ئامەد شاهۆ
لەکاتێکدا دەستەواژەی پەڕلەمان لەبەر کارنامەی رەشی ٤١ ساڵەی رژێم، لەزیهنی گەلانی ئێران نرخ، بەها و رەوایەتی خۆی لەدەستداوە، پەڕلەمان بووەتە دیوەخانەی گەندەڵکاران و بازرگانەکانی رژێم. لە٧ی جۆزەردان مەجلیسی خۆسەپێنەر بۆ داگیرکردن و لەبار بردنی دەستکەوت و ئیرادەی پۆلایینی گەلان دەستیان بە کارو خەباتی داگیرکاری کرد.
ئەوەی جێگای سەرنجە ئەو کەسانەی کە بۆ خۆیان بەرپرسی سەرجەم نەهامەتی و چەرمەسەریەکانی ناو کۆمەڵگان و ئێرانیان بەرەو لێواری مەرگ کشاندووە، لەدیوەخانی خولی یازدەهەم ئامادە بوون و موڵک و میراتی کۆمەڵگایان لەنێوان خۆیاندا بۆ ٤ ساڵی تر دابەش کرد. کرانەوەی ژووری گەندەڵی رژێم بە ئامادەبوونی حەسەن روحانی، ئیبراهیم رەئیسی، لاریجانی و ژمارەیەک لەبەرپرسانی باڵای سێ دەزگا (قوە) و ژمارەیەک لەبەرپرسانی باڵای سیاسی و سەربازی رژێم و ئامادە بوونی ٢٦٨ نوێنەری خامنەیی لەبینای بەهارستانی رژێم بەڕێوە چوو.
ئەوەی گرنگە خامنەیی بە زۆرەملێ دەیەوێت دەستەواژەی پەڕلەمان و پەڕلەمانتار لەزیهنی تاکەکانی کۆمەڵگا بدرەوشێنێتەوە. پەیامی خامنەیی لەکرانەوەی مەجلیسی خولی یازدەهەمدا راشکاوانە ئاشکرای دەکات کە پەڕلەمان لەناوەڕۆکی راستەقینەی خۆی لایدا و لەبنەڕەتدا ناوەندێکی دژە ئازادی و دیمۆکراسییە. کانگای بێ هیوایی و نیفرەتی گەل لەبەرامبەر دەسەڵاتە. لووتکەی گەندەڵی دەسەڵات لەناو کۆمەڵگایە. خامنەیی لەپەیامەکەیدا جەختی لەسەر ئەوە کردووە کە پەڕلەمان بە پەرلەمانتارانی کارناس، چالاک، بە دیسپلین، دەستپاک و ئەمانەتدار و ئاشنا لەگەڵ شەرت و مەرج و پێویستیە سەرەتاییەکانی رژێم خاوەن رۆڵ دەبێت. بەڵام کارنامەی ١٠ خولی رابردووی پەڕلەمان بە دوور لەو بانگەشە و درووشمە بریقەدارانەی خامنەییە. چون رژێم بۆ ئەوەی تەمەنی دەسەڵاتداری خۆی زیاتر بکات و بەرەنگاری هێرش و گوشارە دەرەکیەکان ببێتەوە، هەموو هەوڵەکانیان خستوەتە گەڕ کە مەجلیسی خولی یازدەهەم بکەنە مەجلیسی بەهێز، کارامە و ئینقلابی کە تەنیا لەخەمی پاراستنی تەختی خامنەیی و رژێمی ولایەتی موتلەقەی فەقی بێت.
مەجلیسی خولی یازدەهەم بۆ فریودانی گەل و کۆمەڵگا لەسەر کاغەز ئەولەوییەت دەداتە چارەسەری بژێوی ژیانی چینی فەقیر و هەژاری کۆمەڵگا، لەکاتێکدا بە پێچەوانەی ئەو درووشمە کوشتنی کۆڵبەر و کاسبکارانی سەر سنوور ساکارترین چارەسەری رژێمە، هاوکات لەسنە، کرماشان، ئیلام، لوڕستان، ورمێ، خوزستان و سیستان و بەلووچستان گەل لەژێر هێڵی هەژاری خنکاون و رژێم دەرفەتی گەشەدانی هیچ جۆرە پڕۆژەیەکی ئابووری بە گەل لەو ناوچانە نادات. رژێم راشکاوانە بانگەشەی خەرج کردنی ٣٠ میلیارد دۆلار لەشەڕی سوریا دەکات و لەناوخۆش گەل لەتەنووری هەژاری دەقرچێن و لەمەجلیسیش لەسەر سفرەی بژێوی ژیانی گەل ئاهەنگ دەگێڕن.
پەڕلەمان پێداگرە لەگۆڕانکاری لەسەر هێڵە سەرەکیەکانی ئابووری وەک؛ کار و پیشە، بەرهەم و هەڵاواردن، بەڵام ئەو دیاردانە لەدەرئەنجامی سیاسەتی خودی رژێم فیشقەی کردووەو سیاسەتێک کە پەیڕەو کراوە لەقۆناخی دوای کورۆنا ئەگەری ئەوە لەئارادایە کە ٦ میلیۆن کەسی تر بەشداری سوپای بێکاران ببن و درووشمی ناوبەتاڵی خامنەیی سوپای زەبەلاحی بێکاری لێ سەوز دەبێت. رژێم جارێکی تر دزی، گەندەڵی و کۆمەڵکوژیەکانی بە رێگای پەڕلەمانەوە یاسایی دەکات. بە تێخزاندنی زیاتر لە ٨٠٪ پەڕلەمانتاری سەر بە بناژۆخوازەکان رژێم لەژێر ناوی هەڵوێستی شۆڕشگێڕانە ئامادەکاری کۆمەڵکوژی نوێ لەجوگرافیای ئێران دەکات و ئەوەش بە دەستەواژەی هەڵسووکەوتی برایانە و مەجلیسی گەنجی ئینقلابی دەخەمڵێنێت. دەستنیشان کردنی محەمەد باقر قالیباف بۆ سەرۆکی پەڕلەمان کە بە گەندەڵترین پیاوی رژێم دەناسرێت، کارنامەی ئایندەی پەڕلەمان لەسەر ئەو بەرنامە و رەوتە دەخاتەڕوو.
لەکاتێکدا خامنەیی ئەوەی لەیاد کردوە کە پێش هەڵبژاردنی ٢ی رەشەممە، راستەوخۆ داوای لە گەلانی ئێران کرد کە لەبەر خۆشەویستی، ئاسایش و ئابڕووی رژێم بە هەموو هێزیانەوە بڕۆنە سەر سندووقی دەنگدان. بەس خامنەیی بەو داوایەی، شۆڕشی زەوتکراوی گەلی لەقازانجی دەسەڵات، پێ هەڵنەسووڕا و پڕۆژەی زەبەلاح و ناوبەتاڵەکەی پەتای کۆرۆنا و بایکۆتی سەرتاسەری و لەدەستدانی رەوایەتی رژێمی لێ شین بوو.
دەست بەکار بوونی خولی یازدەهەمی پەڕلەمان لەکاتێکدایە کە رژێم لەناو زەلکاوی قەیرانی رەوایەتی دەسەڵاتداری، ئابووری، سیاسی، کۆمەڵایەتی، سەربازی و دیپلۆماسی چەقیوە. بۆیە جیا لە بژاردەی پەلەقاژە کردن، مەجلیسی نوێ توانای چارەسەری هیچ جۆرە گرفتێکی نابێت. چون رژێمێک کە بۆ خۆی لەناو گەردەلوولی قەیران دەخولێتەوە، چەرخی شۆڕشی پێ هەڵناسووڕێت، بەڕێوەبەرایەتی وڵاتی پێ ناکرێت، توانای پاراستنی کۆمەڵگا، دامەزراندنی ئابووری کۆمیناڵ و کۆمەڵگای ئازاد و دادپەروەر و دابین کردنی پێداویستی تەندروستی کۆمەڵگای نابێت. دەوڵەتی گەنجی ئینقلابی حزبوڵلاهی پێ دیزاین ناکرێت.
دەسەڵاتدارانی رژێم لەم قۆناخەدا لەژێر درووشمی هەنگاوی دووهەمی شۆڕش لەهەوڵی نووژەن کردنەوەی دەوڵەتن و دەیانەوێت لەژێر ناوی یاسایی بوونی پەڕلەمان، بە زۆرە ملێ هەژمۆنییان بە سەر کۆمەڵگا بسەپێنن. رژێم لەکاتێکدا درووشمی دەوڵەتی گەنجی ئینقلابی حزبووڵاهی بەرز کردوەتەوە کە مەودای زۆری لەگەڵ تاکی خاوەن ئیرادە، کۆمەڵگای ئازاد و ژیاری دیمۆکراتیک درووست بووە. دەیانەوێت مەجلیسی خولی یازدەهەم بە دووەمین قۆناخی دژە شۆڕش کە بە سێیانەی؛ خودسازی، کۆمەڵگاسازی و شارستانێتی نوێ ئیسلامی راگەیاندووە، بخەمڵێنێت. بەس لەبنەڕەتدا بە چەکەرە کێشانی پەتای کۆڕۆنا، داڕمانی ئابووری رژێم، تەشەنەسەندنی گرانی و بێکاری؛ هەڵگرتنی هەنگاوی خۆکوژی، کۆمەڵگاکوژی و ژیارکوژی لەجۆگرافیای پڕ پیت و بەرەکەتی گەلانی ئاریانی سەریهەڵدایەوە، کوشتنی کچێکی ١٣ ساڵان لەگیلان لەلایەن باوکیەوە بەرهەمی هەمان زهنیەتە. حکومەتی خەڵکی و خەڵک سالاری درۆیینی خامنەیی و روحانی، جەستەی پینەکراوی ئەو رژێمەیە کە لەهەڵبژاردنی خولی یازدەهەمی پەڕلەمان بایکۆتی سەرتاسەری گەلانی ئێرانی لێکەوتەوەو ئەمڕۆ لەپەڕلەمان بە یاسای چەواشەکار دەرخواردی کۆمەڵگا دەدەن و لەبەر پێداگری خەڵک سالاری ئیسلامی نزیکەی ٧ مانگە کە ئاماری قوربانیانی مانگی خەزەڵوەر لەلایەن کاربەدەستانی رژێم شاردراوەتەوەو هەرە دوایی وەزیری ناوخۆ لەسەر بنەمای ئەوەی کە گوایا بڕوای بە حکومەتی خەڵک سالاری هەیە، دڵۆپێک لەتاوانەکانی رژێمی بۆ رای گشتی ئاشکرا کرد کە نزیکە ٢٠٠ بۆ ٢٢٠ کەس لەخۆپیشاندانەکان گیانیان لەدەستداوەو ئەوەشیان خستەسەر حسابی مەجلیسی نوێ کە شەفافە و پەردە لەسەر راستیەکان هەڵدەداتەوە.
کاربەدەستانی رژێم لەمەجلیسی نوێدا، جەختیان لەسەر گەشەدانی ئابووری مقاومەتی یا جەهش بەرهەم لە ٤ ساڵی داهاتوو کردەوە. خامنەیی لە هەوڵدایە کە بۆ سەرکەوتن لەهەنگاوی دووهەمی شۆڕش یا دەوڵەتی ئینقلابی، برەو بە بەرهەمی سوپایی بدات. بەڵام بەرهەمێک کە لەکانگەو کارگەی درۆ، فێڵ و تەڵەکە، دووڕوویی، چەواشەکاری، گەندەڵی، داوێن پیسی و زاڵمایەتی چرۆ بکات، پووک و چرووکە. چون بەرهەمەکەی سوپای بێکاری، بڵاوکردنەوەی ماددەی هۆشبەر، رەشبگیری، لەسێدارەدان، کوشتن، گرانی، سەرکوت و قەیرانە. واتا مەجلیسی خولی یازدەهەم یا مەجلیسی ئینقلابی خامنەیی، مەجلیسی سوپای پاسدارانە. مەجلیسی درۆ و دەلەسە، دزی و گەندەڵییە. مەجلیسی شەڕ و توندوتیژی و ئاژاوەگێڕییە. پەڕلەمانێکە کە ئیرادەی گەنج و ژنی تێدا زەوت کراوەو بە دەستنیشان کردنی ١٦ کورسی ژن، لافی یەکسانی و دادپەروەری و پاراستنی مافی ژنان لێدەدەن.
خامنەیی لەسەروبەندی بڵاوبوونەوەی پەتای کۆرۆنا و هەڵبژاردنی ٢ی رەشەممە بە داتاشینی دەستەواژەی قەڵەمبازی بەرهەم (جهش تولید)، دەیەوێت بەرپرس و کاربەدەستانی رژێم، لەقەلەپۆپەی گەندەڵی دابەزێنێت و لەناو شەمەندەفڕی دەسەڵاتدا، بەرەو زەلکاوی قەیران خلۆریان بکاتەوە. رژێم ٤١ ساڵە لەژێر ناوی پڕۆژەی هەنگاوی شۆڕش، گەرای قەیران لەسەر سفرەی گەل دادەنێت. بە پاشینی ئەو گەرایە، کارەسات و تاوانی زەبەلاح لەپڕۆژەی ناوبەتاڵی خامنەیی فیشقەی کردووە. بەو پڕۆژەیە گەل و کۆمەڵگایان لەناو دیواری بەسیجی، جاشایەتی و سوپای چەوسێنەر بە بارمتە گرتووەو لەمەجلیسیش وەک دەستکەوتی مەزنی گەل لەقەڵەمی دەدەن و بە کۆمەڵگای دەفرۆشنەوە.
لەسەروبەندی دەستپێکردنی مەجلیسی خولی یازدەهەم، کاربەدەستانی رژێم گوایا بە رووناکی پڕۆژەیەک، درێژە بە تەمەنی دەسەڵاتداریان دەدەن، کە لەجۆگرافیای ئێران و ناوچەکە رووباری خوێنی بەرپا کردووە. چون پڕۆژەیەک لەبرەوپێدان دایە کە بە قەیران، قەیران دەخوڵقێنێت. چ رووداوێک لەسنوور و پانتایی ئەو پڕۆژە روودەدات، گۆمی خوێنی بەرپا کردووەو ئەوەش مەجلیسی نوێ لێ بەرپرسیارە.
دەرئەنجامی سیاسەتی ئابووری هەنگاوی دژە شۆڕشی خامنەیی، شار و گوندەکان غەرقی سێڵاو و ئاگربەردان لەدارستانەکان دەبن. لەکاتی گەشت و گوزار، سارۆخی مەرگ، پێشکەشی فڕۆکەی نەفەرهەڵگر دەکەن. لەژیانی پڕ لەنەهامەتی و کول و ئێش، ڤایرۆسی خامنەیی و سوپای پاسداران دەخەنە گیانی هاوڵاتیان. شیرازەی کۆمەڵگا بە پەتای کۆرۆنا دەشێوێنن و تۆڵە لەکۆمەڵگا دەستێنن و تاقەت و هێزی ناڕەزایەتی دەربڕین لەکۆمەڵگا دەچۆڕێنن. لەکاتی هەستانی لافاو و روودانی بوومەلەرزە و کوشتنی ژنان لەژێر ناوی نامووس، خوێ بە سەر زامەکانی گەل دەپاشن. بۆ پەیدا کردنی نانی سەرسفرەی شەو، کۆڵبەر و کاسبکاران دەکوژن. لەژێر ناوی پەتای کۆرۆنا هاوکاری بۆ کەسانی هەژار و کەم دەرامەد کۆدەکەنەوەو خەرجی کردەوە مافیاییەکانی سوپای پاسداران دەکەن. کۆی ئەو تاوانانەی رژێم کە لە ژێر پەردەی هەنگاوی شۆڕش ئەنجامی دەدات، بە پێناسەی تاقی کردنەوەی مەزنی گەل لەلایەن خوداوە، خۆیان لێ دەرباز دەکەن. بە چەواشەکارییەکی مەزنەوە ئەو تاوانانە دەخەنە ئەستۆی خودا و بۆ بێ کاردانەوەو بە لاڕێدابردنی راستی، داوای سەبر، هێمنی و دۆعا خوێندن لەخەڵک دەکەن و ئەوەش لەپەڕلەماندا لەئاوی یاسادا دەیشۆرن و دەرخواردی کۆمەڵگای دەدەن.
بەکورتی خەمڵاندنی مەجلیسی خولی یازدەهەم بە پڕۆژەی هەنگاوی دووەمی شۆڕش و مەجلیسی ئینقلابی و دەوڵەتی گەنجی ئینقلابی؛ لەلای گەل بە واتای ئاو لەبێژنگ خستنە. دژە شۆڕشە، لەبەرامبەر گەل و کۆمەڵگا. بێ واتاکردنی زانست و توێژینەوەیە. داماڵینی ورەو هێزی دڵ، ئەخلاق و ویژدان لەجەستەی مرۆڤە. لەباربردنی دادپەروەری و زەمین کێش کردنی ئازادی و دیمۆکراسییە. سڕینەوەو تێکشکاندنی ئیرادە، خۆیی بوون و مافی هاوڵاتی بوونە. گەندەڵکردنی ژیان و لەباربردنی ئابووری کۆمیناڵە. پەلکێش کردنی گەل و کۆمەڵگا بۆ ناو تۆڕەکانی دەسەڵات بە شێواز و ستایلی نوێ یە. قۆناخی نوێ کۆمەڵکوژی و بە لووتکە گەیاندنی زهنیەتی فاشیزمی مەزهەبییە.