی مه‌دنی و هێزه‌كانی گه‌ریلایش وه‌ك پێشه‌نگی ته‌واوكه‌ری له چیاكان، دوو كۆڵه‌كه‌ی بنگه‌یی گۆڕانگاری رادیكاڵن. سه‌رهه‌ڵدانه‌كانی به‌فرانباری ۹۶ و خه‌زه‌ڵوه‌ری ۹۸ ئێستاكه به چه‌شنی ناڕه‌زایه‌تی و ئاكسیۆنگه‌ڵێكی جیاواز له سه‌رتاسه‌ری ئێران درێژه‌یان هه‌یه و هیوای گۆڕانگاری ریشه‌یی و رادیكاڵ زیاتر و گه‌شتر ده‌كه‌ن.
«كۆمه‌ڵگای دیمۆكراتیك و ئازادی رۆژهه‌ڵاتی كوردستان (كۆدار)» به تێڕوانینێكی قووڵ و ریشه‌یی بۆ رووداوه گه‌وره‌كانی به‌رخۆدێرانی سه‌رتاسه‌ری ئێران و رۆژهه‌ڵاتی كوردستان و هیوا به‌ستن به تێكۆشانی په‌ژاك و هێزی گه‌ریلا، له سه‌ر رێگای ره‌وای ئاپۆیی، دژكرده‌وه‌كانی گه‌له‌كه‌مان كه له فۆرمه‌كانی مه‌دنی_ دیمۆكراتیك له شاره‌كانی رۆژهه‌ڵاتی كوردستان بۆته هۆی تووڕه‌بوون و ده‌ستبه‌سه‌ركردنی چالاكان، به ره‌وا ده‌زانێت. هاوكات له رێپێوانه‌كانی گه‌له‌كه‌مان له ئه‌ورووپا و باشووری كوردستان كه له چوارچێوه‌ی «كه‌مپه‌ینی نا بۆ سێداره و به‌ڵێ بۆ دیمۆكراسی» لێنه‌بڕاوانه پشتیوانی ده‌كات. ناڕه‌زایه‌تیه نێوخۆیی و ده‌ره‌كییه‌كانی گه‌ل، شه‌پۆلی ده‌ستبه‌سه‌ركردنه‌كان، سێداره و كوشتنی كۆلبه‌ران و سه‌ركوتی به‌ربڵاو له ئێران و رۆژهه‌ڵاتی كوردستان له حاڵێكدایه كه نزیك ده‌بینه‌وه له ساڵوه‌گه‌ڕی گه‌له‌كۆمه‌ی نێونه‌ته‌وه‌یی ۱۵ ی شوبات له دژی رێبه‌ر ئاپۆ و گه‌لی كورد، په‌ژاك راپه‌ڕینی جه‌ماوری له دژی سه‌ركوتكاری به‌تایبه‌ت تا ۱۵ ی شوباتی ده‌ستپێكردووه كه به‌شداری چالاكی ژنان و گه‌نجان به پشتیوانی چالاكان و رۆشنبیران ده‌توانێت ئه‌م ئاكسیۆنانه زیاتر به‌هێز و به‌رز بكاته‌وه. به‌ستراوه‌بوونی ئازادی رێبه‌ر ئاپۆ و گه‌ل و هه‌روه‌ها گه‌لی كورد و گه‌لانی دیكه‌ی ئێران به یه‌كدی، ئه‌وه ده‌خوازێت كه ڕێپێوانه‌كان و ئاكسیۆنه جیاوازه‌كان، خه‌ڵك به ئه‌ساس بگرن و به‌رین بن و هه‌موو گۆڕه‌پانه‌كان له خۆ بگرن؛ له‌به‌ر ئه‌وه‌ی كه ته‌نیا رێگای تێكۆشان له دژی سه‌ركوت و بێده‌نگی و هه‌روه‌ها شه‌ڕی ناوچه‌یی و ره‌شه‌كوژی گه‌لان، به‌شداری هه‌موو چین و توێژه‌كانی گه‌له له گۆڕه‌پانی تێكۆشان.
كۆمه‌ڵگای دیمۆكراتیك و ئازادی رۆژهه‌ڵاتی كوردستان – كۆدار
٧/٢/٢٠٢١